spakettí með laxi og blaðlauk

Tilraunaréttur áðan og tókst svona líka ljómandi vel. Hlakka strax til að borða afganginn í hádeginu á morgun:

500 g spakettí
2 blaðlaukar, ljósi hlutinn
smjör til steikingar
safi úr einni sítrónu
1 1/2 dl rjómi
1 msk dijonsinnep
300 g. lax (átti reyndar silung, ekki verra)
salt
chilipipar

Skerið blaðlaukinn í sneiðar og látið malla við vægan hita á pönnu í smjörinu í 5-6 mínútur. Á meðan laukurinn mallar, sjóðið spakettí eftir leiðbeiningum á pakka. Setjið sítrónusafa, rjóma, dijonsinnep og chilipipar saman við og hitið að suðu, Skerið laxinn/silunginn í fremur litla bita (daninn myndi segja mundrette bidder í sínum uppskriftum en mér finnst asnalegt að skrifa munnbita), setjið saman við sósuna og sjóðið þar til fiskurinn er rétt orðinn ljós í gegn, alls ekki of lengi.

Hellið af pastanu, sósuna yfir og njótið.

rósmarín- og hvítlaukspasta

Þessi sló í gegn hjá okkur, fyrir utan svolítið smjör er hann fullkominn til að vega upp á móti öllum steikunum.

Upprunaleg uppskrift hér.

6 msk smjör
2 meðalstórir laukar, fínt saxaðir
6 hvítlauksrif, fremur gróft söxuð
1 bolli kjúklingasoð
2 msk saxað ferskt rósmarín
500 g spakettí (á myndinni sem fylgir upprunalegu uppskriftinni er skrítnasta spakettí sem ég hef séð)
salt og pipar
nýrifinn parmaostur

Bræðið 4 msk af smjörinu á pönnu við vægan hita. Brúnið laukinn vel (um 10 mínútur). Bætið hvítlauk saman við og steikið áfram í 2 mínútur eða svo. Setjið kjúklingasoð og rósmarín saman við, hækkið hitann og sjóðið niður um þriðjung (5-6 mínútur hjá mér).

Á meðan, sjóðið spakettíið skv leiðbeiningum á pakka.

Þegar hvort tveggja er soðið, hellið pastanu í skál, setjið restina af smjörinu saman við ásamt parmaosti, hrærið þar til bráðið. Sósan fer saman við og njótið.

kryddað pastasalat

bjó til ansi gott pastasalat í kvöld, ættað frá Pioneer Woman í Ameríkunni.

Í það fóru:

500 g pastaskeljar
1/2 bolli mæónes (notaði nú bara Gunnars þó matarskríbentarnir í Fréttatímanum telji það ekki mæónes)
1/4 bolli léttmjólk (hún segir nýmjólk en ég átti ekki)
4 msk borðedik
1 1/2 tsk piparsósa
1/2 tsk salt
svartur pipar
1 bakki kirsuberjatómatar skornir í helminga á lengdina
250 g gouda skorinn í bita (átti að vera reyktur en svoleiðis fæst ekki svo glatt hér)
24 heil basilblöð

Sjóðið pastað og kælið undir kalda krananum.

Klippið baslið í ræmur.
Blandið saman mæónesi, mjólk, ediki, salti, pipar og piparsósu.

Hrærið saman pasta, tómötum og ostbitum í stórri skál, hellið sósunni yfir ásamt basli og látið standa í ísskáp í amk. klukkutíma.

Virkaði fínt sem (semi)léttur kvöldmatur hér á bæ, ásamt hvítlauksbrauði en væri örugglega líka hörkufínn í samskotapartí.

Hér er upprunalega uppskriftin.

