kjúklingur í hvítvíni, salvíu og beikoni

Átti nokkrar pylsumeistara-beikonsneiðar í afgang síðan um daginn og salvíu sem ég var ekki nógu dugleg að vökva í eldhúsglugganum og var farin að þorna og fór því í uppskriftaleit á netinu. Fann enga sem hentaði mér algjörlega svo þessi er staðfærð úr nokkrum uppskriftum. Mjög gott! Hér er uppskriftin:

8 kjúklingalæri (það væri örugglega allt í lagi að velta bitunum upp úr hveiti! prófa það næst)
3 hvítlauksgeirar smátt saxaðir (væri ekki verra að vera líka með niðurskorinn skalottulauk.. prófa það næst! ;) )
2 msk góð ólífuolía
2 msk smjör
salt og pipar
150 ml þurrt hvítvín
250 ml kjúklingasoð (úr hálfum góðum teningi)
150 gr beikon saxað smátt
nokkur blöð af ferskri salvíu (10-15 eftir stærð) saxaðri gróft
3 msk nýkreistur sítrónusafi
1 tsk hlynsíróp

Meðlæti: risotto, polenta eða pasta t.d. tagliatelle

Bræðið smjörið saman við olíuna, stillið á miðlungshita og svitið hvítlaukinn í nokkrar mínútur. Saltið og piprið kjúklingalærin og steikið í hvítlauksolíunni í 8 mínútur á skinnhliðinni og 5 mínútur á hinni. Hellið svo hvítvíninu og soðinu yfir og látið sjóða niður í nokkrar mínútur. Veiðið kjúklinginn upp úr og hellið megninu af vökvanum af pönnunni í ílát og geymið, brúnið svo beikonið og salvíuna upp úr afgangnum af vökvanum á pönnunni í nokkrar mínútur.

Setjið lærin aftur á pönnuna, brúnið í 2-3 mín og setjið svo vökvann yfir. Látið malla í klukkutíma við lágan hita með lokið á, þó þannig að það sé svolítil rifa á milli.

Þegar kjúklingurinn er fulleldaður, veiðið hann þá upp úr, skellið sítrónusafanum og hlynsírópinu út á pönnuna og hrærið saman við sósuna. 

Undirbúið meðlætið, ef þið notið pasta eins og ég gerði, er gott að velta pastanu upp úr vökvanum á  pönnunni áður en rétturinn er borinn fram. Berið fram með nýrifnum parmigiano osti.

Eggjanúðlur með svínakjöti, hvítkáli og grænmeti

Fífu langaði í núðlur í kvöld þannig að við hættum við að fara út í fiskbúð og keyptum smá inn í Krónunni í staðinn. Slatti var til af grænmeti þannig að litlu þurfti að redda.

Elduðum fyrir okkur fimm:

2 pakkar af eggjanúðlum
600 g svínahnakki
1 lítill hvítkálshaus (minnsti sem við fundum)
2 grænar paprikur
10 meðalstórir sveppir
1/2 laukur
handfylli af sesamfræjum ef vill
3 msk hitaþolin olía
lítil krukka hoisin sósa

Svínakjötinu skellt í frysti í kortér svo auðveldara sé að steikja, á meðan er grænmetið skorið í þunna strimla.

Sesamfræ þurrristað á pönnu

Vatn sett yfir til að sjóða núðlurnar.

Kjötið skorið í þunna strimla, ca sentimetra á þykkt.

Stór panna hituð mjög vel, þá er helmingi olíunnar hellt á pönnuna og þegar fer að rjúka úr brúnunum er kjötið veltisteikt þar til það er brúnt á öllum hliðum, um ein og hálf mínúta við hæsta hita. Kjötið tekið af pönnunni, hún hituð aftur, restin af olíunni sett á pönnuna, sveppir, laukur, paprika og helmingur kálsins settur út á. Nokkuð passlegt þarna að sjóða núðlurnar eftir leiðbeiningum á pakka.

Veltisteikt þar til byrjar að mýkjast og brúnast, þá er restin af kálinu sett saman við og steikt í 2-3 mínútur í viðbót eða þar til allt er orðið fagurbrúnt. Kjötið sett saman við, hoisin sósan líka, hrært vel í gegn og hitað aðeins.

Lykilatriði í steikingunni er að alltaf sé mjög góður hiti undir pönnunni og ekki sé of mikið sett á hana í einu (sérstaklega kjötið - það slapp samt alveg enda er ég með eina gashellu með ofurhita).

Borið fram með núðlunum og sojasósu eða meiri hoisin sósu ef vill. Stráið sesamfræjunum yfir ef vill.

Þetta var ALLT OF MIKILL MATUR fyrir okkur fimm. Dugar vel í hádegismat á morgun líka...
Enginn vandi er að breyta þessu í grænmetisrétt, bara sleppa svíninu. Örugglega gott. Vegan ef notaðar hrísgrjónanúðlur í stað eggjanúðla.

