brall í bauk

indverskur smjörkjúklingur

2012-01-20T22:47:00.003Z

jámm bein þýðing á Indian Butter Chicken, unglingurinn minn, rétt ófarinn til New York í mánuð (og svo væntanlega Suðurameríku mánuði seinna) bað um indverskan mat og ég lagðist í gúgul.

Þetta fannst. Og fer beint á uppáhaldslistann.

Smá breytingar samt:

50 g smjör, skipt í tvo helminga
2 laukar, saxaðir
3 hvítlauksrif, söxuð
1 dós hakkaðir tómatar (notaði hálfa flösku af passötu)
1 peli rjómi
1 lítil dós kókosmjólk
1 tsk salt
1 tsk cayennepipar eða chilipipar
1 tsk garam masala

750 g kjúklingabringur
2 msk matarolía, helst bragðlítil
2 tsk tandoori masala (tandoorimauk)

Hita ofninn í 190°
Bræðið helminginn af smjörinu á pönnu. Setjið lauk og hvítlauk út á og látið malla við vægan hita í hálftíma eða þar til vel brúnn
Á meðan, bræðið restina af smjörinu í potti ásamt rjóma, kókosmjólk, tómatmauki, salti, cayenne/chilipipri og garam masala. Látið malla í hálftíma við lægsta hita, hrærið af og til.
Skerið kjúklingabringur í passlega munnbita, þekið með olíu og tandoorimauki (setti allt í plastpoka og nuddaði saman). Raðið á plötu með bökunarpappír og steikið í ofninum, ekki lengur en 12 mínútur (mikilvægt).
Hrærið lauk og kjúklingabitum saman við sósu og berið strax fram.

Berið fram með hrísgrjónum og ekki verra að hafa naanbrauð með.

rósmarín- og hvítlaukspasta

2011-12-27T18:22:00.003Z

Þessi sló í gegn hjá okkur, fyrir utan svolítið smjör er hann fullkominn til að vega upp á móti öllum steikunum.

Upprunaleg uppskrift hér.

6 msk smjör
1/2 bolli laukur, fínt saxaður (notaði einn stóran lauk)
6 hvítlauksrif, fremur gróft söxuð
1 bolli kjúklingasoð
2 msk saxað ferskt rósmarín
500 g spakettí (á myndinni sem fylgir upprunalegu uppskriftinni er skrítnasta spakettí sem ég hef séð)
salt og pipar
nýrifinn parmaostur

Bræðið 4 msk af smjörinu á pönnu við vægan hita. Brúnið laukinn vel (um 10 mínútur). Bætið hvítlauk saman við og steikið áfram í 2 mínútur eða svo. Setjið kjúklingasoð og rósmarín saman við, hækkið hitann og sjóðið niður um þriðjung (5-6 mínútur hjá mér).

Á meðan, sjóðið spakettíið skv leiðbeiningum á pakka.

Þegar hvort tveggja er soðið, hellið pastanu í skál, setjið restina af smjörinu saman við ásamt parmaosti, hrærið þar til bráðið. Sósan fer saman við og njótið.

heitt súkkulaði

2011-12-27T01:52:00.003Z

Var í dag að lesa blogg hjá frægum matarbloggara í Ameríkunni hvar hún var að kenna fólki að búa til heitt súkkulaði og lýsa því hvað litlir súkkulaðikekkir í drykknum væru nú æðislegir. Sem segir mér bara eitt - hún kann ekki að laga alvöru súkkulaði.

Það má auðvitað fara eftir notkunarreglunum á Síríuspökkunum en mér hefur reynst best eftir nokkrar tilraunir að nota þessa aðferð:

1 lítri mjólk (nýmjólk er góð, léttmjólk dugar fínt, rjómabland er dekadens)
200 g Síríus suðusúkkulaði, má gjarnan nota 56 eða 70% ef endilega vill
hnífsoddur af salti (skylda)
vanilla ef vill

Hitið mjólkina að suðu. Setjið salt og vanillu (ef notað) saman við.
Bræðið súkkulaðið, örbylgjuofn er í fína lagi, eða þá skál yfir vatnsbaði. Bara passa að ofhita ekki súkkulaðið, ágætt að hita þannig að enn séu óbráðnir bitar, hræra síðan í og láta bráðna súkkulaðið um að mýkja afganginn.

Hellið lítilli ausufylli af heitu mjólkinni saman við súkkulaðið og hrærið vel. Ekki fara í panikkast ef súkkulaðið þykknar illilega, bara hræra áfram og bæta meiri mjólk saman við, þetta mun á endanum (eftir svo sem 2-3 mjólkurviðbætur) verða mjúkt og fljótandi. Þá er í lagi að hella súkkulaðinu saman við mjólkina.

Ekkert vera að hita blönduna meira, það er ekkert gott að brenna sig á tungunni, súkkulaðið er best um 60-70°

Heitt kakó, já ég treysti mér til að búa til kakó sem slær út heita súkkulaðið hjá 90% kaffihúsa á landinu og þó víðar sé leitað. Trikkið er að nota jafnmikið af kakódufti og sykri, ekki 3/4 sykur og 1/4 kakó eins og lýst er í þeim uppskriftum sem ég hef fundið á netinu. 0.75 dl kakó plús 0.75 dl sykur í lítra af mjólk er fínt, sama með sykur og vanillu og lýst er í súkkulaðiuppskriftinni. Hita mjólkina, hrista saman sykur, kakó, salt, vanillu og nægilegt vatn til að búa til hellanlega blöndu, Ef vill má setja chili eins og í Mexíkó. Bara best.

píadínur

2011-11-20T17:24:00.003Z

Uppáhalds ítalski skyndibitinn okkar, ættaður frá Emilia Romagna. Þaðan kemur líka tagliatelle bolognese sem hér hefur áður birst, alveg bara besti pastaréttur í heimi imnsho.

450 g hveiti (helst durumríkt, notum yfirleitt Pillsbury's, það dugar þó til séu betri)
110 g svína- eða andafita
smá salt
2-3 dl volgt vatn

Feitin og hveitið mulið saman ásamt salti, hraukað upp og laut búin til í miðju hrúgunnar, um 1 dl af vatninu hellt saman við og hnoðað. Vatni bætt við eftir þörfum, þar til deigið hættir að loða við hendurnar.

Deiginu skipt í 12 hluta, hver hluti flattur út og steiktur á sléttri pönnu (við erum með sérstaka píadínupönnu en það má vel steikja þetta á pönnukökupönnunni - ég hugsa að það fari ekki með viðloðunina á pönnunni). Steikt við miðlungshita þar til brúnir flekkir hafa myndast, yfirleitt myndast bólur á kökunum og þá er passlegt að snúa þeim við.

Við erum yfirleitt með tvenns konar fyllingar, annars vegar parmaskinku, mozzarella og klettasalat og hins vegar gullost og hunang, en auðvitað má setja allt sem hugurinn girnist í kökurnar. Fyllingin er sett á helming kökunnar, hinn brotinn yfir og kakan steikt í 3 mínútur (eða þar til osturinn er bráðinn) undir loki á lægsta hita.

kryddað pastasalat

2011-08-28T20:32:00.004Z

bjó til ansi gott pastasalat í kvöld, ættað frá Pioneer Woman í Ameríkunni.

Í það fóru:

500 g pastaskeljar
1/2 bolli mæónes (notaði nú bara Gunnars þó matarskríbentarnir í Fréttatímanum telji það ekki mæónes)
1/4 bolli léttmjólk (hún segir nýmjólk en ég átti ekki)
4 msk borðedik
1 1/2 tsk piparsósa
1/2 tsk salt
svartur pipar
1 bakki kirsuberjatómatar skornir í helminga á lengdina
250 g gouda skorinn í bita (átti að vera reyktur en svoleiðis fæst ekki svo glatt hér)
24 heil basilblöð

Sjóðið pastað og kælið undir kalda krananum.

Klippið baslið í ræmur.
Blandið saman mæónesi, mjólk, ediki, salti, pipar og piparsósu.

Hrærið saman pasta, tómötum og ostbitum í stórri skál, hellið sósunni yfir ásamt basli og látið standa í ísskáp í amk. klukkutíma.

Virkaði fínt sem (semi)léttur kvöldmatur hér á bæ, ásamt hvítlauksbrauði en væri örugglega líka hörkufínn í samskotapartí.

Hér er upprunalega uppskriftin.

Dásamlegur kryddjurtakjúklingur

2011-08-13T12:05:00.002Z

4 kjúklingabringur
1 tsk allrahanda
1/2 tsk cayennepipar
1 tsk kanill
2 fínsaxaðir vorlaukar
2 greinar timjan
1-2 msk muscovadosykur eða púðursykur
1 msk matarolía
límónusafi eftir smekk/límónubátar til skrauts
ferskur kóríander til skrauts
maldonsalt

4 dl basmatigrjón
1 tsk chiliflögur
2 saxaðir vorlaukar
4 dl kókosmjólk
4 dl vatn
1 tsk salt

Blandið saman öllu kryddinu, sykrinum og lauknum, nuddið
kjúklingabringurnar vel upp úr blöndunni. Grillið kjúklinginn í ca 6
mínútur á hlið, eða þar til fulleldaður. Berið fram með límónubátum,
kóríander og kókosgrjónum

grjón:

Setjið grjónin, chiliflögurnar, laukinn og kókosmjólkina og vatnið saman í pott. Saltið og sjóðið eftir leiðbeiningum á pakka eða þar til grjónin eru meyr.

marineraðir bananar

2011-03-29T22:14:00.002Z

skv pöntun:

50 g smjör
2 msk púðursykur
2 msk sítrónusafi
4 bananar (alls ekki óþroskaðir!)
2 msk koníak (má sleppa)

Rjómi eða ís

Stillið ofninn á 180° Bræðið smjör og púðursykur í ofninum í eldföstu fati. Skerið banana í sneiðar á ská og veltið vel upp úr smjör/sykurblöndunni. Bætið koníaki í ef vill. Bakið í ofni í 20 mínútur.

Berið fram með vanilluís eða þeyttum rjóma. Gamall klassíker hér á bæ úr uppskriftabók sem er að verða komin í frumeindir sínar. Séu bananarnir of grænir er hægt að skipta þeim út fyrir hráar kartöflur þannig að það er best að passa upp á þá. Vorum með þetta í matarboði um daginn, einn bananinn þroskaður en hinir svolítið grænir. Stöku biti var æðislegur en hinir voru hreint ekki góðir. (Efast um að ég hefði fengið beiðni um uppskrift ef það hefðu bara verið þeir grænu...)

cassoulet

2011-03-06T23:59:00.002Z

enn af lúxusmatnum.

Við höfum gert þennan suðurfranska landrétt áður en þá með lambakjöti, já reyndar mjög ólíka uppskrift (spurning um jafnvel að henda henni líka inn, sú hentar eiginlega betur hérlendis) en ég lofaði að setja þessa útgáfu hér.

500 grömm haricots verts eða smjörbaunir - ef ekki úr dós þarf að leggja þær í bleyti daginn áður og skola síðan og sjóða
Hæfilega mikið svínakjöt, miðað við fyrir hve marga skal eldað
Confit de canard, (kanarífuglakonfekt upp á íslenskuna) einn skammtur á matargest
Toulouse svínapylsur (eða aðrar góðar pylsur) ein á mann
2 dósir af niðursoðnum tómötum
5 hvítlauksrif
1 lítil dós tómatkraftur
Chorizopylsa (eða sambærileg), 15 cm ef þumalþykk pylsa, 2 cm ef úlnliðsþykk, smátt skorin
10 muldir negulnaglar (alveg nauðsynlegt samkvæmt uppskriftarhöfundi á netinu, ekki endilega standard í suðurfrakklandi)
salt og pipar

Ekki veit ég hve marga kjötskammta er ætlast til að hver borði. En svo sem ekki slæmt að eiga afgang...

Skerið svínakjötið í bita og steikið í smá af andafeitinni úr dósinni í stórum potti (reikna ekki með að neinn hér nenni að standa í að sjóða niður andalæri sjálfur).

Bætið baunum, chorizopylsu, tómötum og tómatkrafti, hvítlauk, salti, pipri og muldum negulnöglum saman við. Fyllið upp með vatni þar til flýtur nokkurn veginn yfir. Komið upp suðu, setjið lok á pottinn og látið malla í klukkutíma eða svo.

Á meðan, steikið pylsurnar, einnig í smá andafeiti. Stillið ofninn á 180°

Þegar klukkutíminn er liðinn (eða þegar svínakjötið og baunirnar eru fullsoðnar), bætið við vatni ef þarf (þurftum ekki), setjið pylsurnar ofan á og þar fyrir ofan andalærin. Setjið í ofninn og hitið í hálftíma eða svo.

Berið fram með góðu brauði, fullkomið

dúkan

2011-02-27T19:25:00.004Z

Fann þennan marokkóska rétt í ókeypis blaði í Ástralíuvél, reif blaðsíðuna úr blaðinu og geymdi, nánast orðið ár síðan þá og loksins komst í verk að prófa.

Skemmst frá því að segja að þetta verður gert aftur. Og aftur.

Þetta er hvorki dýrt né snúið, en maður þarf að hafa tímann fyrir sér því kjötið tekur góða stund í ofninum. Má líka standa yfir nótt í marineringunni þó við gerðum það reyndar ekki í dag.

1 lambabógur, um 2 kíló
150 grömm smjör, mjúkt
1 msk salt (hljómar mikið en það er síðan ekkert salt í meðlætinu) - Aths. Var víst bara sett teskeið. Það var feikinóg...
1 tsk mulinn svartur pipar (notuðum reyndar hvítan, kom ekki að sök)
1 msk cumin

Fitusnyrtið kjötið og skerið í það grunnar rifur. Blandið saman mjúku smjörinu og kryddinu og makið kjötið með því. Vefjið síðan bóginn í álpappír, eins þétt og þið getið. Leyfið að standa í amk. klukkutíma (við stofuhita) eða yfir nótt í ísskáp.
Þegar marineringu er lokið setjið bóginn í stórt eldfast fat með loki, leyfið að ná stofuhita ef það var í ísskáp. Ekki taka álpappírinn af. Hellið könnu af vatni yfir, (ég notaði 1/2 lítra). Hitið ofninn í 180° gráður. Setjið fatið í ofninn og leyfið að steikjast í 2 1/2 klukkustund. Takið síðan álpappírinn af og lokið af fatinu, setjið aftur inn í ofninn og leyfið að brúnast í hálftíma til. Gott er að athuga hvort kjötið er tilbúið með því að snúa beininu örlítið, það á að losna auðveldlega frá kjötinu. Ef það gerist ekki, hafið þá kjötið lengur inni.