Lasagna Hallveigar –versjón 29. Mars 2010 ;)

Kjötsósan:
500 gr jöklanautahakk úr Frú Laugu
1 laukur (átti reyndar bara tvo hálfa sem voru frekar litlir þannig að ég henti einum skalottulauk með)
4 hvítlauksgeirar
1 gulrót
1 sellerístöngull
2 dósir hakkaðir tómatar, maukaðir (eða ein flaska passata)
1 dós tómatpurée
1 grein ferskt rósmarín
2 tsk þurrkað oregano
1 tsk italian seasoning
Maldon salt og nýmalaður pipar
1 tsk sykur
3 lárviðarlauf
1 msk smjör og 1 msk olía
Vatn eftir þörfum

Ostasósan:
2 msk smjör
2 msk hveiti
500 ml mjólk
Nýmalaður svartur pipar
¼ tsk múskat
1 msk saxað ferskt basil
115 gr 26% gouda saxað smátt
Lasagnaplötur
Rifinn Parmigiano Reggiano
Mozzarellakúla skorin í þunnar sneiðar
40 gr gouda rifinn
Aðferð:
Um 4 tímum fyrir matmálstíma þarf að gera kjötsósuna. Maukið grænmetið rósmarínið og þurrkuðu kryddin saman í matvinnsluvél eða töfrasprota. Steikið úr olíunni og smjörinu í svolitla stund við miðlungshita, bætið svo hakkinu saman við og brúnið. Saltið og piprið kjötið, bætið svo maukuðu tómötunum, tómatpúrrunni, lárviðarlaufunum og sykrinum við. Lækkið hitann og látið malla í 3 tíma eða meira.
40 mínútum fyrir matmálstíma er kveikt á ofninum á 200°. Hitið mjólkina í litlum potti og í stærri potti bræðið smjörið og gerið smjörbollu úr hveitinu. Hellið mjólkinni saman við og þegar sósan fer að þykkna bætið þá ostinum út í. Piprið, og bætið múskati og söxuðu basil saman við.
Til að gera lasagnað takið þá stórt ferkantað eldfast mót, setjið ostasósu í botninn, þá lasagnaplötur, meiri ostasósu, kjötsósu, nokkrar tægjur af mozzarellaostinum og rífið smá parmigiano Reggiano yfir kjötblönduna. Þá lasagnaplötur, ostasósu, kjötsósu, ost osfrv. Endið á lasagnaplötum og ostasósu yfir þær, dreifið rifna ostinum yfir og smávegis af parmigiano og mozzarella ef þið eigið hann eftir.
Inn í ofn í 25 mínútur, borið fram með hvítlauksbrauði (ég var með hatting, það er best) og salati. Mitt salat í þetta skiptið var einstaklega einfalt, jöklasalat (átti ekkert kletta) konfekttómatar (líka úr Laugu) , hash avocado, nokkrar furuhnetur og fetaostur.

tómatapasta

jæja, ekki veitir af að létta matseðilinn smá - við fórum í smiðju Jamie Olivers, bókin sem við fengum í jólagjöf frá Hallveigu og Jóni Heiðari, gríðarmargt spennandi. Einfalt líka og fljótlegt - allavega ef við hefðum ekki búið til pastað sjálf, það tók smástund.
Jamie notar ferskar lasagnaplötur úr búð og sker þær í lengjur, náttúrlega talsvert fljótlegra. Auðvitað er svo bara hægt að nota tagliatelle eða annað pasta að vild.

Í þetta þarf:

500 g ferskt pasta
1 box kirsuberjatómata
smá ólífuolíu og smjör
nokkur hvítlauksrif - fer eftir smekk
lítið búnt af fersku basil (fundum ekki slíkt í búðum, notuðum rósmarín)
1/2 dl balsamedik
100 g parmaostur

Byrjið á að koma upp suðu á stórum potti af saltvatni fyrir pastað. Ef það er þurrkað má byrja að sjóða það strax.

Skerið tómatana í helminga eða fjórðunga að vild og hvítlauksrifin í sneiðar. (við kreistum hann nú reyndar). Hitið olíu og smjör á stórri pönnu við meðalhita, steikið hvítlaukinn þar til hann byrjar aðeins að brúnast, setjið þá tómatana saman við og steikið stutta stund. Hellið þá edikinu yfir ásamt helmingnum af nýrifnum parmaostinum. Leyfið að malla við vægan hita á meðan ferska pastað er soðið (um 3 mínútur).