óelduð pizzasósa

mér finnst oft eins og það komi svolítið "processed" bragð af pizzasósu ef maður eldar hana eins og venjulega marinara sósu, eða venjulega ítalska tómatsósu. Því fór ég að kynna mér svokallaða óeldaða pizzasósu og er ekki frá því að mér finnist mun betra að gera þannig sósu fyrir heimagerða pizzu. Hún er auðvitað ekki óelduð, niðursoðnu tómatarnir hafa auðvitað verið eins og liggur í nafninu "soðnir niður" og svo eldast sósan auðvitað á pizzunni sjálfri. En mér finnst þetta mun fersklegra en sósa sem maður lætur sjóða niður, jafnvel í langan tíma eins og margir gera. Ef við værum með ferska tómata snéri dæmið auðvitað öðruvísi við! En hér er sósan sem ég er búin að vera að laga að okkar smekk síðustu nokkur skipti sem ég hef bakað pizzu heima:

hálf flaska passata (hér mætti auðvitað nota hágæða niðursoðna tómata sem maður myndi mauka, gott væri þá að hella slatta af vökvanum frá fyrst)
1 lítil dós tómatpúrra
2-3 hvítlauksgeirar pressaðir
1 tsk þurrkað oregano (eða 1 msk ferskt ef maður á það)
1/2 tsk laukduft (má sleppa)
1 tsk maldon salt
nokkrir snúningar nýmalaður svartur pipar
1/2 tsk sykur
1 msk hágæða extra virgin ólífuolía
1 tsk hágæða balsamik edik
2-3 msk niðursöxuð fersk basilika.

öllu blandað saman og svo bara skellt á botninn áður en áleggið fer á! uppáhalds hjá okkur er þunnt skorinn rauðlaukur og mozzarella sneiðar, pizzan bökuð og svo er eftirá sett parmaskinka, klettasalat, parmigiano flögur, meiri svartur pipar og nokkrir dropar í viðbót af ólífuolíunni góðu.

Appelsínukjúklingur

Gamall uppáhaldsréttur hér á bæ, settur inn skv forvitnisbeiðni:

50 g smjör

25 g möndluflögur (má alveg vera meira)

1 kg kjúklingabitar. Nota ekki bringur í þennan.

salt

pipar

paprika

3 appelsínur

Bræðið helminginn af smjörinu og ristið möndlurnar við góðan hita þar til brúnar. Ilma gersamlega ómótstæðilega.

Kryddið kjúklinginn með salti, pipar og papriku. Steikið í afgangi smjörsins á öllum (tja báðum) hliðum. Leggið lok á pönnuna, lækkið hitann og steikið áfram í hálftíma (eða þar til bitarnir eru nærri gegnsteiktir). 

Á meðan, pressið safann úr tveimur appelsínanna, takið börkinn af þeirri þriðju og hreinsið mest af hvíta ruglinu af bátunum. Setjið safann og bátana saman við kjúklinginn á pönnunni og hitið vel í gegn, ca 5 mínútur. 

Berið fram með hrísgrjónum og stráið möndluflögunum yfir. 

Voðalega góð fiskisúpa

Suðum súpuuppskrift (já og súpu auðvitað) upp úr nokkrum uppskriftum á vefnum. Fundum enga kókoskarrífiskisúpu sem okkur leist alveg nákvæmlega nógu vel á og ákváðum að púsla.

Í hana fór:

1 lítri vatn
1 laukur
3 gulrætur
2 hvítlauksrif
1 lítil dós tómatkraftur
smjör til steikingar
1 tsk karrí
1 dl hvítvín
1 bréf humargrunnur (svona Tasty humar sósu- og súpugrunnur)
1 stór dós kókosmjólk (bara þykki parturinn sem situr efst í dósinni ef maður opnar án þess að hrista)
2 dl rjómi
salt
pipar
1 rauð paprika
2 góðir laxabitar
poki af smárri hörpuskel

Laukur, gulrætur og hvítlaukur saxað frekar gróft. Smjör brætt á pönnu, karrí sett saman við. Laukurinn og gulræturnar steikt í 3-4 mínútur í karrísmjörinu við meðalháan hita, þá er hvítlauknum og tómatkraftinum bætt saman við og látið malla smástund við vægan hita. Skellt í pott, vatni, hvítvíni og humarsoði bætt við. Suðan látin koma upp og svo soðið í 15 mínútur undir loki við lægsta hita.

Á meðan, skera laxinn og paprikuna í fremur smáa bita.

Þegar 15 mínúturnar eru liðnar, setja kókosrjómann og rjómann saman við, hræra vel og smakka til með salti og pipri. Paprikan sett saman við og soðið í 3-4 mínútur.