Meðan kjötið er í þessum síðasta fasa, undirbúið meðlætið:

300 g basmati hrísgrjón
600 ml vatn
50 g pistasíur án skelja
6 negulnaglar
50 g smjör
1/2 tsk engiferduft
1/2 tsk kanill
1/4 tsk múskat
50 g möndlur án hýðis, léttristaðar og gróft saxaðar
30 g rúsínur lagðar í bleyti smástund (sultanas í uppskriftinni en ég notaði nú bara venjulegar rúsínur)
2 stórir laukar, niðursneiddir og steiktir þar til gullinbrúnir
1 msk hunang

Skolið hrísgrjónin vandlega til að losna við sterkjuna (nenni því eiginlega aldrei en gerði þó í dag). Setjið í pott ásamt vatninu, lok á pottinn, komið upp suðu og lækkið. Sjóða við lægsta hita í 12-14 mínútur og slökkva síðan undir. Ekki opna pottinn á meðan á suðu stendur.

Á meðan grjónin sjóða, steikja laukinn í smá smjöri, setja til hliðar, hakka möndlurnar. rista möndlur og pistasíur á pönnu í 1-2 mínútur, setja negulnaglana á pönnuna og steikja í smástund í viðbót. Þá er smjöri og kryddi bætt á pönnuna og blandað vel saman, þá er lauk, hunangi og rúsínum blandað saman við. Lok sett á pönnuna og leyft að standa í 5-10 mínútur.

Hrísgrjónin ættu nú að hafa sogið í sig allt vatn. Hrærið í þeim með gaffli og setjið síðan lauk- og pistasíu/möndlublönduna saman við og blandið vel saman.

Berið fram með lambinu og soðinu úr fatinu (gott að fleyta mestu feitinni ofan af soðinu, það er vel feitt).

Kjötið var ótrúlega meyrt og gott, ég á ekki eftir að elda lambabóg öðruvísi en með þessari aðferð héðan í frá. Krakkarnir gleyptu í sig bæði kjöt og grjón með góðri lyst.

humar risotto

2011-02-13T21:19:00.007Z

Gerði rosa gott humar-risotto í kvöld.

Fyrst gerði ég humarsoð úr skeljunum, uppskriftin er frá Nönnu Rögnvaldar:

brúnið skeljarnar lítillega í olíu, saxið gróflega hálfan lauk(með hýðinu), eina gulrót og einn sellerístilk og steikið með í nokkrar mínútur. Setjið saman við tvær greinar af timian, eitt lárviðarlauf, vel af salti og nýmöluðum pipar og einn lítra af sjóðandi vatni. Sjóðið í hálftíma (ekki lengur, þá kemur beiskt bragð af skeljunum), sigtið og geymið.

Þá er komið að risottóinu sjálfu:

Innihald:
1 lítri humarsoð (má auðvitað nota keypt ef fólk nennir ekki að standa í hinu)
1 laukur saxaður
4 skallottulaukar saxaðir (má sosum setja meira af venjulegum, notaði skallottulauk fyrst ég átti hann)
3 hvítlauksrif fínt söxuð
300 gr arboriogrjón
smjör og olía
150 ml hvítvín
nokkrir þræðir saffran
1 bolli rifinn parmigiano reggiano
400 gr humar (skelflettur og skelin notuð í soðið) skorinn í bita.
aukasmjör og olía, sítrónusafi ef vill og smá hvítvínssletta
2 msk söxuð steinselja

meiri parmigiano til að dreifa yfir við borðið.

Mýkið lauk, hvítlauk og skallottulauk í slatta af olíu og smjöri (1-2 msk af hvoru). Setjið grjónin saman við laukinn og hyljið í feitinni. Hellið hvítvíninu saman við og látið sjóða upp af, hrærið stöðugt í á meðan. Myljið saffran þræðina yfir grjónin.

Bætið svo við einni ausu af soðinu í einu, hrærið stöðugt og látið sjóða vel upp af á milli þar til grjónin eru tilbúin, það á ennþá að vera smá "bæt" í grjónunum (tekur ca lítra af soði fyrir 300 gr grjón). Þegar stutt er eftir af grjónunum steikið þá humarbitana upp úr smjöri og smá olíu, kreistið smá sítrónusafa út á og skvettið svolitlu hvítvíni á pönnuna. Hrærið parmigiano ostinum saman við grjónin, blandið svo humrinum (og safanum af pönnunni) saman við, dreifið steinseljunni yfir og berið fram með meiri parmigiano.

Trufflaður kálfur

2010-11-22T23:01:00.000Z

fyrir 4

fyrir sinnepssósu:

4 tsk Dijonsinnep (með trufflum)
3 msk rjómi

hrært saman í skál

800 g kálfasnitselsneiðar
smjör eða önnur feiti til steikingar
safinn úr truffludósinni (um 50 g)
6 msk kjötgljái (notuðum hamborgarhryggsgljáa)
50 g trufflusveppir, smátt saxaðir
salt
pipar

Skerið kálfakjötið í strimla, ca 2 cm breiða. Steikið á heitri pönnu í eina mínútu (snúa við eftir hálfa). Takið kjötið af pönnunni og haldið heitu en skiljið safa sem myndast við steikinguna eftir á pönnunni. Setjið trufflusafann og kjötgljáann saman við kjötsafann og sjóðið niður við góðan hita í 2-3 mínútur.

Setjið matskeið af sinnepssósu á hvern disk (ekki sakar að hita diskana aðeins), þá fjórðunginn af kálfastrimlunum í fallegan pýramída yfir sinnepssósuna, stráið trufflusveppunum yfir og dreypið síðast kjötsoðsósunni hringinn í kring um kjötpýramídann.

Hvetjið gesti ykkar endilega til að lyfta diski að nefi til að njóta ilmsins af trufflunum.

(Svo er væntanlega hægt að gera réttinn trufflulausan en kannski með öðrum góðum sveppum – það er jú 2010 ekki 2007. Örugglega gott samt!)

ofnbakaðir kjúklingaleggir

2010-11-10T18:54:00.006Z

hæ öll, stel hér miskunnarlaust af hinni góðu síðu southernfood.com.. hljómar það ekki vel? datt inn á þessa leggi um árið og geri þetta alltaf reglulega, einfalt og gott.

8 kjúklingaleggir þurrkaðir létt með eldhúspappír

blandið saman í poka:

2 msk hveiti
1 tsk kjúklingakryddi
1 tsk papriku
1/2 tsk karrí
1 tsk grófu salti
1/2 tsk nýmöluðum pipar

Bræðið 1-2 msk smjör, takið eldfast fat, klæðið það að innan með álpappír og smyrjið ca helmingnum af smjörinu í botninn.

takið leggina, 2 í einu og veltið upp úr hveitiblöndunni og raðið í fatið.

dreypið svo restinni af smjörinu yfir kjúklinginn.

Inn í ofn við 200° í 45 mínútur. Eftir hálftíma er gott að snúa leggjunum svo þeir brúnist báðum megin.

Með þessu höfum við svo kartöflubáta sem fá að malla með í ofninum og gott salat.

tómatcrostini

2010-09-30T12:08:00.004Z

Stel þessu af JSB vefnum án þess að skammast mín hætishót - besta svona brauð sem ég hef á ævi minni smakkað:

Tómatcrostini (fyrir 4)

Hráefni:
1 dós saxaðir niðursoðnir tómatar
4 tómatar
1 búnt ferskt basilikum og örlítið til skrauts
1/2 dl fersk steinselja og örlítið til skrauts
1/2 dl ólífuolía
2-3 hvítlauksrif
1/2 tsk. salt
Svartur pipar
1 stór mozzarellaostakúla eða rifinn góður brauðostur
1 baguette eða 4 lítil ciabatta brauð

Aðferð:
1. Stillið ofninn á grill
2. Hellið niðursoðnu tómötunum í sigti og látið vökvann renna vel af þeim
3. Skerið fersku tómatana í grófa bita
4. Takið fram skál og blandið niðursoðnu tómötunum saman við þá fersku
5. Saxið basilikum og steinselju
6. Setjið basilikum og 1/2 dl af steinselju saman við
7. Skiptið baguette í fernt og kljúfið síðan hvern hleif í sundur
8. Pressið hvítlauksrifin út í ólífuolíuna. Setjið helminginn saman við tómatablönduna og penslið síðan brauðin með afganginum.
9. Grillið brauðin þar til þau verða gullin
10. Saltið og piprið tómatablönduna skiptið henni síðan niður á brauðin
11. Skerið mozzarellaostinn í u.þ.b. 8 sneiðar og raðið þeim ofan á brauðin
12. Grillið það til osturinn hefur tekið lit
13. Raðið á fat eða forréttadiska og stráið steinselju og basilikum yfir

kartöflusalat

2010-07-18T19:42:00.002Z

Impróviseraði kartöflusalat með frankfurterpylsunum í kvöld. Átti kartöflur við það að renna út, farnar að spíra smá (eða eiginlega alveg slatta) þannig að þær varð að nota.

5 stórar kartöflur
2 msk jómfrúrólífuolía
1 msk gott rauðvínsedik
1 tsk trufflusinnep (eða annað dijonsinnep)
salt
pipar
10-15 grænar ólífur
1 msk smár kapers

Kartöflur soðnar þar til meyrar, látnar kólna, afhýddar og skornar í fremur smáa teninga. Ólífuolía, rauðvínsedik, sinnep, salt og pipar hrist vel saman og hellt yfir kartöflurnar. Ólífur skornar í tvennt og þeim og kapers blandað við kartöflurnar. Dressing hellt yfir og hrært þannig að allt blandist vel saman.

Látið standa góða stund til að allt bragðið blandist vel.

(já já ég veit, þetta er frekar basic - mjög gott samt...)

Lasagna Hallveigar –versjón 29. Mars 2010 ;)

2010-03-30T15:38:00.000Z

Kjötsósan:
500 gr jöklanautahakk úr Frú Laugu
1 laukur (átti reyndar bara tvo hálfa sem voru frekar litlir þannig að ég henti einum skalottulauk með)
4 hvítlauksgeirar
1 gulrót
1 sellerístöngull
2 dósir hakkaðir tómatar, maukaðir (eða ein flaska passata)
1 dós tómatpurée
1 grein ferskt rósmarín
2 tsk þurrkað oregano
1 tsk italian seasoning
Maldon salt og nýmalaður pipar
1 tsk sykur
3 lárviðarlauf
1 msk smjör og 1 msk olía
Vatn eftir þörfum

Ostasósan:
2 msk smjör
2 msk hveiti
500 ml mjólk
Nýmalaður svartur pipar
¼ tsk múskat
1 msk saxað ferskt basil
115 gr 26% gouda saxað smátt
Lasagnaplötur
Rifinn Parmigiano Reggiano
Mozzarellakúla skorin í þunnar sneiðar
40 gr gouda rifinn
Aðferð:
Um 4 tímum fyrir matmálstíma þarf að gera kjötsósuna. Maukið grænmetið rósmarínið og þurrkuðu kryddin saman í matvinnsluvél eða töfrasprota. Steikið úr olíunni og smjörinu í svolitla stund við miðlungshita, bætið svo hakkinu saman við og brúnið. Saltið og piprið kjötið, bætið svo maukuðu tómötunum, tómatpúrrunni, lárviðarlaufunum og sykrinum við. Lækkið hitann og látið malla í 3 tíma eða meira.
40 mínútum fyrir matmálstíma er kveikt á ofninum á 200°. Hitið mjólkina í litlum potti og í stærri potti bræðið smjörið og gerið smjörbollu úr hveitinu. Hellið mjólkinni saman við og þegar sósan fer að þykkna bætið þá ostinum út í. Piprið, og bætið múskati og söxuðu basil saman við.
Til að gera lasagnað takið þá stórt ferkantað eldfast mót, setjið ostasósu í botninn, þá lasagnaplötur, meiri ostasósu, kjötsósu, nokkrar tægjur af mozzarellaostinum og rífið smá parmigiano Reggiano yfir kjötblönduna. Þá lasagnaplötur, ostasósu, kjötsósu, ost osfrv. Endið á lasagnaplötum og ostasósu yfir þær, dreifið rifna ostinum yfir og smávegis af parmigiano og mozzarella ef þið eigið hann eftir.
Inn í ofn í 25 mínútur, borið fram með hvítlauksbrauði (ég var með hatting, það er best) og salati. Mitt salat í þetta skiptið var einstaklega einfalt, jöklasalat (átti ekkert kletta) konfekttómatar (líka úr Laugu) , hash avocado, nokkrar furuhnetur og fetaostur.

Bananapönnukökur

2010-02-28T17:21:00.003Z

1 bolli hveiti
2 tsk lyftiduft
1 msk sykur
1/4 tsk salt

2 msk brætt smjör
1 egg
2 vel þroskaðir bananar
1/2 tsk vanilludropar
1 bolli mjólk

blandið þurrefnunum saman í eina skál og í stærri skál hrærið saman mjólk, eggi, smjöri, stöppuðum banönum og vanilludropum. Hrærið hveitiblöndunni saman við hina, deigið á að vera kekkjótt.

steikið við miðlungshita upp úr smjöri, ég nota ca hálfan bolla í hverja pönnuköku. Gott er að vera með disk í volgum ofni til að setja pönnukökurnar á til að halda þeim heitum. Berið fram með hlynsírópi.

Cantucci di Giorgia

2010-02-28T12:51:00.005Z

Þetta er uppskrift að cantucci (eða biscotti, eða eitthvað) sem ég fékk frá kunningjakonu í Róm, Giorgiu. Amma hennar bakar þetta, en uppskriftin er upprunalega frá Toscana.