Þegar pastað er tilbúið, hellið af því vatninu, geymið þó 2-3 ausur af soðinu. Setjið pastað saman við sósuna ásamt soði og hrærið vel saman ásamt parmaostinum sem eftir er.

Mælum með þessu, ekki smá gott og frískandi eftir allar steikurnar...

Kúrbítsmakkarónur

Þetta er mjög gott og tekur ekki langan tíma að matreiða.

2 litlir kúrbítar
4 hvítlauksrif
olía
salt
pipar
parmesanostur

makkarónur (ekki svona litlar og fljótsoðnar sem maður setur í typpasúpu, heldur stórar og feitar)

Ég byrjaði á því að setja vatn í pott til að sjóða pastað í.

Maður rífur kúrbítinn með rifjárni. Það er gott að leggja nokkur lög af eldhúspappír undir, pappírinn dregur í sig safann úr kúrbítunum. Svo hitar maður olíu í pönnu (u.þ.b. botnfylli) og steikir hvítlaukinn á meðalháum hita í smá stund (þangað til að hann byrjar að verða brúnn) og setur kúrbítinn á pönnuna. Ég bætti smá olíu við og lét þetta krauma á háum hita til að byrja með en svo meðalháum meðan ég sauð makkarónurnar. Salta og pipra.

Þegar makkarónurnar eru soðnar hellir maður vatninu af og blandar gumsinu saman við, ásamt u.þ.b. 2/3 bolla af parmesanosti. Svo hrærir maður duglega svo osturinn bráðni.

sumarsalat

Maður tekur tvö sumur...

/fimmeyringur

Höfum þetta salat sirka einu sinni á ári, nokkrir réttir sem eru þannig, rifsberjakjúklingurinn, rabarbaragrautur, rjómasveppapasta með nýtíndum sveppum, örugglega fleira sem ég man ekki eftir í augnablikinu. Svona árstíðabundnir.

Hér kemur:

250 g pasta, skrúfur eða fiðrildi
1 lítill laukur
1 stilkur sellerí
1 rauð paprika
150 g salamipylsa
200 g mildur ostur að eigin vali
125 grömm belgbaunir

dressing:
4 msk ólífuolía
2 tsk sinnep
salt
pipar
klipptar ferskar kryddjurtir að vild (vorum með esdragon, marjoram og basil)
safi úr hálfri sítrónu
hálft hvítlauksrif, marið, ef vill

Sjóðið pastað eftir leiðbeiningum á pakka, sigtið og skolið. Skerið lauk, papriku, sellerí og salami í litla bita og ostinn í strimla, skolið baunirnar. Blandið öllu saman í stóra skál. Hrærið allt saman sem í dressinguna á að fara og hellið síðan yfir salatið. Látið standa í kæli í amk. klukkutíma og berið síðan fram með ristuðu brauði eða öðru góðu brauði.

pasta í túnfiskostarjómasósu

jámm, þetta er alveg eins gott og það hljómar. Kom reyndar ekki öllu í nafnið sem hefði eiginlega þurft að vera þar.

Við hönnuðum þennan rétt eftir að hafa fengið gríðargóðan pastarétt í München fyrir um 19 árum. Í honum voru ólífur og túnfiskur og rjómi, reyndar enginn ostur. Bættum honum sjálf inn. Þetta er í miklu uppáhaldi hér á bæ:

500 g spakettí

1 dós af túnfiski í olíu
2-3 hvítlauksrif
10-15 grænar ólífur skornar í tvennt
góður biti af gulum osti að eigin vali (brauðostur virkar fínt), kannski svona 200 g
1 peli rjómi
örlítið af sósuþykkjara

Sjóðið spakettíið eftir leiðbeiningum á pakka

Á meðan, skerið ostinn í mola, hellið olíunni af túnfiskinum í pott. Saxið hvítlaukinn eða kreistið og steikið smástund. Bræðið ostinn í hvítlauksolíunni við fremur vægan hita. Setjið ólífur út í. Hellið rjómanum saman við í skömmtum og hrærið hverjum skammti saman við ostinn til að hann fari ekki í kekki. Nauðsynlegt getur verið að jafna sósuna með smá sósuþykkjara.