Þá er fiskinum bætt saman við og suðan látin koma upp. Ekki láta sjóða neitt eftir það, ætti alveg að duga til að elda fiskinn.

Bárum fram með þessu súrdeigsbrauð ættað frá Sandholti en keypt í uppáhaldsbúðinni, Frú Laugu á Óðinsgötu. Og alvöru smjör, játakk!

Meira að segja fiskihatara heimilisins þótti súpan góð og fékk sér meira. Gæti ekki fengið betra hrós. Hefði dugað fyrir svona 8 manns - við eigum afgang í hádegismat á morgun!

gazalega góð gulrótarsúpa

Bullaði þessa upp úr nokkrum uppskriftum sem ég fann.. örugglega einhverjar þarna úti mjög líkar! Hún var mjög góð, en næst ætla ég að bæta við 1/4 tsk chili dufti.

1 msk góð olía
1 laukur saxaður
3 hvítlauksrif söxuð fínt
1 cm engiferrót söxuð fínt
1 tsk túrmerik
1/2 tsk broddkúmen (cummin)
1/2 tsk malað kóríander

5 stórar gulrætur niðursneiddar
1 meðalstór sæt kartafla skorin í bita

1 l sjóðandi vatn og tveir grænmetisteningar (helst rapunzel eða annar góður lífrænn)

1 stór og 1 lítil dós kókosmjólk (má vera ein stór, átti bara þessa litlu líka. Eins mættu vera 2 dósir, en minnkið þá vatnið á móti)

maldon salt og pipar

ferskt kóríander til að strá yfir

Steikið laukinn, hvítlaukinn, engiferið og kryddin í olíunni í nokkrar mínútur í þykkbotna potti. Setjið allt sem  eftir er í pottinn, hitið að suðu og látið malla í hálftíma. Maukið súpuna með töfrasprota eða í smáskömmtum í blandara og smakkið til með salti og pipar.

Berið fram með fersku niðursöxuðu kóríander og góðu brauði.

Kálfapottréttur

Keyptum kálfagúllas í Frú Laugu um daginn (hlakka ekki smá til að fá Laugu litlu hér á Óðinsgötuna) án þess að vita svo sem hvað við ætluðum að gera við það. Eitthvað smá vorum við búin að brjóta heilann en svo datt inn uppskrift á allrecipes.com sem ég birti hér án þess að skammast mín hætishót.

1 kg kálfagúllas
1 meðalstór laukur, saxaður
2 hvítlauksrif (má vera meira)
smjörbiti til að steikja upp úr (þeir segja olía, við notuðum smjör)
dós af tomato sauce eða cassata
1/2 bolli hvítvín
salt og pipar

Bræðið smjörið í stórum potti. Mýkið lauk og hvítlauk í smjörinu án þess að brúna of mikið. Bætið kjötinu í pottinn og brúnið allar hliðar.

Hellið tomato sauce/cassata (vonlaust að nota orðið tómatsósa) og víninu saman við, kryddið með salti og pipri að vild. Lækka hitann niður í lægsta og láta malla undir loki í einn og hálfan klukkutíma eða þar til meyrt.

Og meyrt var það!

Bárum þetta fram með kartöflustöppu bragðbættri með matskeið af dijonsinnepi. Talað um núðlur í allrecipes uppskriftinni en ég held að stappan passi betur.

Mæli annars með síðunni, við höfum fundið alveg fullt af góðum uppskriftum þar.

Rauðspretta með brúnu sítrónusmjöri

Þessi tilraunaréttur var óvart tekinn um daginn þegar steinbíturinn/hlýrinn sem við ætluðum að hafa í matinn fékkst ekki hér á Freyjugötunni. Sló í gegn.

Samkvæmt uppskriftinni á að vera fiskur sem heitir lemon sole (þykkvalúra á íslensku) en hann var svosem ekki til heldur. Rauðsprettan var fín.

4 flök rauðspretta
3 msk hveiti
1/2 tsk salt
nýmalaður svartur pipar, (notuðum reyndar hvítan)
1 1/2 msk sólblómaolía
45 g smjör í bitum
safi úr 1/2 sítrónu
1 msk söxuð steinselja
1 msk smár kapers

Beinhreinsið fiskinn ef þarf.

Blandið saman hveiti, salti og pipar og dreifið á disk. Húðið fiskflökin með hveitinu.

Hitið olíuna vel á stórri pönnu. Lækkið niður í meðalhita og steikið 1-2 mínútur á hlið eða þar til fiskurinn er gullinbrúnn. Snúið við og endurtakið við hina hliðina. Takið af pönnunni og vefjið í álpappír til að halda heitu.

