Eggjanúðlur með svínakjöti, hvítkáli og grænmeti

Fífu langaði í núðlur í kvöld þannig að við hættum við að fara út í fiskbúð og keyptum smá inn í Krónunni í staðinn. Slatti var til af grænmeti þannig að litlu þurfti að redda.

Elduðum fyrir okkur fimm:

2 pakkar af eggjanúðlum
600 g svínahnakki
1 lítill hvítkálshaus (minnsti sem við fundum)
2 grænar paprikur
10 meðalstórir sveppir
1/2 laukur
handfylli af sesamfræjum ef vill
3 msk hitaþolin olía
lítil krukka hoisin sósa

Svínakjötinu skellt í frysti í kortér svo auðveldara sé að steikja, á meðan er grænmetið skorið í þunna strimla.

Sesamfræ þurrristað á pönnu

Vatn sett yfir til að sjóða núðlurnar.

Kjötið skorið í þunna strimla, ca sentimetra á þykkt.

Stór panna hituð mjög vel, þá er helmingi olíunnar hellt á pönnuna og þegar fer að rjúka úr brúnunum er kjötið veltisteikt þar til það er brúnt á öllum hliðum, um ein og hálf mínúta við hæsta hita. Kjötið tekið af pönnunni, hún hituð aftur, restin af olíunni sett á pönnuna, sveppir, laukur, paprika og helmingur kálsins settur út á. Nokkuð passlegt þarna að sjóða núðlurnar eftir leiðbeiningum á pakka.

Veltisteikt þar til byrjar að mýkjast og brúnast, þá er restin af kálinu sett saman við og steikt í 2-3 mínútur í viðbót eða þar til allt er orðið fagurbrúnt. Kjötið sett saman við, hoisin sósan líka, hrært vel í gegn og hitað aðeins.

Lykilatriði í steikingunni er að alltaf sé mjög góður hiti undir pönnunni og ekki sé of mikið sett á hana í einu (sérstaklega kjötið - það slapp samt alveg enda er ég með eina gashellu með ofurhita).

Borið fram með núðlunum og sojasósu eða meiri hoisin sósu ef vill. Stráið sesamfræjunum yfir ef vill.

Þetta var ALLT OF MIKILL MATUR fyrir okkur fimm. Dugar vel í hádegismat á morgun líka...
Enginn vandi er að breyta þessu í grænmetisrétt, bara sleppa svíninu. Örugglega gott. Vegan ef notaðar hrísgrjónanúðlur í stað eggjanúðla.

óelduð pizzasósa

mér finnst oft eins og það komi svolítið "processed" bragð af pizzasósu ef maður eldar hana eins og venjulega marinara sósu, eða venjulega ítalska tómatsósu. Því fór ég að kynna mér svokallaða óeldaða pizzasósu og er ekki frá því að mér finnist mun betra að gera þannig sósu fyrir heimagerða pizzu. Hún er auðvitað ekki óelduð, niðursoðnu tómatarnir hafa auðvitað verið eins og liggur í nafninu "soðnir niður" og svo eldast sósan auðvitað á pizzunni sjálfri. En mér finnst þetta mun fersklegra en sósa sem maður lætur sjóða niður, jafnvel í langan tíma eins og margir gera. Ef við værum með ferska tómata snéri dæmið auðvitað öðruvísi við! En hér er sósan sem ég er búin að vera að laga að okkar smekk síðustu nokkur skipti sem ég hef bakað pizzu heima:

hálf flaska passata (hér mætti auðvitað nota hágæða niðursoðna tómata sem maður myndi mauka, gott væri þá að hella slatta af vökvanum frá fyrst)
1 lítil dós tómatpúrra
2-3 hvítlauksgeirar pressaðir
1 tsk þurrkað oregano (eða 1 msk ferskt ef maður á það)
1/2 tsk laukduft (má sleppa)
1 tsk maldon salt
nokkrir snúningar nýmalaður svartur pipar
1/2 tsk sykur
1 msk hágæða extra virgin ólífuolía
1 tsk hágæða balsamik edik
2-3 msk niðursöxuð fersk basilika.