Þegar pastað er soðið, hellið af því og blandið túnfiskinum saman við. Sósunni er síðan hellt yfir og blandað saman.

Með þessu má bera nýrifinn parmaost ef vill, en okkur finnst það reyndar ekki bæta réttinn sérstaklega.

gráðostapasta

þessi uppskrift er heimatilbúin:

1 pk gott beikon
1 rauð paprika í bitum

1/2 gráðostastykki og annað eins af brauðosti
1 ds sýrður rjómi
smá sósuþykkjari (maízena)

pasta, helst þrílitir pennar (penne tricolori)
parmaostur

Pastað soðið eftir leiðbeiningum á pakka

Beikonið klippt í bita og steikt á pönnu. Tekið af pönnunni. Megninu af feitinni hellt af (ef einhver) og paprikan steikt á sömu pönnu. Líka tekið af pönnunni. Gráðosturinn og hinn osturinn bræddur, sýrða rjómanum hrært saman við og þykkt örlítið.

Sósunni hellt yfir heitt pastað, beikoni og papriku blandað saman við og nýrifnum parmaosti stráð yfir. Af þessu er mjög milt og fínt gráðostabragð, rétturinn er sérlega vinsæll af börnunum mínum (sem ekki líta við gráðosti í hreinustu mynd)

sveppapasta

ekki beinlínis megrunarfæði en hrikalega gott:

Sveppapasta

100-200 g nýir villisveppir
smá smjör

ferskt óreganó (hellingur)
smá maldon salt
1 tsk púðursykur
1/2 tsk kálfakraftur
1 peli rjómi
1 peli kaffirjómi
örlítið af sósuþykkjara

meira salt ef þarf

Fettucine eða tagliatelle pasta
Nóg af nýrifnum parmaosti

Sjóðið pastað eftir leiðbeiningum.

Steikið sveppina á pönnu í smjörinu ásamt oreganóinu. Myljið yfir smá salt. Hellið rjómanum og kaffirjómanum yfir og látið suðu koma upp. Bætið kálfakrafti og púðursykri við ásamt sósujafnara eftir smekk (ekki gott að þetta verði mjög þykkt). Sjóðið saman smástund.

Látið vatnið renna af pastanu og hrærið sósunni strax saman við. Berið fram með parmaostinum.

trúi

ekki að ég hafi aldrei sett hér inn aðalpastaréttinn :-O

Tagliatelle verdi alla Bolognese

úr Hundrað góðar pastasósur eftir Diane Seed

500 g grænt tagliatelle eða eggjapasta
150 g magurt beinlaust svínakjöt
150 g magurt beinlaust nautakjöt
2 msk ólífuolía
80 g smjör
1 meðalstór laukur
1 gulrót
1 leggur sellerí
100 g beikon
50 g nýjar ítalskar pylsur eða hreint pylsukjöt (nota hér pepperóní, helst sterkt)
1 glas hvítvín
1 msk tómatþykkni
1 vínglas af soði
salt, svartur pipar úr kvörn
0,75 dl rjómi
nýrifinn parmaostur (má sleppa)