Bræðið smjörið á pönnunni og brúnið létt. Takið af hitanum og blandið sítrónusafanum, kapersi og steinselju saman við. Setjið fiskinn aftur á pönnuna, ausið smá af sítrónusmjörinu yfir og berið fram.

Uppskriftin frá henni Rachel Khoo og fengin hér með smábreytingum.

Langeldaðir lambaskankar á norður-Afrískan máta

Eitt af uppáhaldsbloggunum mínum er matarbloggið hans Ragnars Freys, unglæknis í Svíþjóð sem finna má hér : http://blog.pressan.is/ragnarfreyr/

Hann er líka á facebook sem The doctor in the kitchen og þar fór hann að tala um að hafa eldað lambaframpart með norður-Afrísku sniði og þar sem við féllum fyrir líbananum okkar í Barcelona langaði mig að elda einhvernveginn þannig mat um helgina.

 Hann setti uppskriftina ekki á bloggið sitt en var svo indæll að gefa mér hana upp á fb síðunni, ég fékk svo leyfi hans til að henda henni hér inn, svo það verði auðvelt að finna hana. Þetta var alveg hreint stórkostlega bragðgott og ég mæli með þessu! þetta er semsagt hans uppskrift með einni örlítilli viðbót frá mér. Kúskúsið og sósan eru aftur á móti mínar uppskriftir :)

En hér kemur uppskriftin:

kjötið:
2 lambaskankar eða 1 frampartur
olía og maldonsalt
kryddblanda: 1 msk kóríanderfræ, 1 msk cumminfræ (broddkúmen) og 1 tsk súmak
2 laukar
3 hvítlauksrif
3 gulrætur
2 sellerístönglar
handfylli af þurrkuðum döðlum
3 þurrkaðar kardimommur, létt barðar
3 stk kanilstangir
200 ml vatn

Kveikið á ofninum á 170° og takið til ofnpott með loki.

Saxið grænmetið gróft og setjið í botninn á pottinum, bætið svo kanilstöngunum og kardemommunum við. Lambaskankarnir makaðir með olíu og saltaðir, ristið kóríander- og cumminfræin á pönnu og útbúið svo kryddblönduna með því að mylja ristuðu fræin í morteli og blandið svo við súmakið.

Þessu er makað á kjötið, það lagt ofan á grænmetið í pottinum, vatninu bætt í pottinn, lokið sett á og inn í ofn í 3 1/2-4 klukkutíma (fer eftir magni kjötsins). Þegar klukkutími er eftir af suðutímanum er döðlunum bætt í pottinn.

Þegar kjötið er tilbúið er það tekið upp úr pottinum, kanilstangirnar og kardemommurnar fjarlægðar og grænmetið, döðlurnar og vatnið maukað saman með töfrasprota eða í matvinnsluvél til að búa til döðlusósu með kjötinu.

Marokkóskt kúskús:
1 bolli kúskús
1 1/4 bolli vatn
1 tsk salt
1/2 tsk túrmerik
1/4 tsk kanill
1/4 tsk cummin
1/4 bolli rúsínur
1/4 bolli furuhnetur, ristaðar
1 msk smjör

 Setjið vatnið, smjörið, kryddið, saltið og rúsínurnar saman í pott og látið suðuna koma upp. Blandið þá kúskúsinu saman við, setjið hneturnar út í og lokið á í 5 mínútur. Flöffið svo kúskúsið upp með gaffli og berið fram.

 Jógúrtsósa:

1 dós jógúrt og smávegis sýrður rjómi eða lítil dós grísk jógúrt
2 hvítlauksrif marin
1 tsk cumminduft
1 tsk hlynsíróp
sítrónusafi
1 tsk tahini (má sleppa)

Blandið öllu saman og smakkið til með salti.
Mæli með að gera sósuna fljótlega eftir að kjötið fer í ofninn, það er alltaf betra ef sósur fá að brjóta sig aðeins.

spakettí með laxi og blaðlauk

Tilraunaréttur áðan og tókst svona líka ljómandi vel. Hlakka strax til að borða afganginn í hádeginu á morgun:

500 g spakettí
2 blaðlaukar, ljósi hlutinn
smjör til steikingar
safi úr einni sítrónu
1 1/2 dl rjómi
1 msk dijonsinnep
300 g. lax (átti reyndar silung, ekki verra)
salt
chilipipar

Skerið blaðlaukinn í sneiðar og látið malla við vægan hita á pönnu í smjörinu í 5-6 mínútur. Á meðan laukurinn mallar, sjóðið spakettí eftir leiðbeiningum á pakka. Setjið sítrónusafa, rjóma, dijonsinnep og chilipipar saman við og hitið að suðu, Skerið laxinn/silunginn í fremur litla bita (daninn myndi segja mundrette bidder í sínum uppskriftum en mér finnst asnalegt að skrifa munnbita), setjið saman við sósuna og sjóðið þar til fiskurinn er rétt orðinn ljós í gegn, alls ekki of lengi.