öllu blandað saman og svo bara skellt á botninn áður en áleggið fer á! uppáhalds hjá okkur er þunnt skorinn rauðlaukur og mozzarella sneiðar, pizzan bökuð og svo er eftirá sett parmaskinka, klettasalat, parmigiano flögur, meiri svartur pipar og nokkrir dropar í viðbót af ólífuolíunni góðu.

gazalega góð gulrótarsúpa

Bullaði þessa upp úr nokkrum uppskriftum sem ég fann.. örugglega einhverjar þarna úti mjög líkar! Hún var mjög góð, en næst ætla ég að bæta við 1/4 tsk chili dufti.

1 msk góð olía
1 laukur saxaður
3 hvítlauksrif söxuð fínt
1 cm engiferrót söxuð fínt
1 tsk túrmerik
1/2 tsk broddkúmen (cummin)
1/2 tsk malað kóríander

5 stórar gulrætur niðursneiddar
1 meðalstór sæt kartafla skorin í bita

1 l sjóðandi vatn og tveir grænmetisteningar (helst rapunzel eða annar góður lífrænn)

1 stór og 1 lítil dós kókosmjólk (má vera ein stór, átti bara þessa litlu líka. Eins mættu vera 2 dósir, en minnkið þá vatnið á móti)

maldon salt og pipar

ferskt kóríander til að strá yfir

Steikið laukinn, hvítlaukinn, engiferið og kryddin í olíunni í nokkrar mínútur í þykkbotna potti. Setjið allt sem  eftir er í pottinn, hitið að suðu og látið malla í hálftíma. Maukið súpuna með töfrasprota eða í smáskömmtum í blandara og smakkið til með salti og pipar.

Berið fram með fersku niðursöxuðu kóríander og góðu brauði.

Langeldaðir lambaskankar á norður-Afrískan máta

Eitt af uppáhaldsbloggunum mínum er matarbloggið hans Ragnars Freys, unglæknis í Svíþjóð sem finna má hér : http://blog.pressan.is/ragnarfreyr/

Hann er líka á facebook sem The doctor in the kitchen og þar fór hann að tala um að hafa eldað lambaframpart með norður-Afrísku sniði og þar sem við féllum fyrir líbananum okkar í Barcelona langaði mig að elda einhvernveginn þannig mat um helgina.

 Hann setti uppskriftina ekki á bloggið sitt en var svo indæll að gefa mér hana upp á fb síðunni, ég fékk svo leyfi hans til að henda henni hér inn, svo það verði auðvelt að finna hana. Þetta var alveg hreint stórkostlega bragðgott og ég mæli með þessu! þetta er semsagt hans uppskrift með einni örlítilli viðbót frá mér. Kúskúsið og sósan eru aftur á móti mínar uppskriftir :)

En hér kemur uppskriftin:

kjötið:
2 lambaskankar eða 1 frampartur
olía og maldonsalt
kryddblanda: 1 msk kóríanderfræ, 1 msk cumminfræ (broddkúmen) og 1 tsk súmak
2 laukar
3 hvítlauksrif
3 gulrætur
2 sellerístönglar
handfylli af þurrkuðum döðlum
3 þurrkaðar kardimommur, létt barðar
3 stk kanilstangir
200 ml vatn

Kveikið á ofninum á 170° og takið til ofnpott með loki.

Saxið grænmetið gróft og setjið í botninn á pottinum, bætið svo kanilstöngunum og kardemommunum við. Lambaskankarnir makaðir með olíu og saltaðir, ristið kóríander- og cumminfræin á pönnu og útbúið svo kryddblönduna með því að mylja ristuðu fræin í morteli og blandið svo við súmakið.

Þessu er makað á kjötið, það lagt ofan á grænmetið í pottinum, vatninu bætt í pottinn, lokið sett á og inn í ofn í 3 1/2-4 klukkutíma (fer eftir magni kjötsins). Þegar klukkutími er eftir af suðutímanum er döðlunum bætt í pottinn.

Þegar kjötið er tilbúið er það tekið upp úr pottinum, kanilstangirnar og kardemommurnar fjarlægðar og grænmetið, döðlurnar og vatnið maukað saman með töfrasprota eða í matvinnsluvél til að búa til döðlusósu með kjötinu.

Marokkóskt kúskús:
1 bolli kúskús
1 1/4 bolli vatn
1 tsk salt
1/2 tsk túrmerik
1/4 tsk kanill
1/4 tsk cummin
1/4 bolli rúsínur
1/4 bolli furuhnetur, ristaðar
1 msk smjör

 Setjið vatnið, smjörið, kryddið, saltið og rúsínurnar saman í pott og látið suðuna koma upp. Blandið þá kúskúsinu saman við, setjið hneturnar út í og lokið á í 5 mínútur. Flöffið svo kúskúsið upp með gaffli og berið fram.