Hakka kjötið í hnífakvörn (mixer) eða fá það hakkað í versluninni. Hita olíu og 50 g af smjörinu og setja saxaðan lauk, gulrót og sellerí út í ásamt smátt söxuðu beikoni. Láta malla hægt í um 10 mín, bæta þá við kjöti, pylsukjöti án skinns og víni. Sjóðið áfram í 10 mín. og hrærið í öðru hverju. Hræra tómatþykkni út í soð og bæta í pottinn. Hræra og krydda eftir smekk. Sjóða við vægan hita í 1 1/2 klst. Blanda rjómanum saman við og taka síðan pottinn af hitanum, en halda sósunni heitri. Sjóða pasta. Hita sósuna aftur og hræra út í hana smjörið sem eftir varð. Láta renna af pastanu, setja á heitt fat og bæta sósu við.
Þessi réttur er oft borinn fram án þess að sósu og pasta sé blandað saman, heldur er sósan höfð í pastanu miðju. Sennilega er best að bera réttinn þannig á borð í allri sinni dýrð, en hræra vel áður en skammtað er á diskana. Þeir sem vilja hafa ostinn með

gítarpasta

nei, þetta eru ekki soðnir gítarstrengir, en gott er það.



Nú fæst chitarrapasta í Frú Laugu, húrra!

1,25 kg lambakjöt
1 1/4 bolli hvítvín
salt og nýmalaður pipar
1 bolli jómfrúrólífuolía
4 hvítlauksrif, léttpressuð með hnífsblaði
5 lárviðarlauf
1 kíló tómatar, afhýddir og grófsaxaðir eða 2 dósir tómatar
6 stórar paprikur, (blandaðir litir) skornar í ræmur (við notum nú minna, tvær í dag)
2 bollar gott soð
650 g gítarpasta/spakettí
fullt af nýrifnum parmaosti

Skerið hluta lambakjötsins í fallega bita og hakkið afganginn. Skolið kjötið upp úr víninu (geymið vínið) og kryddið með salti og pipar. Hitið olíuna í stórri þykkbotna pönnu og steikið hvítlaukinn og lárviðarlaufin við meðalhita. Takið hvítlaukinn upp úr þegar hann hefur brúnast og bætið kjötinu og hakkinu á pönnuna og brúnið. Hellið víninu saman við og sjóðið niður. Takið lárviðarlaufin úr pönnunni og hendið þeim. Bætið tómötunum (með safa ef notið niðursoðna) og paprikustrimlunum á pönnuna. Kryddið með salti og pipar og setjið lok á pönnuna. Sjóðið við lægsta hita í 2 klst, hrærið af og til. Fylgist vel með réttinum og bætið soði við ef hann lítur út fyrir að vera að þorna.

Berið fram með pastanu og parmaostinum.

verðykkuraðgóðu.

þistilhjartnakaramellur

gerðum frábæran forrétt í gær, talsvert maus, reyndar en vel þess virði. Sló líka þokkalega í gegn. Heimalagað pasta, fyllt með þistilhjörtum og ostakremi:

Pasta: (uppskrift frá Nönnu)

300 g. hveiti, meira ef þarf
4 egg (gefur reyndar upp 3, en það munar mjög miklu að bæta við því fjórða við)
1 msk olía
1/2 tsk salt

Hveitið sigtað á vinnuborð og laut gerð í miðjuna. Eggin brotin og sett í lautina ásamt olíu og salti. Hrært og síðan er farið að blanda hveitinu smátt og smátt saman við með fingrunum en þess gætt vel að eggin renni ekki út úr lautinni og yfir vinnuborðið. Haldið áfram þar til búið er að vinna allt hveitið inn í deigið; gott er að nota spaða eða sköfu til að skrapa upp deig sem klessist við vinnuborðið. Deigið hnoðað vel þar til það er silkimjúkt og teygjanlegt. Mótað í kúlu, skál hvolft yfir og látið standa við stofuhita í um hálftíma. Þá er deigið flatt út á hveitistráðu borði, helst með löngu og mjóu kökukefli. Flatt út eins þunnt og hægt er, annaðhvort í lengjur eða eina stóra plötu. Þegar það er orðið álíka þykkt og póstkort er það lagt yfir prik og látið þorna örlítið.

Við fletjum reyndar út í pastavél, það er auðveldara, en þetta er ss. alveg hægt án þess að eiga slíka græju.