500 g hveiti
300 g sykur
100 g brætt smjör
300 g afhýddar möndlur
4 egg (+ eitt til að pensla með)
Salt á hnífsoddi
1 msk lyftiduft
Raspað hýði af einni sítrónu
2 skeiðar af áfengi (ef vill)

Ristið möndlurnar í ofninum í nokkrar mínútur og grófhakkið (það má líka hafa þær heilar). Stífþeytið eggjahvíturnar og hrærið eggjarauðurnar og sykurinn saman. Siktið hveiti í skál og bætið lyftidufti, salti út í og svo smám saman eggjahrærunni og smjörinu. Hrærið allt í höndunum þangað til degið er mjúkt og slétt. Bætið möndlunum saman við og hrærið þangað til degið er mjúkt aftur.

Búið til lengjur (2-3sm í þvermál) og leggið á bökunarplötu með pappír.

Bakið lengjurnar í ofni í 15 mín á 180°C (í miðjum ofninum). Að því loknu á að skera lengjurnar í ca. 1,5cm breiðar sneiðar.

Ristið kexin í 25 mínútur á 150°C. Snúið þeim síðustu fimm mínúturnar. Þau eiga að verða gullinbrún.

Kælið kexin og látið standa í 20 tíma áður en þeirra er neytt (með Vin Santo).

Ég sullaði nú bara öllu saman í plastskál og hrærði saman. Þetta varð hálfklessulegt og ljótt á bökunarplötunni svo ég er viss um að amma hennar Giorgiu hefði fengið hjartaáfall ef hún hefði séð þetta hjá mér ...

lambalæri frá Mughlai - eða Raan

2010-02-11T21:06:00.003Z

Þá erum við búin að finna - tja annan tveggja indverskra uppáhaldsrétta, vinur okkar hafði lengi talað um raan lambalæri og svo fundum við það í karríbókinni góðu sem Óli bróðir gaf okkur einu sinni í jólagjöf. Undir nafninu Mughlai-style leg of lamb, það var í undirtexta sem Raan var nefnt.

Hér er allavega uppskriftin:

4 stórir laukar, hakkaðir
4 hvítlauksrif
5 cm stykki ferskur engifer, rifinn (notuðum duft reyndar - engiferóþol mitt)
3 msk hakkaðar möndlur
2 tsk cumin
2 tsk kóríanderkrydd
2 tsk túrmerik
2 tsk garam masala
4-6 grænir chiliávextir eða eftir smekk
safi úr einni sítrónu
3 dl hreint jógúrt
1 gott lambalæri (um 2 kg)
8-10 negulnaglar
salt
1 msk möndluflögur til skrauts
4 ferskir tómatar

Setjið fyrstu 10 atriði listans í matvinnsluvél eða blandara ásamt salti eftir smekk og hakkið í slétt mauk. Bætið jógúrti við smátt og smátt og hrærið á milli.

Smyrjið stóran steikarpott.

Hreinsið mestu fituna og skinnið af lærinu. Stingið djúpa vasa í kjötið meðfram beininu sitt hvoru megin, þar sem þykkasti hlutinn er, skerið síðan tvo skurði á ská, báðum megin í þykka hlutann. Stingið negulnöglunum á kaf hér og þar í kjötið. Smyrjið kryddblöndunni í vasana og skurðina á kjötinu og afganginum yfir kjötið. Leggið lærið í steikarpottinn og lokið (má loka með álpappír).

Leyfið að standa í 2-3 klukkutíma áður en eldað er.

Hitið ofninn í 190° C. Setjið kjötið inn og leyfið að steikjast í 2 - 2 1/2 klst eða þar til kjötið er fulleldað. Takið lokið eða álpappírinn af síðustu 10 mínúturnar af steikingartímanum.

Takið kjötið út þegar það er fulleldað, stráið möndluflögum yfir og leyfið að standa í 10 mínútur áður en skorið er í kjötið.

Berið fram með grilluðum tómötum (við hentum þeim bara út í pottinn þessar síðustu 10 mínútur eftir að lokið var tekið af, það kom mjög vel út)

Svo má auðvitað hafa naan og rætu með.

tómatapasta

2010-01-02T20:02:00.003Z

jæja, ekki veitir af að létta matseðilinn smá - við fórum í smiðju Jamie Olivers, bókin sem við fengum í jólagjöf frá Hallveigu og Jóni Heiðari, gríðarmargt spennandi. Einfalt líka og fljótlegt - allavega ef við hefðum ekki búið til pastað sjálf, það tók smástund.
Jamie notar ferskar lasagnaplötur úr búð og sker þær í lengjur, náttúrlega talsvert fljótlegra. Auðvitað er svo bara hægt að nota tagliatelle eða annað pasta að vild.

Í þetta þarf:

500 g ferskt pasta
1 box kirsuberjatómata
smá ólífuolíu og smjör
nokkur hvítlauksrif - fer eftir smekk
lítið búnt af fersku basil (fundum ekki slíkt í búðum, notuðum rósmarín)
1/2 dl balsamedik
100 g parmaostur

Byrjið á að koma upp suðu á stórum potti af saltvatni fyrir pastað. Ef það er þurrkað má byrja að sjóða það strax.

Skerið tómatana í helminga eða fjórðunga að vild og hvítlauksrifin í sneiðar. (við kreistum hann nú reyndar). Hitið olíu og smjör á stórri pönnu við meðalhita, steikið hvítlaukinn þar til hann byrjar aðeins að brúnast, setjið þá tómatana saman við og steikið stutta stund. Hellið þá edikinu yfir ásamt helmingnum af nýrifnum parmaostinum. Leyfið að malla við vægan hita á meðan ferska pastað er soðið (um 3 mínútur).

Þegar pastað er tilbúið, hellið af því vatninu, geymið þó 2-3 ausur af soðinu. Setjið pastað saman við sósuna ásamt soði og hrærið vel saman ásamt parmaostinum sem eftir er.

Mælum með þessu, ekki smá gott og frískandi eftir allar steikurnar...

lambafillet með villisveppasósu himnaríkis

2009-11-14T23:19:00.000Z

Set hér að ósk inn máltíð kvöldsins nákvæmlega eins og ég gerði hana, þessi uppskrift dugar fyrir 4.

Kjöt:

800 gr lambafillet með fiturönd, saltað og piprað ca 2 tímum fyrir eldun og látið ná stofuhita. Steikt á grillpönnu í 2 mínútur með fituhliðina niður og í nokkrar sekúndur á hinni hliðinni, sett inn í 200-220° heitan ofn með kjöthitamæli þar til kjarni hefur náð 57° hita. Þá hvílt undir álpappír í 10 mínútur áður en það er borið fram. Við þetta verður kjötið meðalsteikt. Kjötið má fara fyrir ofan kartöflurnar sem eru fyrir í ofninum en gott er að færa kjötið af og til til að kartöflurnar og laukurinn nái jafnri steikingu.

Kartöflur og laukur:

500 gr kartöflur
1 blaðlaukur
1/2 rauðlaukur
ólífuolía
maldonsalt
timian

kartöflur skornar í báta, velt upp úr olíu, maldonsalti og timian og hitað í 200° heitum ofni í 45 mínútur. Eftir fyrsta korterið er niðurskornum blaðlauk og rauðlauksbátum bætt í ofnskúffuna og kartöflunum snúið.

sósa:

1 msk smjör
1 msk ólífuolía
2 hvítlauksrif smátt skorin
hálfur rauður laukur smátt skorinn
nokkrir þurrkaðir villisveppir
7 ferskir sveppir skornir í sneiðar
750 ml vatn
1 1/2 lambateningur
2 tsk rjómaostur með svörtum pipar
1 tsk rifsberjasulta
100 ml kaffirjómi
smá maisena mjöl

leggið þurrkuðu sveppina í bleyti í 10 mínútur, þurrkið með eldhúspappír og skerið smátt. Steikið hvítlauk, rauðlauk og báðar sveppategundirnar úr smjörinu og olíunni þar til mjúkt, bætið vatni og teningum í og sjóðið niður í 40 mín. Bætið rjóma, rjómaosti og sultu við og sjóðið áfram í 20 mínútur. Þykkið með maisenamjöli eftir þörfum.

Salat:

klettasalat
nokkrir kirsuberjatómatar
nokkur jarðarber
fetaostur í kryddolíu
furuhnetur

Blandið öllu saman.

svínaskankar

2009-06-22T10:09:00.003Z

Reyndum í gær að herma eftir tékkneskum (tja, væntanlega reyndar bara miðevrópskum) rétti sem við fengum í ferðinni um daginn. Tókst bara nokkuð vel og krakkarnir gleyptu þetta í sig með bestu lyst og fengu sér öll ábót.

Reikna þarf með svona 400-500 grömmum af skönkum á mann, þar sem talsvert er um bein og fitu.

Svínaskankar
laukur
sellerí (má sleppa)
salt
heil piparkorn
olía eða smjör

Skankarnir soðnir í um einn og hálfan tíma í vatni sem flýtur yfir ásamt lauk, sellerí, pipar og salti.

Á meðan, undirbúa sósuna:

1/4 bolli sýrður rjómi
1 msk mæónes
3 msk piparrótarmauk
1 tsk Dijonsinnep
slatti af klipptum graslauk eða græna hlutann af vorlauk

Blandið öllu saman, geymið í ísskáp.

Þegar skankarnir eru orðnir meyrir eru þeir teknir upp úr pottinum og þerraðir. Síðan steiktir í smjöri/olíu í 15 mínútur þar til stökkir (ég tók 5 mínútur á hlið, yfirleitt hægt að finna 3 steikingarhliðar á svona skönkum)

Borið fram með uppáhalds kartöflustöppunni ykkar, súrum gúrkum piparrótarsósunni, sinnepi og ekki verra að hafa súrkál með fyrir þá sem þykir slíkt gott. Úti voru líka súrsaðir piprar með og steikt brauð í stað kartöflustöppu.

Bráðnauðsynlegt að hafa góðan ljósan bjór með...

Kúrbítsmakkarónur

2009-04-04T16:05:00.002Z

Þetta er mjög gott og tekur ekki langan tíma að matreiða.

2 litlir kúrbítar
4 hvítlauksrif
olía
salt
pipar
parmesanostur

makkarónur (ekki svona litlar og fljótsoðnar sem maður setur í typpasúpu, heldur stórar og feitar)

Ég byrjaði á því að setja vatn í pott til að sjóða pastað í.

Maður rífur kúrbítinn með rifjárni. Það er gott að leggja nokkur lög af eldhúspappír undir, pappírinn dregur í sig safann úr kúrbítunum. Svo hitar maður olíu í pönnu (u.þ.b. botnfylli) og steikir hvítlaukinn á meðalháum hita í smá stund (þangað til að hann byrjar að verða brúnn) og setur kúrbítinn á pönnuna. Ég bætti smá olíu við og lét þetta krauma á háum hita til að byrja með en svo meðalháum meðan ég sauð makkarónurnar. Salta og pipra.

Þegar makkarónurnar eru soðnar hellir maður vatninu af og blandar gumsinu saman við, ásamt u.þ.b. 2/3 bolla af parmesanosti. Svo hrærir maður duglega svo osturinn bráðni.

kanadískar pönnukökur

2009-03-15T21:28:00.003Z

eða geta amrískar ekki alveg eins verið frá Kanada eins og BNA?

Þessar eru reyndar eiginlega breskar - allavega er uppskriftin niðurskrifuð af Nigellu hinni ofurbresku.

Amerískar pönnukökur

2 bollar hveiti
3 bollar súrmjólk
2 stór egg
1 msk sykur
1/2 tsk salt
2 tsk lyftiduft
1 tsk matarsódi
4 msk smjör, brætt

Hitið ofninn til að halda pönnukökunum heitum. Blandið þurrefnunum saman og bætið í eggjum, súrmjólk og kældu smjörinu. Hrærið vel en það eiga að vera litlir hveitikekkir í deiginu. Smyrjið þykkbotna pönnu lítillega með bræddu smjöri og steikið pönnukökurnar og setjið þær á disk í ofninum meðan á steikingu stendur. Notið uþb hálfan bolla af deigi í hverja köku, steikið 3-4 kökur í einu. Steikið í uþb 2 mínútur á hvorri hlið eða þar til loftbólur byrja að myndast í deiginu.
Berið fram með beikoni, eggjum og hlynsírópi, eða jarðarberjum, banönum og sírópi.

vængir buffalófuglsins

2009-02-15T21:53:00.003Z

reyndar hafa Buffalo Wings ekkert með buffalóa að gera, heldur var uppskriftin fundin upp á bar í bænum Buffalo í New York fylki.

Þessa uppskrift notum við:

Vængir:
1 kíló af kjúklingavængjum,
3 msk smjör, brætt,
4 msk tabasco (notuðum bara tvær, heldur barnvænna, myndi nota meira ef við værum bara að gera fyrir okkur)
1 msk paprika
1/2 tsk salt
1/2 tsk cayennepipar
1/4 tsk svartur pipar

Gráðostasósa:
1/2 bolli sýrður rjómi
1/2 bolli mæónes
1/2 bolli gráðostur
1 msk hvítvínsedik eða annað hvítt edik
1 hvítlauksrif

Uppskriftin segir klippa ysta liðinn af vængnum af og henda, og klippa vængi í sundur á liðunum, við nennum því nú aldrei. Blandið bara saman bræddu smjörinu, tabascosósunni, papriku, salti, cayennepipar og svörtum pipar. Hellið yfir kjúklinginn og látið marinerast minnst hálftíma. Steikist í ofnskúffu við 200° í 20 mínútur til hálftíma. (uppskriftin segir líka grind og snúa bitunum eftir tíu mínútur, gerðum það síðast, nenntum ekki núna og þeir voru ekkert síðri úr skúffunni, bara setja þá í skál og hella safanum sem myndast í skúffunni yfir.

Gráðostasósan: Setjið allt sem á að fara í sósuna í blandara eða mixer og þeytið þar til fullkomlega jafnað út.

Berið fram með niðursneiddum sellerístönglum. Algjört nammi.

kartöflustappan góða

2009-01-01T12:54:00.002Z

prófaði í gær stöppu frá ircfélaga, hún sló í gegn, hvert atóm var borðað. Verður pottþétt gerð aftur.