 Jógúrtsósa:

1 dós jógúrt og smávegis sýrður rjómi eða lítil dós grísk jógúrt
2 hvítlauksrif marin
1 tsk cumminduft
1 tsk hlynsíróp
sítrónusafi
1 tsk tahini (má sleppa)

Blandið öllu saman og smakkið til með salti.
Mæli með að gera sósuna fljótlega eftir að kjötið fer í ofninn, það er alltaf betra ef sósur fá að brjóta sig aðeins.

tómatcrostini

Stel þessu af JSB vefnum án þess að skammast mín hætishót - besta svona brauð sem ég hef á ævi minni smakkað:


Tómatcrostini (fyrir 4)

Hráefni:
1 dós saxaðir niðursoðnir tómatar
4 tómatar
1 búnt ferskt basilikum og örlítið til skrauts
1/2 dl fersk steinselja og örlítið til skrauts
1/2 dl ólífuolía
2-3 hvítlauksrif
1/2 tsk. salt
Svartur pipar
1 stór mozzarellaostakúla eða rifinn góður brauðostur
1 baguette eða 4 lítil ciabatta brauð

Aðferð:
1. Stillið ofninn á grill
2. Hellið niðursoðnu tómötunum í sigti og látið vökvann renna vel af þeim
3. Skerið fersku tómatana í grófa bita
4. Takið fram skál og blandið niðursoðnu tómötunum saman við þá fersku
5. Saxið basilikum og steinselju
6. Setjið basilikum og 1/2 dl af steinselju saman við
7. Skiptið baguette í fernt og kljúfið síðan hvern hleif í sundur
8. Pressið hvítlauksrifin út í ólífuolíuna. Setjið helminginn saman við tómatablönduna og penslið síðan brauðin með afganginum.
9. Grillið brauðin þar til þau verða gullin
10. Saltið og piprið tómatablönduna skiptið henni síðan niður á brauðin
11. Skerið mozzarellaostinn í u.þ.b. 8 sneiðar og raðið þeim ofan á brauðin
12. Grillið það til osturinn hefur tekið lit
13. Raðið á fat eða forréttadiska og stráið steinselju og basilikum yfir

Kúrbítsmakkarónur

Þetta er mjög gott og tekur ekki langan tíma að matreiða.

2 litlir kúrbítar
4 hvítlauksrif
olía
salt
pipar
parmesanostur

makkarónur (ekki svona litlar og fljótsoðnar sem maður setur í typpasúpu, heldur stórar og feitar)

Ég byrjaði á því að setja vatn í pott til að sjóða pastað í.

Maður rífur kúrbítinn með rifjárni. Það er gott að leggja nokkur lög af eldhúspappír undir, pappírinn dregur í sig safann úr kúrbítunum. Svo hitar maður olíu í pönnu (u.þ.b. botnfylli) og steikir hvítlaukinn á meðalháum hita í smá stund (þangað til að hann byrjar að verða brúnn) og setur kúrbítinn á pönnuna. Ég bætti smá olíu við og lét þetta krauma á háum hita til að byrja með en svo meðalháum meðan ég sauð makkarónurnar. Salta og pipra.

Þegar makkarónurnar eru soðnar hellir maður vatninu af og blandar gumsinu saman við, ásamt u.þ.b. 2/3 bolla af parmesanosti. Svo hrærir maður duglega svo osturinn bráðni.

ætiþistlar og hollandaise frá klóri

ætiþistlablöð hér í kvöldmatinn, á morgun á að vera kjúklingaréttur sem með eiga að vera smjörsteikt þistilhjörtu. Keyptum þistlana í dag og þar sem innihaldið úr blöðunum er alger snilld, með hollandaisesósu, ákváðum við að skipta út tortillunum sem áttu eiginlega að vera í kvöld, og prófa að búa til hollandaise from scratch.

Ekki var það nú mikið mál.

Til að undirbúa þistlana, sker maður stilkinn af og örlítið af toppnum (humm, við gleymdum því nú reyndar, veit ekki hvers vegna það þarf að gera það), og þeir eru soðnir í vatni og sítrónusafa (af svona hálfri til einni sítrónu) í 25 mínútur.