(síðast þegar við gerðum þessa uppskrift ætluðum við að flýta fyrir okkur og kaupa tilbúnar lasagnaplötur. Stór mistök, Jón Lárus byrjaði að búa til pastað þegar gestirnir voru komnir á staðinn og forréttur var ekki borðaður fyrr en um níu. Stress dauðans!)

Fylling:

4 fersk þistilhjörtu
1 laukur, saxaður
250 g ricottaostur
50 g parmaostur
2 1/2 dl gott soð
1 egg
smjör til steikingar
sítróna
salt

smjör
fersk salvía

Skerið blöðin utan af þistilhjörtunum (ath, ekki henda blöðunum, þau má sjóða sér og borða innihaldið með hollandaisesósu. Mmm!) Skerið hjörtun í átta bita hvert og geymið í vatni með sítrónu til að varna þess að þau dökkni um of. Laukurinn mýktur í smjörinu, hjörtun sett saman við ásamt soðinu og látið malla þar til þau eru passlega mjúk (10-15 mínútur).

Eggið þeytt, ricotta og rifnum parmaosti bætt saman við.

Samsetning:

Skerið pastadeig í ferninga, (um það bil 10*7 cm). Setjið einn bita af þistilhjarta á ferning ásamt lauk og ostablöndu. Leggið annað blað yfir fyllinguna, þrýstið jöðrunum saman og snúið upp á endana til að búa til karamellur.

Sjóðið í nægu vatni í 2 mínútur, eða þar til karamellurnar fljóta upp

Borið fram með bræddu smjöri með fullt af ferskri salvíu klipptri saman við, og meiri parmaosti.

Sikileyskt lasagna

Annað loforð efnt. Þetta er eggaldinlasagna, algerlega kjötlaust, gott fyrir kanínurnar á listanum...

1-2 meðalstór eggaldin
lasagnablöð eftir þörfum
2 dósir niðursoðnir tómatar
1 lítil dós tómatkraftur (puré)
1 laukur, smátt saxaður
fullt af fersku basil (basili? basli?)
salt og pipar eftir smekk
150 g mozzarella (nota nú bara oftast gouda eða brauðost)
smá ólífuolía.

Byrjið á því að meðhöndla eggaldinin. Það sem ég geri er að ég sker þau í sneiðar, legg í fat og salta vel yfir. Læt í ísskáp í klukkutíma eða svo, saltið dregur vökva úr eggaldininu. Síðan skolar maður þau vel og þerrar. Stundum baka ég sneiðarnar í ofni í svona kortér, bara smyr bökunarpappír með olíunni og legg sneiðarnar á. Hiti 200 gráður. (Þetta er svolítið vesen en þetta verður allt annar matur. Ég hef margprófað að nenna þessu ekki og nota eggaldinin beint en verð alltaf fyrir sömu vonbrigðunum) Það þarf ekki að salta réttinn meira, þetta verður alveg passlega salt með því að skola vel og þerra. (hef hins vegar frétt + get ímyndað mér að þetta verði algerlega óætt ef sneiðarnar eru ekki skolaðar...)

Steikið lauk í olíu þar til gullinn, bætið síðan tómatdósunum + kraftinum út á pönnuna og kryddið eftir smekk (ekki salta). Má sjóða aðeins niður.

Raðið síðan saman lögum af sósu, eggaldini, lasagnablöðum og osti. Fallegast að enda á ostinum. Bakist við 200° í 40-50 mínútur. Gott að bera fram með góðu brauði og nýrifnum parmaosti.

óhollustan uppmáluð

bragðaði þetta fyrst á veitingastað rétt hjá tónlistarháskólanum í Stuttgart.

ferskt ravioli (helst með gorgonsola, eða bara osti, ekkert svona kjötsull eða pestó)

10 til 15 blöð af ferskri salvíu látin krauma litla stund með hvítlauk í ríkulegu magni af smjöri.

hellt yfir ravioliið og saltað með grófu salti og piprað með nýmöluðum svörtum pipar og miklum parmesanosti dreift yfir.