Parmakartöflustappa Gunnars

1 kg kartöflur
50 g smjör
1 stykki parmaostur
salt
pipar

Sjóðið og afhýðið kartöflurnar, maukið. Setjið í pott, smjörið saman við og hitið við vægan straum þar til smjörið bráðnar, hrærið í allan tímann. Rífið allan parmaostinn og blandið saman við maukið, skiljið aðeins eftir til að strá yfir. Smakkið til með salti og pipar að vild. Áferðin á að vera þannig að stappan festist ekki við skeið.

Setjið í eldfast fat, bakið í ofni í 20 mínútur, eða þar til heitt í gegn og osturinn ofan á hefur brúnast örlítið.

uxahalasúpa

2008-11-21T09:47:00.004Z

Svona í tilefni af því að ég fékk ekki uxahala á tilboði í Nóatúni, út af frekum hömstrurum (grr) er ég að hugsa um að skella uppskriftinni hér inn.

1 1/2 kíló uxahalar (svona um það bil)
2 laukar
2-3 hvítlauksrif
2 gulrætur
1/2 sellerístöngull
50 g smjör eða olía
um 2 l vatn
1 msk tómatkraftur (purée)
1 tsk paprikukrydd
salt og pipar

Kryddvöndur:

steinselja
timjan
lárviðarlauf
bundið saman með sláturgarni

1/2 dl. sérrí eða þurrt madeira (ég sleppi þessu alltaf)

Gróffituhreinsið halabitana ef þeir eru mjög feitir. Hakkið laukana og hvítlaukinn smátt og skerið gulrætur og sellerí í fremur litla bita. Hitið smjörið eða olíuna í þykkbotna potti og brúnið kjötbitana á öllum hliðum. Takið upp úr pottinum og steikið laukinn þar til hann er gullinn, setjið þá hvítlauk, gulrætur og sellerí saman við og steikið í smástund í viðbót. Kjötbitarnir settir aftur í pottinn, kryddað með salti, pipar og papriku. Hellið vatni í pottinn svo fljóti yfir, setjið tómatkraft og kryddjurtir saman við. Hitið að suðu, hreinsið aðeins ofan af gromsið sem flýtur upp, lækkið hitann og látið súpuna malla í um 4 klukkutíma. Kjötið á að falla alveg af beinunum.

Smakkið til með salti, pipar og víni ef vill og látið sjóða í 10 mínútur til (ef þið notið vín)

Takið kjötbitana úr pottinum og hreinsið kjötið af beinunum, setjið það aftur í pottinn. Hitið aftur að suðu og berið fram sjóðheita. Ekki er verra að hafa heitt brauð með.

Alveg uppáhalds kjötsúpan okkar hér heima...

lasagna

2008-11-17T10:01:00.001Z

hæ allir, gerði svo rosalega gott lasagna í gær að ég ætla að henda því hér inn.. kjötsósan er staðfærð frá Nönnu Rögnvaldar en restin er mín!

Lasagna:

Kjötsósa:
500 gr nautahakk
1 gulrót
1 sellerístöngull
1 laukur
4 hvítlauksrif
1 grein ferskt rósmarín
Smávegis ferskt timian (bara af því ég átti það, má alveg vera þurrkað)
1 msk þurrkað oregano
1 tsk ítölsk kryddblanda
2 tsk sykur
2 tsk maldonsalt
3 lárviðarlauf
Slatti af nýmöluðum pipar
2 dósir tómatar
1 dós tomato puree
2 msk ólífuolía
Vatn eftir þörfum

Ostasósa:
2 msk smjör
2 msk hveiti
500 ml léttmjólk
1 msk philadelfia light
150 gr rifinn mozzarella ostur
½ tsk Maldon salt
múskat á hnífsoddi
Nýmalaður pipar

Lasagna plötur eftir þörfum
rifinn parmigiano reggiano
50 gr rifinn mozzarella ostur

Aðferð:
Maukið saman lauk, hvítlauk, gulrót, sellerí og fersku kryddjurtirnar og steikið í olíunni í nokkrar mínútur, bætið svo hakkinu og þurrkaða kryddinu út í og brúnið. Bætið svo tómötunum, saltinu, sykrinum, lárviðarlaufunum og piparnum og svolitlu vatni út í, lokið og látið malla í 3 klukkutíma minnst.

Hitið mjólkina í litlum potti, bræðið smjörið og bætið hveitinu út í og hrærið svolítinn tíma saman. Hellið svo mjólkinni saman við og leyfið aðeins að þykkna, bætið þá ostinum út í og kryddið.

Takið stórt ferkantað eldfast fat og leggið lasagnað í þessari röð, ostasósa, lasagnaplötur, ostasósa, kjötsósa, parmigiano reggiano, lasagnaplötur, ostasósa osfrv. Endið á lasagnaplötum, setjið ostasósu efst og dreifið restinni af rifna mozzarellaostinum ofan á.
Inn í ofn við 200° í 20 mínútur. Gott að hafa salat með og hvítlauksbrauð ef vill.

mokka créme brulée

2008-11-06T20:30:00.003Z

Lengi verið meiningin að gera svona mokka créme brulée, fengum slíkt fyrir óratíma á Grillinu, margoft gert vanillu créme brulée síðan, einu sinni prófað uppskrift að kaffiútgáfu, úr eftirréttabók Hagkaupa, minnir mig, hún var glötuð.

Ákváðum að búa til eigin útgáfu, tókum uppskriftina frá henni Nönnu og skiptum hluta mjólkurinnar út fyrir níðsterkt kaffi. Tókst snilldarvel, þetta verður bókað á fastalistanum héðan í frá.

Hér kemur hún (vona þetta sé í lagi, Nanna):

250 ml rjómi
200 ml mjólk
50 ml sterkt lagað kaffi
1 vanillustöng
100 g sykur
4 eggjarauður

hrásykur

Ofninn hitaður í 150 gráður og vatn sett í ofnskúffuna. Vanillustöngin er soðin í rjómanum og mjólkinni ásamt helmingnum af sykrinum, kaffinu hellt saman við og blandan kæld smá. Rauðurnar þeyttar ljósar og léttar með afganginum af sykrinum. Vanillustöngin tekin upp úr og rjómablöndunni hellt smám saman saman við eggin og sykurinn. Hellt í lítil eldföst mót sem bökuð eru í vatnsbaði þar til búðingurinn hefur stífnað. Kælt vel.

Hrásykri stráð yfir og hann bræddur undir grilli eða með gasbrennara þar til hann brúnast vel. Borið strax fram, þá er sykurinn stökkur.

helgi svínsins - ananasrjómakarrísneiðar

2008-11-02T15:45:00.002Z

vorum í svínakjötsstuði þessa helgi, á föstudaginn var keyptum við hnakkasneiðar á 50% afslætti í Krónunni, ljómandi fínt kjöt, rifjuðum upp gamla uppskrift.

Ananas-rjóma-karrí-svínakjöt:

4 góðar sneiðar svínahnakki eða annað að eigin vali
örlítið smjör eða olía
1 lítil dós ananas í bitum
1 peli rjómi
karrí
salt
pipar

Bræðið smjörið á pönnu, setjið karrí saman við og steikið sneiðarnar, 2 mínútur á hlið við góðan hita, síðan 4 mínútur á hlið við vægan hita. Kryddið með salti og pipar. (fer auðvitað eftir þykkt sneiða). Þegar steikingu er lokið, takið kjötið af pönnunni og haldið því heitu. Hellið rjóma og ananas ásamt safa í pönnuna (má minnka safann svolítið, ef vill). Smakkið til með meira karríi, salti og pipar. Sjóðið þar til sósan þykknar örlítið (ekkert betra að hafa þessa sósu þykka)

Berið fram með hrísgrjónum, gott salat sakar ekki heldur.

Svo verðum við með kóksvínið á eftir...

ólífubrauð

2008-10-21T08:47:00.002Z

Samkvæmt beiðni, stolið hér upp úr elstu Ostalystarbókinni:

Dugar í 2 brauð

50 g pressuger eða 1 bréf þurrger
6 dl vatn
1/2 dl matarolía (nota ólífuolíu - ekki jómfrúrvaríantinn, óþarfi)
2 tsk salt
950 g hveiti
200 g rifinn ostur (stendur 125 g í uppskrift)
110 g fylltar grænar ólífur

Myljið gerið/hellið þurrgeri í skál. Hitið vatnið í 37°, hellið saman við gerið og hrærið þar til gerið hefur jafnast út. Hrærið olíu, salti og hluta af hveitinu saman við, eða þar til deigið er ekki sérlega blautt (fer eftir hvað hveitið hefur mikinn raka, ég hef þurft að setja meira en þessi 950 grömm stundum). Leyfið deiginu að lyfta sér á hlýjum stað í um 40 mínútur.

Skerið ólífurnar í sneiðar og rífið ostinn. Hitið ofninn í 225°

Hnoðið deigið og skiptið því í tvennt. Fletjið út hvorn helming fyrir sig í ca 50x25 cm ferhyrninga. Stráið osti og ólífum ofan á. Rúllið upp frá langhliðinni. Myndið skeifu úr rúllunum, látið á plötu klædda bökunarpappír og bakið í um 25 mínútur. Penslið brauðin af og til með vatni eða þeyttu eggi, meðan á bökun stendur, til að mynda skorpu og gera brauðið fallegra.

Látið brauðin kólna undir klút (hmm, reyndar nær annað brauðið aldrei að kólna alveg niður hér...)

sólberjasúkkulaðikaka

2008-08-27T22:11:00.001Z

þessi sem við gerðum um daginn og Jón Lárus segir frá á sínu bloggi tókst þetta líka snilldarvel. Þetta verður fasti á árstíðamatseðlinum:

Dótið:
150 g dökkt súkkulaði
150 g smjör (mjúkt)
200 g sykur
2 egg
4 dl hveiti
2 tsk. lyftiduft!
1/2 l rjómi
250 g sólber
4 eggjahvítur
170 g sykur í viðbót
7 matarlímsblöð

Aðferðin:
Bræðið súkkulaðið í vatnsbaði eða í örranum (ég nota alltaf örrann núorðið). Þeytið saman smjör og sykur þangað til ljóst, bætið eggjunum saman við og þeytið áfram. Blandið saman hveiti og lyftidufti og hrærið saman við ásamt bráðnu súkkulaði. Skellið deiginu í 22 cm spennukökuform (ekkert annað dugir) og bakið við 200° í 20 mínútur. Leyfið henni svo að kólna í rólegheitunum undir röku stykki. Á meðan má þeyta rjómann og mauka sólberin og blanda síðan saman. Nú er komið að því að leggja matarlímsblöðin í bleyti og síðan bræða þau (nota venjulega vatnsbaðið hér). Þegar bráðin eru þau þeytt saman við sólberjarjómann. Þessu næst eru eggjahvíturnar stífþeyttar ásamt afgangssykrinum og hrært varlega saman við sólberjarjómann. Kakan er skorin í tvennt, rjóminn settur á milli. Kælt í a.m.k. tvo tíma. Þeir sem eru með skreytidellu geta svo brætt hvítt súkkulaði og gert eitthvað fallegt (eða ljótt) mynstur ofan á kökuna. Það gerir hins vegar örugglega ekkert fyrir bragðið.

marsipankaka með vínberjum

2008-08-22T18:53:00.000Z

Þessi er klassík:

Marsípankaka með vínberjum

200 g gott marsípan
75 g brætt smjör
2 egg
75 g hveiti
1/2 tsk. lyftiduft
200 g vínber (steinlaus eða steinhreinsuð)

Skerið marsípan í sneiðar og hrærið svo bræddu smjörinu saman við uns mjúkt. Hrærið eggin saman við og síðan hveiti og lyftiduft. Hellið hrærunni í smurt tertu eða bökuform (22-24 cm). Skerið vínberin í tvennt og dreifið þeim yfir. Bakið kökuna í 18-20 mínútur við 200°C. Gjarnan má strá flórsykri yfir kökuna áður en hún er borin fram.
Kakan er sérlega ljúffeng hvort heldur sem er heit eða köld. Ekki sakar svo að bera fram þeyttan rjóma eða ís með henni.

laxaforrétturinn

2008-08-06T16:23:00.002Z

hvers vegna ætli ég hafi aldrei sett hann hér inn? Reyndar ekkert sérlega margir forréttir á síðunni, yfirleitt.

Þessi er allavega mjög einfaldur. Í honum er:

Reyktur lax
Kapers, smár
Sítrusolía (ólífuolía með sítrónukeim, fæst víða)
Klettasalat

Best er að útbúa á hvern forréttadisk fyrir sig. Skerið laxinn í þunnar sneiðar og setjið á diska, dreifið svo sem teskeið af kapers á hvern disk, handfylli af klettasalati og dreypið ögn af sítrusolíunni yfir.

Lítið mál og fljótlegt...

Aztekakakó

2008-08-04T14:26:00.004Z

Fífa fann uppskrift að suðuramerísku kakói í Fréttablaðinu um daginn, leist vel á og ákvað að prófa. Kom verulega vel út.

Fyrir 4-5:

800 ml mjólk
ein vanillustöng eða 1 tsk vanilluessens
1 rauður chiliávöxtur
2 kanilstangir
100 g hreint súkkulaði (notuðum 56% frá Síríus)

Kljúfið vanillustöngina í tvennt (ef notuð) og fræhreinsið chiliið.

Mjólkin sett í pott ásamt vanillustönginni (eða essensinum), chiliinu og kanilstöngunum. Látið malla við vægan hita í 10 mínútur. Síðan er súkkulaðið brotið niður og sett út í, látið malla aftur í 5-10 mínútur.

Fín tilbreyting við venjulegt Síríus heitt súkkulaði. Hentar sérlega vel á köldum dögum.

ætiþistlar og hollandaise frá klóri

2008-07-05T21:49:00.003Z

ætiþistlablöð hér í kvöldmatinn, á morgun á að vera kjúklingaréttur sem með eiga að vera smjörsteikt þistilhjörtu. Keyptum þistlana í dag og þar sem innihaldið úr blöðunum er alger snilld, með hollandaisesósu, ákváðum við að skipta út tortillunum sem áttu eiginlega að vera í kvöld, og prófa að búa til hollandaise from scratch.