Hellið af pastanu, sósuna yfir og njótið.

indverskur smjörkjúklingur

jámm bein þýðing á Indian Butter Chicken, unglingurinn minn, rétt ófarinn til New York í mánuð (og svo væntanlega Suðurameríku mánuði seinna) bað um indverskan mat og ég lagðist í gúgul.

Þetta fannst. Og fer beint á uppáhaldslistann.

Smá breytingar samt:

50 g smjör, skipt í tvo helminga
2 laukar, saxaðir
3 hvítlauksrif, söxuð
1 dós hakkaðir tómatar (notaði hálfa flösku af passötu)
1 peli rjómi
1 lítil dós kókosmjólk
1 tsk salt
1 tsk cayennepipar eða chilipipar
1 tsk garam masala

750 g kjúklingabringur
2 msk matarolía, helst bragðlítil
2 tsk tandoori masala (tandoorimauk)

Hita ofninn í 190°
Bræðið helminginn af smjörinu á pönnu. Setjið lauk og hvítlauk út á og látið malla við vægan hita í hálftíma eða þar til vel brúnn
Á meðan, bræðið restina af smjörinu í potti ásamt rjóma, kókosmjólk, tómatmauki, salti, cayenne/chilipipri og garam masala. Látið malla í hálftíma við lægsta hita, hrærið af og til.
Skerið kjúklingabringur í passlega munnbita, þekið með olíu og tandoorimauki (setti allt í plastpoka og nuddaði saman). Raðið á plötu með bökunarpappír og steikið í ofninum, ekki lengur en 12 mínútur (mikilvægt).
Hrærið lauk og kjúklingabitum saman við sósu og berið strax fram.

Berið fram með hrísgrjónum og ekki verra að hafa naanbrauð með.

rósmarín- og hvítlaukspasta

Þessi sló í gegn hjá okkur, fyrir utan svolítið smjör er hann fullkominn til að vega upp á móti öllum steikunum.

Upprunaleg uppskrift hér.

6 msk smjör
2 meðalstórir laukar, fínt saxaðir
6 hvítlauksrif, fremur gróft söxuð
1 bolli kjúklingasoð
2 msk saxað ferskt rósmarín
500 g spakettí (á myndinni sem fylgir upprunalegu uppskriftinni er skrítnasta spakettí sem ég hef séð)
salt og pipar
nýrifinn parmaostur

Bræðið 4 msk af smjörinu á pönnu við vægan hita. Brúnið laukinn vel (um 10 mínútur). Bætið hvítlauk saman við og steikið áfram í 2 mínútur eða svo. Setjið kjúklingasoð og rósmarín saman við, hækkið hitann og sjóðið niður um þriðjung (5-6 mínútur hjá mér).

Á meðan, sjóðið spakettíið skv leiðbeiningum á pakka.

Þegar hvort tveggja er soðið, hellið pastanu í skál, setjið restina af smjörinu saman við ásamt parmaosti, hrærið þar til bráðið. Sósan fer saman við og njótið.

heitt súkkulaði

Var í dag að lesa blogg hjá frægum matarbloggara í Ameríkunni hvar hún var að kenna fólki að búa til heitt súkkulaði og lýsa því hvað litlir súkkulaðikekkir í drykknum væru nú æðislegir. Sem segir mér bara eitt - hún kann ekki að laga alvöru súkkulaði.

Það má auðvitað fara eftir notkunarreglunum á Síríuspökkunum en mér hefur reynst best eftir nokkrar tilraunir að nota þessa aðferð:

1 lítri mjólk (nýmjólk er góð, léttmjólk dugar fínt, rjómabland er dekadens)
200 g Síríus suðusúkkulaði, má gjarnan nota 56 eða 70% ef endilega vill
hnífsoddur af salti (skylda)
vanilla ef vill

Hitið mjólkina að suðu. Setjið salt og vanillu (ef notað) saman við.
Bræðið súkkulaðið, örbylgjuofn er í fína lagi, eða þá skál yfir vatnsbaði. Bara passa að ofhita ekki súkkulaðið, ágætt að hita þannig að enn séu óbráðnir bitar, hræra síðan í og láta bráðna súkkulaðið um að mýkja afganginn.

Hellið lítilli ausufylli af heitu mjólkinni saman við súkkulaðið og hrærið vel. Ekki fara í panikkast ef súkkulaðið þykknar illilega, bara hræra áfram og bæta meiri mjólk saman við, þetta mun á endanum (eftir svo sem 2-3 mjólkurviðbætur) verða mjúkt og fljótandi. Þá er í lagi að hella súkkulaðinu saman við mjólkina.