Sósan:

175 g smjör
3 stórar eggjarauður
1 1/2 matskeið sítrónusafi (skipt í eina og svo hálfa)
1 msk kalt vatn
1 tsk dijon sinnep
cayenne pipar (hmm held þetta hafi reyndar verið chili)
salt að vild

Bræðið smjörið í potti eða örbylgjuofni við ekki of mikinn hita

Setjið eggjarauður, eina msk af sítrónusafa, vatn og sinnep í blandara eða matvinnsluvél. Þeytið smástund til að blanda vel.

Hellið heitu bræddu smjörinu í mjórri, jafnri bunu saman við, á meðan þeytt er.

Smakkið til með piparnum og saltinu.

Berið þistilhjörtun fram í allri sinni dýrð, leyfið fólki að plokka blöðin utan af. Blöðunum er dýft í sósuna og mjúki, innsti hlutinn borðaður.

Gott er að hafa risastóra skál fyrir rusl - eða tæma oft, þar sem blöðin taka hellings pláss.

Auðvitað má borða hjörtun sjálf (fyrir utan hærða hlutann, efst) með sósunni líka.

Maískólfar í lauksósu

Þessi uppskrift, úr bókinni Curry Lover's Cookbook var prófuð hér í kvöld. Ekki annað um það að segja en að þetta var hrikalega mikið sælgæti. Þurftum að kaupa svolítið af kryddinu til að geta gert þetta, en nú eigum við það...

4 heilir maískólfar, teknir í tvennt (við notuðum frosna hálfa)
olía til steikingar
1 stór laukur
2 hvítlauksrif
5 cm biti af fersku engiferi (þorði ekki, notaði þurrkað)
1/2 tsk túrmerikduft
1/2 tsk laukfræ
1/2 tsk cuminfræ
1/2 tsk fimmkrydd (pae-lo krydd)
6-8 karrílauf (voru ekki til, henti bara smá karríi út í - ekki sama en gott samt)
1/2 tsk hrásykur
200 ml hrein jógúrt
chiliduft eftir smekk

Maukið lauk, hvítlauk, engifer og krydd í mixer, matvinnsluvél eða mortéli.

Steikið maískólfana við góðan hita í olíunni þar til þeir eru farnir að taka lit. Takið kólfana af pönnunni og kælið pönnuna örlítið. Meiri olía sett á pönnuna ef þarf (á að vera um 2 msk. eftir). Sú olía hituð og laukmaukið steikt rólega í 8-10 mínútur, þar til olían skilur sig frá og laukurinn hefur tekið kryddið vel í sig.

Kælið laukblönduna svolítið niður og hrærið jógúrtinni saman við. Setjið maískólfana aftur í sósuna, snúið þannig að þeir séu þaktir sósu eins og hægt er, setjið lok á pönnuna og hitið við mjög vægan hita í 10 mínútur.

Berið fram með naanbrauði og góðum bjór. Það er ekkert salt í uppskriftinni, við vorum með gott salt á borðinu, sumir vildu en aðrir ekki.

uppáhalds yams uppskriftin

eða sætar kartöflur eru yams yfirleitt kallaðar, örlítið ónákvæmt þar sem plantan er alls ekkert skyld kartöflum, mun frekar rófum.

allavega...

Þessi uppskrift birtist í Mogganum í fyrrasumar, ef ég man rétt heitir höfundurinn Brynja. Þannig að ekki vil ég eigna mér hana. En góð er hún og passar með hinu og þessu. Notuðum þetta með grilluðu hrefnukjöti á sunnudaginn var.

Fyrir okkur 5 dugar:

2 stór yams
salt
smá ólífuolía

1 box hvítlauksrjómaostur
1 dós sýrður rjómi

Yams skorið í passlega munnbita, sett í eldfast fat, saltað að smekk og ólífuolíu ýrt yfir. Bakað í ofni við 200° í amk. 40 mínútur eða þar til bitarnir eru alveg mjúkir (hálfhart yams er óætt).

Rjómaosti og sýrðum rjóma hrært saman og hrært saman við bakað yams

Í uppskrift Brynju var þetta með grilluðum hamborgurum en synd að nýta þetta ekki oftar. Hins vegar vantar eiginlega almennilegt nafn yfir þetta fyrirbæri. Tillögur óskast.