Ekki var það nú mikið mál.

Til að undirbúa þistlana, sker maður stilkinn af og örlítið af toppnum (humm, við gleymdum því nú reyndar, veit ekki hvers vegna það þarf að gera það), og þeir eru soðnir í vatni og sítrónusafa (af svona hálfri til einni sítrónu) í 25 mínútur.

Sósan:

175 g smjör
3 stórar eggjarauður
1 1/2 matskeið sítrónusafi (skipt í eina og svo hálfa)
1 msk kalt vatn
1 tsk dijon sinnep
cayenne pipar (hmm held þetta hafi reyndar verið chili)
salt að vild

Bræðið smjörið í potti eða örbylgjuofni við ekki of mikinn hita

Setjið eggjarauður, eina msk af sítrónusafa, vatn og sinnep í blandara eða matvinnsluvél. Þeytið smástund til að blanda vel.

Hellið heitu bræddu smjörinu í mjórri, jafnri bunu saman við, á meðan þeytt er.

Smakkið til með piparnum og saltinu.

Berið þistilhjörtun fram í allri sinni dýrð, leyfið fólki að plokka blöðin utan af. Blöðunum er dýft í sósuna og mjúki, innsti hlutinn borðaður.

Gott er að hafa risastóra skál fyrir rusl - eða tæma oft, þar sem blöðin taka hellings pláss.

Auðvitað má borða hjörtun sjálf (fyrir utan hærða hlutann, efst) með sósunni líka.

silungur í salvíu

2008-06-14T21:52:00.001Z

Var að lesa í gegn um gamla bloggið mitt og rakst þá á þennan:

1 stórt silungsflak
smjör
8-9 blöð fersk salvía
1/4 bolli hvítvín
slatti af humarsoði (nota touch of taste soðin, megagóð)
þerrið fiskinn
brúnið smjörið á pönnu, með salvíublöðunum, við háan hita
steikið fiskinn, áfram á háum hita, snúið aðeins einu sinni
hellið soði og hvítvíni út á og látið malla í 5 mínútur, ég setti lok á en kannski betra að gera það ekki, til að halda roðinu stökku!

Gott er að bera fram soðnar kartöflur eða hrísgrjón með þessu.

sumarsalat

2008-06-11T20:22:00.003Z

Maður tekur tvö sumur...

/fimmeyringur

Höfum þetta salat sirka einu sinni á ári, nokkrir réttir sem eru þannig, rifsberjakjúklingurinn, rabarbaragrautur, rjómasveppapasta með nýtíndum sveppum, örugglega fleira sem ég man ekki eftir í augnablikinu. Svona árstíðabundnir.

Hér kemur:

250 g pasta, skrúfur eða fiðrildi
1 lítill laukur
1 stilkur sellerí
1 rauð paprika
150 g salamipylsa
200 g mildur ostur að eigin vali
125 grömm belgbaunir

dressing:
4 msk ólífuolía
2 tsk sinnep
salt
pipar
klipptar ferskar kryddjurtir að vild (vorum með esdragon, marjoram og basil)
safi úr hálfri sítrónu
hálft hvítlauksrif, marið, ef vill

Sjóðið pastað eftir leiðbeiningum á pakka, sigtið og skolið. Skerið lauk, papriku, sellerí og salami í litla bita og ostinn í strimla, skolið baunirnar. Blandið öllu saman í stóra skál. Hrærið allt saman sem í dressinguna á að fara og hellið síðan yfir salatið. Látið standa í kæli í amk. klukkutíma og berið síðan fram með ristuðu brauði eða öðru góðu brauði.

súkkulaðikakan hin franska

2008-05-10T17:26:00.000Z

Hallveig, er þetta ekki þín?

Frönsk súkkulaðikaka

Innihald:

200 gr. Smjör
200 gr.suðusúkkulaði (gott að hafa 100 gr. 70°)
4 egg
1.5 dl sykur
1.5-2 dl hveiti
1 tsk lyftiduft

Aðferð:

Bræðið saman smjör og súkkulaði.
Þeyta saman sykur og egg þar til ljóst og létt.
Blanda út í það smjöri, súkkulaði, hveiti og lyftidufti og hræra vel.
Setja í smurt springform og baka við 200° í ca. 15 mínútur.

Berið fram með þeyttum rjóma og jarðarberjum ef vill.

pasta í túnfiskostarjómasósu

2008-03-15T13:26:00.003Z

jámm, þetta er alveg eins gott og það hljómar. Kom reyndar ekki öllu í nafnið sem hefði eiginlega þurft að vera þar.

Við hönnuðum þennan rétt eftir að hafa fengið gríðargóðan pastarétt í München fyrir um 19 árum. Í honum voru ólífur og túnfiskur og rjómi, reyndar enginn ostur. Bættum honum sjálf inn. Þetta er í miklu uppáhaldi hér á bæ:

500 g spakettí

1 dós af túnfiski í olíu
2-3 hvítlauksrif
10-15 grænar ólífur skornar í tvennt
góður biti af gulum osti að eigin vali (brauðostur virkar fínt), kannski svona 200 g
1 peli rjómi
örlítið af sósuþykkjara

Sjóðið spakettíið eftir leiðbeiningum á pakka

Á meðan, skerið ostinn í mola, hellið olíunni af túnfiskinum í pott. Saxið hvítlaukinn eða kreistið og steikið smástund. Bræðið ostinn í hvítlauksolíunni við fremur vægan hita. Setjið ólífur út í. Hellið rjómanum saman við í skömmtum og hrærið hverjum skammti saman við ostinn til að hann fari ekki í kekki. Nauðsynlegt getur verið að jafna sósuna með smá sósuþykkjara.

Þegar pastað er soðið, hellið af því og blandið túnfiskinum saman við. Sósunni er síðan hellt yfir og blandað saman.

Með þessu má bera nýrifinn parmaost ef vill, en okkur finnst það reyndar ekki bæta réttinn sérstaklega.

jólajóla

2007-12-14T14:31:00.000Z

Gerði þessar og lagaði þær aðeins til til að þær væru aaaðeins skárri í heilsupakkanum ;)

rosalega góðar!

Appelsínusúkkulaði smákökur

100 gr muscovado sykur (ljós púður.. ég nota nú bara frá kötlu, í upprunalegri uppskrift 150 gr)

100 gr hrásykur (upprunalega 50 gr)

250 gr mjúkt smjör

275 fínmalað spelthveiti (hér er í upprunalegu uppskriftinni hvítt hveiti og þá 300 gr)

4 msk mjólk (ef notað hveiti þá 2 msk) í uppskrift stendur ný en ég nota nú bara létt

50 gr pekanhnetur gróft saxaðar

175 gr gróft saxað orange suðusúkkulaði

Forhitið ofninn í 160°. Hrærið vel saman smjör og sykur, bætið hveiti og mjólk saman við og hrærið vel saman, og hrærið svo að lokum saman við hnetum og súkkulaði.

Setjið teskeið af deigi fyrir hverja köku, best er að nota tvær skeiðar. Passið að hafa nóg bil á milli þar eð þær leka töluvert út. Fletjið deigið létt út með blautum fingrum. Bakið í 15-20 mínútur ofarlega í ofninum.

Osso buco milanese

2007-11-18T12:08:00.000Z

Vorum með Osso buco og risotto milanese, einu sinni sem oftar, í matarboði í gær. Uppskrift pöntuð, þannig að upplagt er að birta þetta hér.

Þessi réttur er afskaplega gestaboðsvænn, þar sem öll vinnan við hann getur farið fram löngu fyrir boðið.

Osso buco milanese:

(fyrir fjóra)

4 sneiðar nautsskankar (osso buco kjöt, fæst oftast í Nóatúni)
salt og pipar
25 g ólífuolía eða smjör
500 g tómatar, mega vera úr dós (nota alltaf dósatómata, ekkert síðra)
3 dl þurrt hvítvín
1 tsk þurrkað marjoram eða 1 msk ferskt
um 1 dl vatn (má sleppa, ef safinn af dósatómötum er notaður)

Kryddvöndull:
1 búnt steinselja
kvistur af timjani
1 lárviðarlauf

Skerið aðeins inn í ytra borð sneiðanna á 1-2 stöðum svo þær myndi ekki skál þegar þær steikjast. Hitið smjörið eða olíuna í stórum potti og brúnið sneiðarnar á báðum hliðum. Hellið helmingnum af hvítvíninu yfir og látið sjóða án loks í um 5 mínútur.

Ef notaðir eru nýir tómatar þarf að afhýða þá og hakka, annars bara hakka. Má hella safanum af dósatómötum, ég geri það samt aldrei. Bindið saman steinselju, timjan og lárviðarlauf fyrir kryddvöndulinn.

Setjið tómata, salt, pipar, marjoram, afganginn af hvítvíninu, vatn og kryddvöndul út í pottinn. Látið sjóða við vægan hita í 3 1/2 - 4 klukkustundir. Ef notaðir eru kálfaskankar þarf ekki nema um 1 1/2 tíma. Kjötið á að hrynja af beinunum.

Risotto milanese:

1 lítill laukur
1 msk smjör
300 g arboriogrjón eða önnur risottovæn hrísgrjón
um 600 ml gott soð (helst ekki af teningi)
Klípa af saffrani, steytt vel
3-4 msk nýrifinn parmaostur
meira smjör
salt
pipar

Hakkið laukinn frekar fínt og steikið 2-3 mínútur á víðri pönnu í smjörinu. Laukurinn á ekki að brúnast. Setjið grjónin saman við og hrærið þar til þau eru þakin feiti. Kryddið með salti og pipar.

Hafið soðið nálægt suðupunkti við hlið pönnunnar. Hellið 1/2-1 ausu í einu út á grjónin, hrærið nær stanslaust. Kryddið með saffraninu. Ekki á að setja meira soð fyrr en grjónin eru farin að æpa úr þurrki. Þetta tekur um 20-25 mínútur. Nauðsynlegt að hafa glas af hvítvíni við höndina. (til að drekka, sko, ekki hella út á, neitt...)

Þegar grjónin eru orðin mjúk, er parmaostinum og smjörinu hrært saman við.

Ef vill má hætta að ausa soði aðeins áður en grjónin eru orðin mjúk, setja lok á pönnuna og slökkva undir. Hræra síðan parmaostinum og smjörinu saman við og hita rísottóið upp þegar á að bera það fram.

Gremolata:

1-2 hvítlauksrif
1 búnt steinselja
rifinn börkur af einni sítrónu (helst lífvænt ræktaðri)

Hakkið steinseljuna, pressið hvítlaukinn og blandið saman, ásamt sítrónuberkinum.

Berið osso bucoið fram með rísottóinu og gremolötu, ásamt meiri nýrifnum parmaosti.

Andabringur með kirsuberjasósu

2007-11-04T18:53:00.002Z

vorum um daginn með snilldartilraunarétt. Lengi búin að vera að spá í að prófa þennan rétt úr Landsliðsréttabók Hagkaupa. Nema hvað, við áttum tvær andabringur í frysti, tókum út og þíddum í ísskáp. Ætluðum að hjóla í réttinn en, uppgötvuðum að í sósuna áttum við ekki fersk eða frosin kirsuber, bara niðursoðin í eigin legi, ekki púrtvín, bara sérrí, ekki andakraft, bara kjúklingakraft og ekki hindberjaedik. Sykur var reyndar til.

Þannig að við fórum eftir uppskriftinni hvernig ætti að steikja bringurnar (krossskera í fituhliðina án þess að fara inn í kjöt, steikja síðan 5 mínútur á góðum hita á fituhliðinni, 1 1/2 mínútu hinum megin, og bara salt og pipar). Sósan var impróvíseruð. Safinn af kirsuberjunum (þetta var ekki svona kirsebærsauce heldur dessertkirsebær í eigin safa - ef kirsebærsauce þá bara ein msk púðursykur), 2 msk púðursykur, 1 msk sérrí, 1 msk kjúklingakraftur, sleppti alveg edikinu en saltaði aðeins. Soðið niður í góða stund áður en berjunum sjálfum var bætt saman við. Setti síðan reyndar öööörlítið af sósujafnara, hún má alls ekki vera þykk en heldur kannski ekki alveg eins og vatn. Í hæsta lagi hálf matskeið.

Með þessu vorum við með lambasalat með kirsuberjatómötum og smá balsamediki (sleppi líklega tómötunum næst og set mögulega melónubita eða álíka í salatið, sýran var ekki alveg að gera sig) og smjörsteiktar kartöfluskífur.

gráðostapasta

2007-09-25T20:32:00.000Z

þessi uppskrift er heimatilbúin:

1 pk gott beikon
1 rauð paprika í bitum

1/2 gráðostastykki og annað eins af brauðosti
1 ds sýrður rjómi
smá sósuþykkjari (maízena)

pasta, helst þrílitir pennar (penne tricolori)
parmaostur

Pastað soðið eftir leiðbeiningum á pakka

Beikonið klippt í bita og steikt á pönnu. Tekið af pönnunni. Megninu af feitinni hellt af (ef einhver) og paprikan steikt á sömu pönnu. Líka tekið af pönnunni. Gráðosturinn og hinn osturinn bræddur, sýrða rjómanum hrært saman við og þykkt örlítið.

Sósunni hellt yfir heitt pastað, beikoni og papriku blandað saman við og nýrifnum parmaosti stráð yfir. Af þessu er mjög milt og fínt gráðostabragð, rétturinn er sérlega vinsæll af börnunum mínum (sem ekki líta við gráðosti í hreinustu mynd)

undir ítalskri sæng

2007-09-19T20:50:00.000Z

Þetta er uppskrift úr sænsku vikublaði (minnti mig svolítið á þetta og vona nú að minnið hafi ekki brugðist mér algerlega...):

svínalundir (u.þ.b. 700 gr)
salt og pipar
olía til steikingar
125 g mozzarella
1 dl grilluð paprikka
1/2 basilíkuplanta
1/2 dl valhnetur
2 hvítlauksgeirar

1. Hreinsa lundirnar (fjarlægja himnur og svoleiðis), salta og pipra. Steikja lundirnar í olíunni þangað til þær fá á sig gullinn bjarma. Setja svo í 175° heitan ofn í u.þ.b. 15 mínútur.