Þetta er viðbjóðslega óhollt, en sjúklega gott og var í kvöldmatinn hjá mér áðan. Núna er ítalska expressóið (eins og það heitir á Kaffitári) tilbúið og dökka belgíska súkkulaðið bíður.

Ef skúringafatan væri ekki í Danmörku hefði verið fengið sér í síló ... svona til að setja punktinn yfir i-ið ....

pasta með klettasalati

var með klettasalatspasta í gær, mjög einfalt, soðið spagettí. 100 g klettasalat soðið með síðustu 5 mín, á meðan steiktir 1-2 piparbelgir og slatti af hvítlauk við vægan hita. borið fram með helling af nýrifnum parmaosti. þetta var bara alveg ljómandi gott, fíngert ekki of afgerandi bragð, piparinn var orðinn sætur og alls ekki sterkur, börnin gleyptu þetta í sig og vildu meira.

annars á ég eftir að prófa afturendasítrónukjúklinginn, þó er bjórdollukjúlli fyrr á dagskránni. gætum þurft að gera hann heima hjá hallveigu, þar sem maður þarf lok á grillið fyrir hann :-)

fljótlegt

hér kemur minn fljótlegi réttur, þó ég geti nú ekki slegið helgu út í þeim pakka

Eldsnöggt spaghettí:

Sjóðið spaghettí

á meðan á suðu stendur:

klippið einn pakka af beikoni í ræmur, steikið á pönnu við vægan hita (á ekki að verða stökkt)

hellið einni krukku af salsasósu út á beikonið og hitið að suðu

rífið fullt af parmiggiano yfir pastað þegar það er soðið

hellið sósunni út á

mmmm!

þegar ég nenni ekki að elda

Þetta geri ég þegar ég nenni ekki að elda:

Sýð svosem eins og fjórar lúkur af penne rigatoni (pastarörum).

Mauka 1 mjög þroskaðan tómat, hálfan chili, slettu af ólífuolíu, slettu af balsamico ediki, hvítlauksrif, salt, grófan pipar, basilikum og origano í mixara þangað til þetta er orðið að svona þykkri sósu. Sundum set ég líka parmesanost.

Steiki nokkra sveppi, gulrót og lauk. Sulla tómatsósunni útá og læt malla smá.

Þetta dugir fyrir einn í kvöldmat og hádegismat daginn eftir.

Fyrsti í fjúsjón

Stína kallar þetta fjúsjón mat. Það má. Þetta er fyrir fjóra.

250 gr djúpfryst heil spínatblöð (pakkaspínat)

1 tsk múskat
salt
250 gr kotasæla
2 dl rifinn ostur

sósan
2 gulir laukar
200 gr sveppir
1msk olía
1 dós tómatmauk (eða heilir tómatar í dós eða eitthvað)
1 boulljon teningur með mynd af nauti
2 marin hvítlauksrif
10 grænar ólífur
1 msk þurr basilika
1 msk oreganó

6 lasagne plötur
1 dl mjólk


sko...


1. Þýðið spínatið (t.d. í örbylgjuofni) og blandið því svo saman við kotasæluna (bara í venjulegri plastskál). Kryddið með salti og múskati.

2. Hakkið lauk og sveppi og steikið "létt" upp úr olíu á pönnu. Blandið tómatmaukinu saman við og hvítlauknum auðvitað... -Látið malla í kannski 10 mínútur.

3. Bætið ólífunum við tómatsósuna, kryddið svo með basiliku og óreganói.


síðan...

4. Setjið sitt á hvað kotasælu/spínat og tómatsósuna í smurt ofnfast mót og setjið lasagne plötur á milli laga eða eftir smekk.
5. Setjið rifinn ost yfir. Og síðast, -en ekki síst... -hellið einum dl af mjólk yfir allt saman !

6. Inn í 225 gráðu heitan ofn í a.m.k 30 mínútur, -eða þangað til þetta lítur út eins og gott fjúsjón spínatlasagna.