Ekkert vera að hita blönduna meira, það er ekkert gott að brenna sig á tungunni, súkkulaðið er best um 60-70°


Heitt kakó, já ég treysti mér til að búa til kakó sem slær út heita súkkulaðið hjá 90% kaffihúsa á landinu og þó víðar sé leitað. Trikkið er að nota jafnmikið af kakódufti og sykri, ekki 3/4 sykur og 1/4 kakó eins og lýst er í þeim uppskriftum sem ég hef fundið á netinu. 0.75 dl kakó plús 0.75 dl sykur í lítra af mjólk er fínt, sama með sykur og vanillu og lýst er í súkkulaðiuppskriftinni. Hita mjólkina, hrista saman sykur, kakó, salt, vanillu og nægilegt vatn til að búa til hellanlega blöndu, Ef vill má setja chili eins og í Mexíkó. Bara best.

píadínur

Uppáhalds ítalski skyndibitinn okkar, ættaður frá Emilia Romagna. Þaðan kemur líka tagliatelle bolognese sem hér hefur áður birst, alveg bara besti pastaréttur í heimi imnsho.

450 g hveiti (helst durumríkt, notum yfirleitt Pillsbury's, það dugar þó til séu betri)
110 g svína- eða andafita
smá salt
2-3 dl volgt vatn

Feitin og hveitið mulið saman ásamt salti, hraukað upp og laut búin til í miðju hrúgunnar, um 1 dl af vatninu hellt saman við og hnoðað. Vatni bætt við eftir þörfum, þar til deigið hættir að loða við hendurnar.

Deiginu skipt í 12 hluta, hver hluti flattur út og steiktur á sléttri pönnu (við erum með sérstaka píadínupönnu en það má vel steikja þetta á pönnukökupönnunni - ég hugsa að það fari ekki með viðloðunina á pönnunni). Steikt við miðlungshita þar til brúnir flekkir hafa myndast, yfirleitt myndast bólur á kökunum og þá er passlegt að snúa þeim við.

Við erum yfirleitt með tvenns konar fyllingar, annars vegar parmaskinku, mozzarella og klettasalat og hins vegar gullost og hunang, en auðvitað má setja allt sem hugurinn girnist í kökurnar. Fyllingin er sett á helming kökunnar, hinn brotinn yfir og kakan steikt í 3 mínútur (eða þar til osturinn er bráðinn) undir loki á lægsta hita.

kryddað pastasalat

bjó til ansi gott pastasalat í kvöld, ættað frá Pioneer Woman í Ameríkunni.

Í það fóru:

500 g pastaskeljar
1/2 bolli mæónes (notaði nú bara Gunnars þó matarskríbentarnir í Fréttatímanum telji það ekki mæónes)
1/4 bolli léttmjólk (hún segir nýmjólk en ég átti ekki)
4 msk borðedik
1 1/2 tsk piparsósa
1/2 tsk salt
svartur pipar
1 bakki kirsuberjatómatar skornir í helminga á lengdina
250 g gouda skorinn í bita (átti að vera reyktur en svoleiðis fæst ekki svo glatt hér)
24 heil basilblöð

Sjóðið pastað og kælið undir kalda krananum.

Klippið baslið í ræmur.
Blandið saman mæónesi, mjólk, ediki, salti, pipar og piparsósu.

Hrærið saman pasta, tómötum og ostbitum í stórri skál, hellið sósunni yfir ásamt basli og látið standa í ísskáp í amk. klukkutíma.

Virkaði fínt sem (semi)léttur kvöldmatur hér á bæ, ásamt hvítlauksbrauði en væri örugglega líka hörkufínn í samskotapartí.

Hér er upprunalega uppskriftin.

Dásamlegur kryddjurtakjúklingur

4 kjúklingabringur
1 tsk allrahanda
1/2 tsk cayennepipar
1 tsk kanill
2 fínsaxaðir vorlaukar
2 greinar timjan
1-2 msk muscovadosykur eða púðursykur
1 msk matarolía
límónusafi eftir smekk/límónubátar til skrauts
ferskur kóríander til skrauts
maldonsalt

4 dl basmatigrjón
1 tsk chiliflögur
2 saxaðir vorlaukar
4 dl kókosmjólk
4 dl vatn
1 tsk salt

Blandið saman öllu kryddinu, sykrinum og lauknum, nuddið
kjúklingabringurnar vel upp úr blöndunni. Grillið kjúklinginn í ca 6
mínútur á hlið, eða þar til fulleldaður. Berið fram með límónubátum,
kóríander og kókosgrjónum

grjón:

Setjið grjónin, chiliflögurnar, laukinn og kókosmjólkina og vatnið saman í pott. Saltið og sjóðið eftir leiðbeiningum á pakka eða þar til grjónin eru meyr.

marineraðir bananar

skv pöntun:

50 g smjör
2 msk púðursykur
2 msk sítrónusafi
4 bananar (alls ekki óþroskaðir!)
2 msk koníak (má sleppa)

Rjómi eða ís

Stillið ofninn á 180° Bræðið smjör og púðursykur í ofninum í eldföstu fati. Skerið banana í sneiðar á ská og veltið vel upp úr smjör/sykurblöndunni. Bætið koníaki í ef vill. Bakið í ofni í 20 mínútur.