2. Brytja mozzarellaostinn niður. Skera paprikkuna í teninga, hakka basilíkuna, hneturnar og hvítlaukinn. Blanda öllu saman. Salta og pipra. Ég jók nú magnið af þessu öllu saman af því mér fannst þetta svo lítið, en það var eiginlega óþarfi.

3. Sneiða lundirnar og leggja í eldfast mót. Hella gumsinu yfir og setja inn í 225° heitan ofn í u.þ.b. 10 mínútur. Ég hellti safanum sem kom af kjötinu yfir allt (af því ég hélt að þetta myndi verða svo þurrt) en ég hefði ekki átt að gera það því þetta varð heldur mikið sull. En það bragðaðist vel.

Við erum svo löt þessa dagana að við átum bara soðnar kartöflur með. Annars er mælt með baunabelgjum og ofnsteiktum kartöflum ...

Maískólfar í lauksósu

2007-09-15T20:21:00.000Z

Þessi uppskrift, úr bókinni Curry Lover's Cookbook var prófuð hér í kvöld. Ekki annað um það að segja en að þetta var hrikalega mikið sælgæti. Þurftum að kaupa svolítið af kryddinu til að geta gert þetta, en nú eigum við það...

4 heilir maískólfar, teknir í tvennt (við notuðum frosna hálfa)
olía til steikingar
1 stór laukur
2 hvítlauksrif
5 cm biti af fersku engiferi (þorði ekki, notaði þurrkað)
1/2 tsk túrmerikduft
1/2 tsk laukfræ
1/2 tsk cuminfræ
1/2 tsk fimmkrydd (pae-lo krydd)
6-8 karrílauf (voru ekki til, henti bara smá karríi út í - ekki sama en gott samt)
1/2 tsk hrásykur
200 ml hrein jógúrt
chiliduft eftir smekk

Maukið lauk, hvítlauk, engifer og krydd í mixer, matvinnsluvél eða mortéli.

Steikið maískólfana við góðan hita í olíunni þar til þeir eru farnir að taka lit. Takið kólfana af pönnunni og kælið pönnuna örlítið. Meiri olía sett á pönnuna ef þarf (á að vera um 2 msk. eftir). Sú olía hituð og laukmaukið steikt rólega í 8-10 mínútur, þar til olían skilur sig frá og laukurinn hefur tekið kryddið vel í sig.

Kælið laukblönduna svolítið niður og hrærið jógúrtinni saman við. Setjið maískólfana aftur í sósuna, snúið þannig að þeir séu þaktir sósu eins og hægt er, setjið lok á pönnuna og hitið við mjög vægan hita í 10 mínútur.

Berið fram með naanbrauði og góðum bjór. Það er ekkert salt í uppskriftinni, við vorum með gott salt á borðinu, sumir vildu en aðrir ekki.

Sólberjabaka frá Alsace

2007-09-05T22:53:00.000Z

Þessi er árlegur viðburður eftir sólberjatínslu hér á bæ. Mmmmh

Fylling:
250 g fersk sólber (eða önnur ber að vild)
5 msk sykur
1 dl rjómi
1 egg
1 eggjarauða

deig:
50 g smjör
60 g sykur
1 egg
60 g hveiti (gæti þurft meira)

einnig:
1 msk flórsykur
smjör til að smyrja formið

1. Skolið berin og látið renna af þeim. Stráið yfir þau 3 msk af sykri (þarf ekki við minna súr ber). Hitið ofninn í 175°

2. Hrærið vel saman smjöri og sykri. Hrærið egginu saman við og bætið hveitinu síðast við.

3. Smyrjið bökuform, dreifið deiginu jafnt um formið og upp á kantana.

4. Þeytið afganginn af sykrinum, rjóma, egg og eggjarauðu saman í skál. Raðið berjunum á bökubotninn og hellið sykurblöndunni yfir.

5. Bakist um 40 mínútur í miðjum ofni. Látið kólna örlítið og sigtið svolítinn flórsykur yfir.

Fer vel með ís eða þeyttum rjóma

sveppapasta

2007-08-10T21:34:00.000Z

ekki beinlínis megrunarfæði en hrikalega gott:

Sveppapasta

100-200 g nýir villisveppir
smá smjör

ferskt óreganó (hellingur)
smá maldon salt
1 tsk púðursykur
1/2 tsk kálfakraftur
1 peli rjómi
1 peli kaffirjómi
örlítið af sósuþykkjara

meira salt ef þarf

Fettucine eða tagliatelle pasta
Nóg af nýrifnum parmaosti

Sjóðið pastað eftir leiðbeiningum.

Steikið sveppina á pönnu í smjörinu ásamt oreganóinu. Myljið yfir smá salt. Hellið rjómanum og kaffirjómanum yfir og látið suðu koma upp. Bætið kálfakrafti og púðursykri við ásamt sósujafnara eftir smekk (ekki gott að þetta verði mjög þykkt). Sjóðið saman smástund.

Látið vatnið renna af pastanu og hrærið sósunni strax saman við. Berið fram með parmaostinum.

rabarbarabaka

2007-08-02T23:49:00.000Z

Þessi hefur ekki komið hér fyrr, held ég:

RABARBARABAKA:

2 skeiðar hveiti
1/2 bolli sykur

blanda, setja í eldfast mót

2-3 rabarbarastilkar skornir niður og settir yfir (reyndar betra að rabarbarinn hafi frosið, nóg í 1-2 tíma)

1/2 bolli hveiti
1/2 - haframjöl
1/2 - púðursykur

blandað saman og sett ofan á

1/2 bolli brætt smjör

sett efst.

Bakað í 1/2 klst á 175° c

uppáhalds yams uppskriftin

2007-07-03T20:27:00.000Z

eða sætar kartöflur eru yams yfirleitt kallaðar, örlítið ónákvæmt þar sem plantan er alls ekkert skyld kartöflum, mun frekar rófum.

allavega...

Þessi uppskrift birtist í Mogganum í fyrrasumar, ef ég man rétt heitir höfundurinn Brynja. Þannig að ekki vil ég eigna mér hana. En góð er hún og passar með hinu og þessu. Notuðum þetta með grilluðu hrefnukjöti á sunnudaginn var.

Fyrir okkur 5 dugar:

2 stór yams
salt
smá ólífuolía

1 box hvítlauksrjómaostur
1 dós sýrður rjómi

Yams skorið í passlega munnbita, sett í eldfast fat, saltað að smekk og ólífuolíu ýrt yfir. Bakað í ofni við 200° í amk. 40 mínútur eða þar til bitarnir eru alveg mjúkir (hálfhart yams er óætt).

Rjómaosti og sýrðum rjóma hrært saman og hrært saman við bakað yams

Í uppskrift Brynju var þetta með grilluðum hamborgurum en synd að nýta þetta ekki oftar. Hins vegar vantar eiginlega almennilegt nafn yfir þetta fyrirbæri. Tillögur óskast.

trúi

2007-04-06T19:25:00.000Z

ekki að ég hafi aldrei sett hér inn aðalpastaréttinn :-O

Tagliatelle verdi alla Bolognese

úr Hundrað góðar pastasósur eftir Diane Seed

500 g grænt tagliatelle eða eggjapasta
150 g magurt beinlaust svínakjöt
150 g magurt beinlaust nautakjöt
2 msk ólífuolía
80 g smjör
1 meðalstór laukur
1 gulrót
1 leggur sellerí
100 g beikon
50 g nýjar ítalskar pylsur eða hreint pylsukjöt (nota hér pepperóní, helst sterkt)
1 glas hvítvín
1 msk tómatþykkni
1 vínglas af soði
salt, svartur pipar úr kvörn
0,75 dl rjómi
nýrifinn parmaostur (má sleppa)

Hakka kjötið í hnífakvörn (mixer) eða fá það hakkað í versluninni. Hita olíu og 50 g af smjörinu og setja saxaðan lauk, gulrót og sellerí út í ásamt smátt söxuðu beikoni. Láta malla hægt í um 10 mín, bæta þá við kjöti, pylsukjöti án skinns og víni. Sjóðið áfram í 10 mín. og hrærið í öðru hverju. Hræra tómatþykkni út í soð og bæta í pottinn. Hræra og krydda eftir smekk. Sjóða við vægan hita í 1 1/2 klst. Blanda rjómanum saman við og taka síðan pottinn af hitanum, en halda sósunni heitri. Sjóða pasta. Hita sósuna aftur og hræra út í hana smjörið sem eftir varð. Láta renna af pastanu, setja á heitt fat og bæta sósu við.
Þessi réttur er oft borinn fram án þess að sósu og pasta sé blandað saman, heldur er sósan höfð í pastanu miðju. Sennilega er best að bera réttinn þannig á borð í allri sinni dýrð, en hræra vel áður en skammtað er á diskana. Þeir sem vilja hafa ostinn með

gítarpasta

2007-02-18T21:34:00.001Z

nei, þetta eru ekki soðnir gítarstrengir, en gott er það.

Nú fæst chitarrapasta í Frú Laugu, húrra!

1,25 kg lambakjöt
1 1/4 bolli hvítvín
salt og nýmalaður pipar
1 bolli jómfrúrólífuolía
4 hvítlauksrif, léttpressuð með hnífsblaði
5 lárviðarlauf
1 kíló tómatar, afhýddir og grófsaxaðir eða 2 dósir tómatar
6 stórar paprikur, (blandaðir litir) skornar í ræmur (við notum nú minna, tvær í dag)
2 bollar gott soð
650 g gítarpasta/spakettí
fullt af nýrifnum parmaosti

Skerið hluta lambakjötsins í fallega bita og hakkið afganginn. Skolið kjötið upp úr víninu (geymið vínið) og kryddið með salti og pipar. Hitið olíuna í stórri þykkbotna pönnu og steikið hvítlaukinn og lárviðarlaufin við meðalhita. Takið hvítlaukinn upp úr þegar hann hefur brúnast og bætið kjötinu og hakkinu á pönnuna og brúnið. Hellið víninu saman við og sjóðið niður. Takið lárviðarlaufin úr pönnunni og hendið þeim. Bætið tómötunum (með safa ef notið niðursoðna) og paprikustrimlunum á pönnuna. Kryddið með salti og pipar og setjið lok á pönnuna. Sjóðið við lægsta hita í 2 klst, hrærið af og til. Fylgist vel með réttinum og bætið soði við ef hann lítur út fyrir að vera að þorna.

Berið fram með pastanu og parmaostinum.

verðykkuraðgóðu.

þorskur í raspi

2007-02-04T17:24:00.000Z

Áttum ekki brauðrasp svo ég muldi þrjár heilhveititvíbökur í morteli.

útí þetta fór(u) svo:

4 hvítlauksrif
hálft rautt chili (saxað mjög smátt)
hnefafylli af casew- og jarðhnetum (sem ég marði í mortelinu)
dágóður slatti af grada padano
salt og pipar
tvær teskeiðar af kumminfræjum

Blandaði saman einu eggi, skvettu af mjólk og smá balsamediki og dýfði þorskinum ofaní áður en ég velti honum uppúr raspinu.

Steikti í stutta stund á mjög heitri pönnu, setti í eldfast mót og inní ofn undir álpappír í korter.

jei

2007-01-25T23:04:00.000Z

ég kemst inn á brallið, liggaliggalái :-D

Hvað á ég að setja inn? brása uppskriptasafnið...

Uppáhalds súkkulaðikakan okkar. Kremið sérlega gott og kakan þvílíkt safarík. Mhmmm

125 ml heitt svart kaffi
50 g kakóduft
275 g púðursykur
125 g mjúkt smjör
3 egg, aðskilin
1 tsk (5 ml) salt
- - vanillusykur
- - sódaduft
150 ml sýrður rjómi (má vera 10%)
225 g hveiti, sigtað
125 g sykur

225 ml rjómi, þeyttur

Krem:
125 g suðusúkkulaði
150 ml sýrður rjómi
3 msk (45 ml) flórsykur, sigtaður

Blandið saman kaffi og kakódufti. Takið helminginn af hrærunni frá, og þeytið með púðursykri, smjöri, eggjarauðum, salti og vanillusykri. Blandið saman sýrða rjómanum og sódaduftinu, bætið saman við deigið, ásamt afganginum af kakó/kaffiblöndunni og hveitinu. þeytið eggjahvíturnar í mjúkt krem, bætið síðan sykrinum við, og þeytið þar til stíft og glansandi. Blandi› varlega saman við deigið.
Setjið deigið í vel smurt kökuform (ca. 23 cm). Bakið við 180° í 1 til1 1/4 klst, eða þar til prjónn sem stungið er í kökuna kemur út hreinn. Kælið á grind.
Krem: Bræðið súkkulaðið, kælið aðeins. þeytið saman súkkulaði, sýrðan rjóma og flórsykur.
Skerið kökuna í tvo botna, þekið neðri botninn með þeytta rjómanum, setjið hinn ofan á. Smyrjið kreminu ofan á kökuna og á hliðarnar.

Klunsentårta

2006-10-27T14:43:00.000Z

Klunsen á afmæli að minnsta kosti einusinni í mánuði. Þá er gerð Klunsentårta:

1 þrískiptur tertubotn
1/2 peli rjómi
jarðarberjasultutau
vanillukrem
vínber/kíví til skreytinga
tertuskraut

Jarðarberjasultutauinu er smurt á neðri hæðina en vanillukreminu á þá efri. Skreytt með þeyttum rjóma, vínberjum/kíví og tertuskrauti.

þistilhjartnakaramellur

2006-08-07T12:47:00.000Z

gerðum frábæran forrétt í gær, talsvert maus, reyndar en vel þess virði. Sló líka þokkalega í gegn. Heimalagað pasta, fyllt með þistilhjörtum og ostakremi:

Pasta: (uppskrift frá Nönnu)

300 g. hveiti, meira ef þarf
4 egg (gefur reyndar upp 3, en það munar mjög miklu að bæta við því fjórða við)
1 msk olía
1/2 tsk salt

Hveitið sigtað á vinnuborð og laut gerð í miðjuna. Eggin brotin og sett í lautina ásamt olíu og salti. Hrært og síðan er farið að blanda hveitinu smátt og smátt saman við með fingrunum en þess gætt vel að eggin renni ekki út úr lautinni og yfir vinnuborðið. Haldið áfram þar til búið er að vinna allt hveitið inn í deigið; gott er að nota spaða eða sköfu til að skrapa upp deig sem klessist við vinnuborðið. Deigið hnoðað vel þar til það er silkimjúkt og teygjanlegt. Mótað í kúlu, skál hvolft yfir og látið standa við stofuhita í um hálftíma. Þá er deigið flatt út á hveitistráðu borði, helst með löngu og mjóu kökukefli. Flatt út eins þunnt og hægt er, annaðhvort í lengjur eða eina stóra plötu. Þegar það er orðið álíka þykkt og póstkort er það lagt yfir prik og látið þorna örlítið.

Við fletjum reyndar út í pastavél, það er auðveldara, en þetta er ss. alveg hægt án þess að eiga slíka græju.

(síðast þegar við gerðum þessa uppskrift ætluðum við að flýta fyrir okkur og kaupa tilbúnar lasagnaplötur. Stór mistök, Jón Lárus byrjaði að búa til pastað þegar gestirnir voru komnir á staðinn og forréttur var ekki borðaður fyrr en um níu. Stress dauðans!)

Fylling:

4 fersk þistilhjörtu
1 laukur, saxaður
250 g ricottaostur
50 g parmaostur
2 1/2 dl gott soð
1 egg
smjör til steikingar
sítróna
salt

smjör
fersk salvía

Skerið blöðin utan af þistilhjörtunum (ath, ekki henda blöðunum, þau má sjóða sér og borða innihaldið með hollandaisesósu. Mmm!) Skerið hjörtun í átta bita hvert og geymið í vatni með sítrónu til að varna þess að þau dökkni um of. Laukurinn mýktur í smjörinu, hjörtun sett saman við ásamt soðinu og látið malla þar til þau eru passlega mjúk (10-15 mínútur).

Eggið þeytt, ricotta og rifnum parmaosti bætt saman við.

Samsetning:

Skerið pastadeig í ferninga, (um það bil 10*7 cm). Setjið einn bita af þistilhjarta á ferning ásamt lauk og ostablöndu. Leggið annað blað yfir fyllinguna, þrýstið jöðrunum saman og snúið upp á endana til að búa til karamellur.

Sjóðið í nægu vatni í 2 mínútur, eða þar til karamellurnar fljóta upp

Borið fram með bræddu smjöri með fullt af ferskri salvíu klipptri saman við, og meiri parmaosti.

raita

2006-07-10T13:46:00.000Z

hálf röspuð gúrka (þegar maður er búinn að raspa hana kreistir maður safann úr gumsinu)
2-3-4 dl hreint jógúrt (eftir smekk)
1 hvítlauksrif
safi úr hálfu læmi
smá chiliduft

ég poppa svo nokkur kumminfræ á snarpheitri eldavélarhellunni og myl þau yfir.

grænmetistikka

2006-07-10T13:34:00.000Z

það er eiginlega ekki til nein uppskrift .... bara ímyndunarafl ... og smá g&t
Það er hægt að nota hvaða grænmeti sem er og ef maður er í þannig skapi má alveg skella kjúkling saman við.

Ég nota mikið af kryddi. Mjög mikið.

Grænmeti (t.d. 6-8 kartöflur, 1 laukur, 2 lítil fennel, 2 gulrætur, 1 zuccini, 1/2 blómkálshaus, 1 paprikka, 1-2 rauð chili)
sex vel þroskaðir tómatar
nokkrar matskeiðar af tikkapeist, eða bara einhverju karrípeist
2-3 dl af hreinu jógúrti
kumminfræ
haldi/túrmerik/gúrkmeja
kóriander
sinnepsfræ
garam masala
1 dl vatn

Þessi uppskrift dugir fyrir 6-8 (og þá er smá afgangur daginn eftir)

Hita krydd í olíu og smjöri á pönnu. Steikja grænmeti í hollum og færa yfir í mjög stóran pott. Sulla peistinu og jógúrtinu yfir. Brytja tómatana í mjög litla bita og setja útí ásamt með smá vatni. Láta malla í klukkutíma.

kjúklingabaunakarrí

2006-07-10T13:21:00.000Z

þetta er líka eftir mjög grófu minni

tvær dósir af kjúklingabaunum
ca. 400 grömm af hökkuðum tómötum úr dós (ekki nota eitthvað drasl með kryddi í ... ég var eitthvað utanvið mig þegar ég var útí búð og keypti eitthvað með ítölsku kryddi og hvítlauk ... viðbjóður!!!)
tveir stórir laukar
fjögur hvítlauksrif
engifer (u.þ.b. 1 teskeið, ég notaði eina matskeið)
kumminfræ eftir smekk
2 tsk haldi/túrmerik/gúrkmeja
1 tsk garam masala
1 tsk kóriander
1 tsk chiliduft

hita olíu og smá smjörklípu í meðalstórum potti (betra að nota ghee, náttúrlega), hita kummin,haldi,garam masala duglega og lækka hitann, svissa laukinn þar til hann er mjúkur, ekki brúnn ... bæta hvítlauk, engifer, kóriander, chili út í og svo kjúklingabaununum (muna að hella safanum af fyrst) og tómötunum.

láta malla á lágum hita í 15 mín, voilà!

dhal

2006-07-10T13:01:00.000Z

nú voru góð ráð dýr, laukur í uppskriftinni en enginn í ísskápnum ... þá var notað blómkál í staðinn

og þetta er eftir mjög grófu minni

3 dl rauðar linsur
5 dl vatn
blómkálshaus
duglega af hvítlauk og engifer
kummin steytt úr hnefa
sletta af haldi/túrmeriki/gúrkmeju eða hvað það nú heitir þetta appelsínugula og kórianderdufti
smjör og olía (náttúrlega best að nota ghee)
salt eftir þörfum og ögn af sykri

skola linsur og hreinsa burt skemmdar ... láta liggja í vatni meðan blómkálið er steikt
smjörklípa og skvetta af olíu hitað duglega í meðalstórum potti (bara passa að það kvikni ekki í olíunni)
kumminfræin, haldiið og kórianderið hitað þar til kumminfræin byrja að poppa.
taka pottinn af hellunni og skella blómkálinu út í og hræra duglega. þegar hitinn hefur jafnað sig má bæta engiferinu og hvítlauknum út í ... steikja saman smá.
hella vatninu af linsunum, skella þeim yfir blómkálið saman með 5 dl af vatni.
láta suðuna koma upp og láta svo malla rólega í u.þ.b. 15 mínútur. Hræra í af og til.
Síðustu fimm mínúturnar verður maður að standa yfir pottinum því allt heila klabbið getur auðveldlega brunnið við.

Svo lætur maður þetta jafna sig í pottinum, hrærir af og til, og saltar eftir smekk.
Það þarf ekkert að sykra, en 1/4-1/2 teskeið gerir reyndar gæfumuninn.

Þetta má standa á bekknum í klukkutíma áður en maður borðar, annars má líka alveg hita upp.

staðið við minn hluta dílsins

2006-07-10T12:56:00.001Z

hér kemur laxinn úr afmælisboði helgarinnar, uppskriftin var í mogga allra landsmanna og alveg svakalega góð:

Lax í kryddlegi
f. 4

laxasneiðar, ca 1 á mann.

lögur:
1/2 dl ólífuolía
1 msk hvítvínsedik
1 msk dijon sinnep
1 msk sætt sinnep
2 hvítlauksrif marin
1 tsk nýmalaður svartur pipar
1 msk ferskt estragon (1 ein tsk þurrkuð)

blandið öllu saman og leggið laxinn í löginn í um það bil hálftíma og grillið svo við meðalhita í nokkrar mínútur á hvorri hlið.

með þessu sauð ég brún hrísgrjón og gerði sósu úr sýrðum rjóma, dijon sinnepi, hunangi, smá maldon salti og fersku estragoni. Í mogganum var mælt með grilluðum bökunarkartöflum með guacamole með þessu en ég nennti því nú ekki oní svona margt fólk. Svo hafði ég fermingarsalatið hennar Hildigunnar, vínin voru cloudy bay chardonnay og svo gott Chablis og í desert þetta hér. Ekkert nema snilldin ein.

varud!

2006-06-11T10:13:00.000Z

Er buin ad gera skyrtertu og braud i vikunni eftir uppskriftum fra Joa fel. Badar algerlega misheppnadar. Alltof mikill sykur i tertunni og of mikid af thurrefnum i braudinu. Vil bara vara vid uppskriftum fra honum...

Fermingarkjúklingur

2006-05-17T12:00:00.000Z

nei, ég er nú ekki að tala um 14 ára gamla hænu, bara kjúklingaréttinn sem við buðum upp á í fermingarveislunni miklu um daginn. Þekktur réttur, margir prófað en ef ekki...

Kjúklingalæri, steikt í stutta stund á pönnu.

1 p rjómi
1 dl aprikósumarmilaði
1-1 1/2 dl barbekjúsósa (Hunt's Original)
1/2 dl sojasósa
smá púðursykur

allt hrært saman í potti við smá hita
hellt yfir kjúklinginn

steikja í ofni við 180-200 í 1 klst

berist fram með hrísgrjónum og góðu salati að eigin vali.

Einu sinni sem oftar, þegar við vorum að kaupa inn fyrir þennan rétt var Freyja með okkur í búðinni. Jón kallar yfir til mín hvort við eigum barbekjúsósu. Freyja hváir við: BARBÍKJÖTSÓSU???

salatið

2006-04-18T18:14:00.000Z

var beðin um uppskriftina að salatinu úr fermingarveislunni miklu. Kemur hér án uppgefinna magna. (sic)

ferskt spínat
vel þroskað avocado
sítróna
furuhnetur
parmaostur

Spínatil skolað og sett í skál, avocado skorið í bita, sítróna kreist yfir til að kjötið dökkni ekki. Furuhnetur ristaðar á pönnu og hellt yfir, parmaostur skorinn í frekar stórar flögur og dreift yfir í lokin.

Ég var ekki með neina sósu en það mætti náttúrlega skvetta yfir þetta smá af góðu balsamediki. Hefði sjálf kosið að krydda avocadoið örlítið, jafnvel bara pínu salt. En þetta var annars nokkuð gott, bara.

kindarisotto himnaríkis

2006-03-19T20:12:00.000Z

þetta er án efa einn besti matur sem ég hef eldað á mínum húsmæðraferli og eins og margir vita, that´s saying a lot! Uppskriftin er staðfærð úr Gestgjafanum, leyfi mér að setja hana hér þar sem ég gerði þónokkrar breytingar. En það er sama, takk Gestgjafi :D

Hráefni:
2 msk smjör
2 msk ólívuolía
200 gr blaðlaukur skorinn í sneiðar
1-2 hvítlauksgeirar saxaðir
250 gr kindalundir eða fille, má nota lamb ef hitt er ekki til (bara dýrara og minna bragð ;))
2-3 tómatar, fræhreinsaðir og saxaðir smátt
100 ml þurrt hvítvín
maldon salt
nýmalaður pipar
nokkrir þræðir saffran (má nota 1/4 tsk túrmerik í staðinn)
300 gr arborio grjón
1 l lamba- eða kjúklingasoð (notaði 50-50 þar sem ég átti bara einn lambakubb)
2 msk rifinn parmigiano ostur
nokkur blöð af basilíku, söxuð (ekki sleppa, gerði alveg bragðið!)

skerið kjötið í litlar, þunnar sneiðar, saltið og piprið og brúnið á pönnu í 1 msk olíu og geymið. Hitið kjötsoðið með saffronþráðunum að suðu og látið malla á lægsta hita.
Bræðið smjör og 1 msk olíu í þykkbotna potti og mýkið laukinn og hvítlaukinn, bætið svo hrísgrjónunum út í og hyljið með olíunni. Hellið hvítvíninu út í og látið gufa upp af. Bætið soðinu smám saman út í, 1/2-1 ausu í senn og látið gufa vel upp af á milli. Hér er algjörlega nauðsynlegt að hafa hvítvínsglas við hönd og góðan disk undir geislanum. Eftir um 10 mínútur bætið tómötunum og kjötbitunum út í og leyfið vökvanum af kjötinu að fylgja með, haldið svo áfram að bæta við vökva (um 15 mín í viðbót). Þegar hrísgrjónin eru búin að soga í sig allan vökvann er potturinn tekinn af og ostinum hrært saman við. Saltið og piprið eftir smekk, ég þurfti þó ekki að bæta neinu við. Stráið basilíkunni yfir og berið fram með restinni af hvítvíninu og meiri nýrifnum parmigiano.

ÓGEEEEEEEEÐslega gott og krakkarnir átu þetta upp til agna!

Eldfljótlegur Gambíupottur

2006-02-19T19:41:00.000Z

1/2 l vatn
150 g hnetusmjör
4 msk tómatþykkni (puré)
1 stór sæt kartafla
3-4 kjúklingabringur
1 kjúklingateningur
2-3 msk sykur (pálmasykur)
1 tsk kóríanderduft
bragðbætið með:
fiskisósu (eða salti)
piri-pirisósu (sambal oelek eða þvíumlíku)
--------------------------

Frá því að ég kom inní eldhúsið og þangað til maturinn var til liðu 35 mínútur (NB! bringurnar voru frosnar..) Maturinn er afar krakkavænn (farið varlega í piri-pirisósuna..).

Aðferð:
Hitið vatnið í stórum potti og hrærið hnetusmjörinu og tómatþykkninu saman við. Skerið bringur niður í sneiðar 0.3x3x2.5cm (svona sirka..) og setjið útí sjóðandi hnetusmjörsblönduna. Flysjið kartöfluna og skerið í munnbitsstóra bita (minni bitar þurfa minni suðu!). Sætar kartöflur þurfa skemmri suðu en venjulegar kartöflur. Bragðbætið og sjóðið þar til kjúklingurinn er gegnumsoðinn og kartöflurnar orðnar mjúkar. Bætið við vatni ef þarf. Hrísgrjón fara vel með. Athugið að það má nota kjúklingaleggi og/eða -vængi en það tekur lengri tíma. Það virkar líka að skreyta með ferskum kóríanderblöðum m m mmm ;)

hvernig er það...