Berið fram með vanilluís eða þeyttum rjóma. Gamall klassíker hér á bæ úr uppskriftabók sem er að verða komin í frumeindir sínar. Séu bananarnir of grænir er hægt að skipta þeim út fyrir hráar kartöflur þannig að það er best að passa upp á þá. Vorum með þetta í matarboði um daginn, einn bananinn þroskaður en hinir svolítið grænir. Stöku biti var æðislegur en hinir voru hreint ekki góðir. (Efast um að ég hefði fengið beiðni um uppskrift ef það hefðu bara verið þeir grænu...)

cassoulet

enn af lúxusmatnum.

Við höfum gert þennan suðurfranska landrétt áður en þá með lambakjöti, já reyndar mjög ólíka uppskrift (spurning um jafnvel að henda henni líka inn, sú hentar eiginlega betur hérlendis) en ég lofaði að setja þessa útgáfu hér.

500 grömm haricots blancs eða smjörbaunir - ef ekki úr dós þarf að leggja þær í bleyti daginn áður og skola síðan og sjóða
Hæfilega mikið svínakjöt, miðað við fyrir hve marga skal eldað
Confit de canard, (kanarífuglakonfekt upp á íslenskuna) einn skammtur á matargest
Toulouse svínapylsur (eða aðrar góðar pylsur) ein á mann
2 dósir af niðursoðnum tómötum
5 hvítlauksrif
1 lítil dós tómatkraftur
Chorizopylsa (eða sambærileg), 15 cm ef þumalþykk pylsa, 2 cm ef úlnliðsþykk, smátt skorin
10 muldir negulnaglar (alveg nauðsynlegt samkvæmt uppskriftarhöfundi á netinu, ekki endilega standard í suðurfrakklandi)
salt og pipar

Ekki veit ég hve marga kjötskammta er ætlast til að hver borði. En svo sem ekki slæmt að eiga afgang...

Skerið svínakjötið í bita og steikið í smá af andafeitinni úr dósinni í stórum potti (reikna ekki með að neinn hér nenni að standa í að sjóða niður andalæri sjálfur).

Bætið baunum, chorizopylsu, tómötum og tómatkrafti, hvítlauk, salti, pipri og muldum negulnöglum saman við. Fyllið upp með vatni þar til flýtur nokkurn veginn yfir. Komið upp suðu, setjið lok á pottinn og látið malla í klukkutíma eða svo.

Á meðan, steikið pylsurnar, einnig í smá andafeiti. Stillið ofninn á 180°

Þegar klukkutíminn er liðinn (eða þegar svínakjötið og baunirnar eru fullsoðnar), bætið við vatni ef þarf (þurftum ekki), setjið pylsurnar ofan á og þar fyrir ofan andalærin. Setjið í ofninn og hitið í hálftíma eða svo.

Berið fram með góðu brauði, fullkomið

dúkan

Fann þennan marokkóska rétt í ókeypis blaði í Ástralíuvél, reif blaðsíðuna úr blaðinu og geymdi, nánast orðið ár síðan þá og loksins komst í verk að prófa.

Skemmst frá því að segja að þetta verður gert aftur. Og aftur.

Þetta er hvorki dýrt né snúið, en maður þarf að hafa tímann fyrir sér því kjötið tekur góða stund í ofninum. Má líka standa yfir nótt í marineringunni þó við gerðum það reyndar ekki í dag.

1 lambabógur, um 2 kíló
150 grömm smjör, mjúkt
1 msk salt (hljómar mikið en það er síðan ekkert salt í meðlætinu) - Aths. Var víst bara sett teskeið. Það var feikinóg...
1 tsk mulinn svartur pipar (notuðum reyndar hvítan, kom ekki að sök)
1 msk cumin

Fitusnyrtið kjötið. Blandið saman mjúku smjörinu og kryddinu og makið kjötið með því. Vefjið síðan bóginn í álpappír, eins þétt og þið getið. Leyfið að standa í amk. klukkutíma (við stofuhita) eða yfir nótt í ísskáp.
Þegar marineringu er lokið setjið bóginn í stórt eldfast fat með loki, leyfið að ná stofuhita ef það var í ísskáp. Ekki taka álpappírinn af. Hellið könnu af vatni yfir, (ég notaði 1/2 lítra). Hitið ofninn í 180° gráður. Setjið fatið í ofninn og leyfið að steikjast í 2 1/2 klukkustund. Takið síðan álpappírinn af og lokið af fatinu, setjið aftur inn í ofninn og leyfið að brúnast í hálftíma til. Gott er að athuga hvort kjötið er tilbúið með því að snúa beininu örlítið, það á að losna auðveldlega frá kjötinu. Ef það gerist ekki, hafið þá kjötið lengur inni.

Meðan kjötið er í þessum síðasta fasa, undirbúið meðlætið:

300 g basmati hrísgrjón
600 ml vatn
50 g pistasíur án skelja
6 negulnaglar
50 g smjör
1/2 tsk engiferduft
1/2 tsk kanill
1/4 tsk múskat
50 g möndlur án hýðis, léttristaðar og gróft saxaðar
30 g rúsínur lagðar í bleyti smástund (sultanas í uppskriftinni en ég notaði nú bara venjulegar rúsínur)
2 stórir laukar, niðursneiddir og steiktir þar til gullinbrúnir
1 msk hunang

Skolið hrísgrjónin vandlega til að losna við sterkjuna (nenni því eiginlega aldrei en gerði þó í dag). Setjið í pott ásamt vatninu, lok á pottinn, komið upp suðu og lækkið. Sjóða við lægsta hita í 12-14 mínútur og slökkva síðan undir. Ekki opna pottinn á meðan á suðu stendur.

Á meðan grjónin sjóða, steikja laukinn í smá smjöri, setja til hliðar, hakka möndlurnar. rista möndlur og pistasíur á pönnu í 1-2 mínútur, setja negulnaglana á pönnuna og steikja í smástund í viðbót. Þá er smjöri og kryddi bætt á pönnuna og blandað vel saman, þá er lauk, hunangi og rúsínum blandað saman við. Lok sett á pönnuna og leyft að standa í 5-10 mínútur.

Hrísgrjónin ættu nú að hafa sogið í sig allt vatn. Hrærið í þeim með gaffli og setjið síðan lauk- og pistasíu/möndlublönduna saman við og blandið vel saman.

Berið fram með lambinu og soðinu úr fatinu (gott að fleyta mestu feitinni ofan af soðinu, það er vel feitt).

Kjötið var ótrúlega meyrt og gott, ég á ekki eftir að elda lambabóg öðruvísi en með þessari aðferð héðan í frá. Krakkarnir gleyptu í sig bæði kjöt og grjón með góðri lyst.

humar risotto

Gerði rosa gott humar-risotto í kvöld.

Fyrst gerði ég humarsoð úr skeljunum, uppskriftin er frá Nönnu Rögnvaldar:

brúnið skeljarnar lítillega í olíu, saxið gróflega hálfan lauk(með hýðinu), eina gulrót og einn sellerístilk og steikið með í nokkrar mínútur. Setjið saman við tvær greinar af timian, eitt lárviðarlauf, vel af salti og nýmöluðum pipar og einn lítra af sjóðandi vatni. Sjóðið í hálftíma (ekki lengur, þá kemur beiskt bragð af skeljunum), sigtið og geymið.

Þá er komið að risottóinu sjálfu:

Innihald:
1 lítri humarsoð (má auðvitað nota keypt ef fólk nennir ekki að standa í hinu)
1 laukur saxaður
4 skallottulaukar saxaðir (má sosum setja meira af venjulegum, notaði skallottulauk fyrst ég átti hann)
3 hvítlauksrif fínt söxuð
300 gr arboriogrjón
smjör og olía
150 ml hvítvín
nokkrir þræðir saffran
1 bolli rifinn parmigiano reggiano
400 gr humar (skelflettur og skelin notuð í soðið) skorinn í bita.
aukasmjör og olía, sítrónusafi ef vill og smá hvítvínssletta
2 msk söxuð steinselja

meiri parmigiano til að dreifa yfir við borðið.



Mýkið lauk, hvítlauk og skallottulauk í slatta af olíu og smjöri (1-2 msk af hvoru). Setjið grjónin saman við laukinn og hyljið í feitinni. Hellið hvítvíninu saman við og látið sjóða upp af, hrærið stöðugt í á meðan. Myljið saffran þræðina yfir grjónin.

Bætið svo við einni ausu af soðinu í einu, hrærið stöðugt og látið sjóða vel upp af á milli þar til grjónin eru tilbúin, það á ennþá að vera smá "bæt" í grjónunum (tekur ca lítra af soði fyrir 300 gr grjón). Þegar stutt er eftir af grjónunum steikið þá humarbitana upp úr smjöri og smá olíu, kreistið smá sítrónusafa út á og skvettið svolitlu hvítvíni á pönnuna. Hrærið parmigiano ostinum saman við grjónin, blandið svo humrinum (og safanum af pönnunni) saman við, dreifið steinseljunni yfir og berið fram með meiri parmigiano.