2006-02-11T09:51:00.000Z

eru allir búnir gersamlega að missa áhugann á þessu?

Þetta er samkvæmt beiðni Þorbjarnar:

Kálfakjöt Parmigiano (fyrir 4)

3 matskeiðar ólífuolía

1 laukur, smátt saxaður

3 hvítlauksgeirar, pressaðir

1 dós niðursoðnir hakkaðir tómatar

1 glas rauðvín (má sleppa)

1 dós niðursoðin tómatsósa

1/2 teskeið þurrkað timian

400-500 gr kálfakjöt í þunnum sneiðum

1 egg

1/3 bolli parmigiano reggiano, rifinn

1/3 bolli brauðrasp

1 kúla ferskur mozzarella ostur, skorinn í sneiðar

Salt og pipar

Steikið lauk og hvítlauk á pönnu, bætið svo tómötunum og salti og pipar við og sjóðið
niður í 10 mínútur. Bætið tómatsósunni rauðvíninu (ef vill) og timianinu saman við og sjóðið
áfram í 20 mínútur.

Hitið ofninn í 200 gráður.

Á meðan sósan sýður, undirbúið kjötið:

hrærið egg á diski og blandið saman brauðraspi og parmigiano osti á annan disk. Skiljið eftir
svolítið af ostinum. Veltið kjötinu upp úr egginu og brauðmylsnunni og brúnið létt á hvorri hlið.
Raðið sneiðunum á eldfast fat, raðið mozzarellaostinum ofan á og hellið sósunni yfir. Stráið
afgangnum af parmigiano ostinum yfir.

Bakið í 30 mínútur.

Gott er að hafa með ofnbakaðar kartöfluskífur og gott hrásalat.

Sítrónuleginn kálfur og spínatsalat

2006-02-05T17:46:00.000Z

Prófuðum þetta í gærkvöldi, eigum afgang, get ekki beðið :-) Salatið gengur örugglega með ýmsu öðru eða þá bara út af fyrir sig sem forréttur eða léttur hádegismatur með ristaðri brauðsneið. Mmm. Kálfinn þarf að krydda að morgni eða kvöldið áður.

Uppskriftin ætti að nægja fyrir 6 manns.

Kálfurinn:

1 kg kálfalund
rifinn börkur af einni sítrónu
1-2 tsk fersk blöð af sítrónutimjani (fann ekkert svoleiðis, notaði bara venjulegt timjan, þurrkað)
1 1/2 tsk salt
nýmulinn pipar
smá ólífuolía til steikingar (notaði reyndar smjör en mjög lítið af því)
Safi úr einni sítrónu
1/2 tsk hrásykur

Nuddið kjötið upp úr sítrónuberki, timiani salti og pipri og látið liggja í 10-12 tíma
Steikið síðan á pönnu við meðalhita í 15 mínútur. Snúið oft. Takið af hitanum og hvílið í 10 mínútur. Hellið sítrónusafa og hrásykri á pönnuna, látið vökvann sjóða örlítið niður. Takið aftur af og látið hvíla í aðrar 10 mínútur áður en kjötið er skorið í sneiðar.

Gremolata:
2 dl fínsöxuð steinselja
1-2 hvítlauksrif
rifinn börkur af einni appelsínu

Öllu blandað saman, borið fram með.

Volgt sveppa- og spínatsalat:

750 g. blandaðir sveppir (já, eða bara venjulegir, við notuðum þannig)
2 skalottulaukar
100 g sólþurrkaðir tómatar
2 msk ólífuolía (ég sleppti henni, gerði ekkert til)
150 g ostur, grófrifinn eða í bitum (talað um gruyére eða emmentaler, ég notaði cheddar)
100 g ferskt spínat (ég notaði mun meira)
1/2 tsk salt
nýmulinn pipar

Steikið sveppina á þurri pönnu þar til mesta vætan er gufuð upp. Setjið tómata og hakkaða lauka saman við og steikið smá stund í viðbót. Takið af pönnunni, setjið ostinn saman við og leyfið að bráðna létt, hrærið síðan spínatinu saman við og smakkið til með salti og pipar.

Berist fram með bökuðum eða ofnsteiktum kartöflum. Algjört nammi.

kóksvínið

2006-01-02T01:03:00.001Z

(og ekki láta ykkur dreyma um að nota pepsí...)

Vorum með kóksvínið hennar Nigellu um áramótin. Mæli sterklega með því (svona til hliðar, söknuðum þín úr eftirpartíinu, Gunnar Hrafn)

Hér fær maður engar léttsaltaðar skinkur þannig að ég spurði Nönnu hvernig ég færi að því að verka kjötið. Svarið var: "Settu hann í pækil. Byrjaðu á að sjóða saman 1 kg gróft salt og 100 g sykur með slatta af vatni (og kryddi ef vill), kældu, settu kjötið í og bættu við ísköldu vatni eftir þörfum."

Gerði þetta allt saman samviskusamlega. Henti saman við nokkrum lárviðarlaufum og negulnöglum. Lét liggja í 3 daga, snéri einu sinni á dag (hmm, Jón Lárus snéri, einu sinni á dag)

Svo var uppskriftin sjálf. Ættuð úr Trashy kafla Nigella Bites:

ein léttsöltuð svínasteik (notuðum bóg, passlega fituspengdur)
1 laukur, afhýddur og skorinn í tvennt
Kók, með sykri, nóg til að dekka steikina

glasering:
kúfuð matskeið af sírópi (átti að vera dökkt en ég fann það ekki, notaði bara Tate&Lyle í dós)
2 msk sinnepsduft
2 msk hrásykur

slatti af negulnöglum

Kjötið og laukurinn sett í stóran pott (í mínu tilfelli svart ofnfat, of stór fyrir pottana mína). Hellt yfir kóki svo fljóti yfir. Ná upp suðu, lækka hitann niður í mall, mallist í tvooghálfan til þrjá tíma. Skiptir ekki stóru máli hvað steikin er stór, þetta ætti að duga. Hitið ofninn í 240°. Hirðið steikina upp úr pottinum, kælið örlítið, smyrjið feitihluta steikarinnar með sírópinu, nuddið inn sykri og sinnepsdufti og skerið í hana tíglamynstur. (Nigella segir skera burtu pöruna, það er rugl. Fólk hakkaði í sig pöruna þegar einhver fann hana frammi í eldhúsi og kom með inn á borð. Þeir sem vilja ekki fitu geta sjálfir skorið hana burtu á sínum eigin diski). Raðið nokkrum negulnöglum í rendurnar, eins og á pörusteik.

Grillið á í ofninum eða ofninn í 250°, steikin inn, grillið tekur bara 2-3 mínútur (EKKI gleyma steikinni inni, annars þarf að henda besta partinum, brenndur, aftur personal experience), vel heitur ofn um 10 mín.

bara snilldin!

1.sti í Tæ: Tom ka (gai)

2005-12-04T16:12:00.000Z

2 dósir kókósmjólk
1/2 l vatn
1 kg kjbringur (skornar í 2-3mm sneiðar)
6x2 cm galangalrót (skorin í 2-3mm sneiðar)
5 laukar (litlir ca. 3 cm í þvermál. Skornir í 6 báta.)
6 læmblöð (skorin í ca þrennt)
1/2 dl sykur (pálma eða venjulegur)
4 sítrónugrasstilkar (neðsti helmingur notaður, skáskorinn í ca 3cm lengjur. Hendið ystu blöðunum.)
1 tsk salt
fiskisósa
5 stilkar ferskt kóríander (til skrauts)
------------------
Verklýsing:
Sjóðið kókósmjólk og vatn og setjið niðurskorinn kjúkling útí ásamt galangal, sítrónugrasi og læmblöðum. Þegar kjúklingur er gegnumsoðinn bætið sykri og salti varlega útí og smakkið. Má vera minna og meira. Sjóðið í 40 mín (eða svo..). Setjið lauk útí og sjóðið í 20 mín í viðbót. Bætið fiskisósu útí eftir smekk. Setjið niðurskorið kóríander (með stilkum)útí rétt áður en rétturinn er borinn fram.

bearnaise DAUÐANS

2005-11-04T11:28:00.000Z

þetta er eiginlega frá Hallveigu ekki mér, blogger er þvílíkt að stríða henni:

Bearnaise sósa Nigellu

Innihald:

Essens:
2 msk hvítvínsedik
2 msk hvítvín (má líka setja 4 msk edik og sleppa víninu)
2 msk saxað estragon
Stilkarnir af estragoninu marðir og skornir gróft
1 msk kerfill (má setja meira estragon í staðinn)
1 tsk hvít piparkorn, lamin (bruised) eða mulin
1 skallottulaukur fínt saxaður

Sósa:
3 eggjarauður
1 msk kalt vatn
200 gr ósaltað smjör skorið í 1 cm teninga
Maldonsalt eftir smekk
Safi úr _-1/2 sítrónu

Setjið saman í pott edik, vín, lauk, stilkana af estragoninu, kerfil og 1 msk estragon (geymið hina til að hræra í sósuna síðast). Sjóðið niður í c.a. eina msk essens og kælið.
Setjið saman eggjarauður og vatn í skál og setjið yfir pott af vatni sem sýður við lágan hita. Blandið essensinum við og hrærið kröftuglega, bætið svo smjörinu við, einum kubbi í einu til að byrja með en eftir því sem líður á sósuna má fara meira í einu. Hrærið stöðugt og þegar smjörið er búið kreistið þið sítrónuna út í og saltið eftir smekk (í mínu tilviki fer c.a hálf teskeið af salti útí). Að lokum er afgangnum af estragoninu hrært saman við rétt áður en sósan er borin á borð.

Ef þarf að geyma sósuna í einhvern tíma áður en hún er borin fram er hægt að fylla stærri skál af VOLGU vatni, setja sósuna ofan í og breiða yfir viskastykki. Svo er hrært vasklega í henni áður en hún er borin á borð.

Nett norðurAfríkulegur kjúlli í römertopf..

2005-10-26T15:02:00.000Z

Kjúklingur (1 heill eða bringur 900g)
grænar ólífur (lítil krukka)
capers (hálf lítil krukka)
sveskjur (ca 200g)
rauðvínsedik 3/4 dl
ólífuolía 1og1/2 dl
salt og pipar
00000000000000000

Best að setja í eldfastmót með loki! Römertopf virkar ýkt vel. Rúmur klukkutími á rúmum 200 gráðum. Kúskús með. Fékk þetta hjá Huldu og Gauta, c.a. svona.. Er búin að elda þetta lonogdon síðan ;) Sveskjurnar verða ýkt jummí. Ekki spara þær. Magnið af ólífum og capers fer líka bara eftir smekk.

Mæli með pinotage þrúgunni frá S-Afríku með ;) Douglas Green er t.d. rosa góð!

ööööööööööööööööööööööööö
Auglýsi eftir Marokkóskum og fleiri N-Afríku inspíreruðum réttum!

steinbítur

2005-10-07T15:54:00.000Z

Ekki er nú hægt að segja að listinn iði beinlínis af lífi þessa dagana. Er enginn að elda neitt spennandi?

Við vorum með ansi góðan steinbít í gær, eldgömul uppskrift klippt út úr Mogganum:

800 grömm roðlaus og beinlaus steinbítur
Hveiti
salt
pipar
barbekjúsósa til að pensla, (við notuðum Hickory & brown sugar)
smá smjör (mætti sjálfsagt vera olía)

Fiskurinn skorinn í bita, hristur upp úr hveiti, salti og pipri. Penslaður með barbekjúsósu á öllum hliðum. Steiktur í smjörinu 2 mínútur á hlið.

Sem meðlæti höfðum við bara salat, vorum með kínakál, papriku og tómata og smá sinnepsdressingu. Engar kartöflur eða hrísgrjón eða neitt þannig.

Dugði vel í kvöldmatinn handa okkur fimm + kötturinn fékk meira að segja afgang. Öllum aldursflokkum þótti þetta gott, meira að segja stelpunum sem neita alltaf að borða fiskinn í mötuneytinu...

Frostpinnar...

2005-09-08T02:17:00.000Z

Alltaf kem ég með eitthvað hresst frá Kalí.
Ég og Hannes ættum nú að vera duglegri að setja inn uppskriftir þar sem við erum matgæðingar miklir.
Allaveganna kom smá ósk frá Helgu frænku um Kalífrostpinna.

Frostpinnarnir sem við erum byrjuð að búa til vegna óþolanlegs hita eru afgangar af
smoothies(-um) sem við höfum kannski gert fyrr um daginn.

Smoothies:

Frostnir ávextir.
(Í mínu uppáhaldi eru mangó og jarðaber-keypt frosið í matvöruverslunum(mangóið niðuskorið))
Vatn/ávaxtasafi
Banani
Sítrónusafi
eða hvað eina sem til er.

Smoothies (-inn) sem ég gerði um daginn sem heppnaðist svona ansi vel (sérstsaklega sem frostpinni) var búinn til úr frostnum jarðaberjum, nýkreistum appelsínusafa með aldinkjöti og vel þroskuðum banana. Allt sett í matvinnsluvél (sem þolir að brjóta niður ísmola) og drukkið með bestu lyst. Afgangur sem ekki komst fyrir í glasinu þínu er síðan hellt í frostpinnamót (fæst t.d. í IKEA), sett í frystinn og borðað síðar með bestu lyst. Er hinn fínasti eftirréttur á hversdagskveldum.

Hvað varðar mangóið finnst mér best að nota mangó með banana og smá sítrónusafa og síðan bara vatni til að vinna frostna mangóið. Annars er alltaf hægt að nota límonaði, eplasafa eða hvað sem til er til að vinna mangóið.

Það besta er að nota vel þroskaðann banana. Þeir eru svo ansi sætir.

Góðar stundir,
Gerður.

p.s. ef ég borða smoothies sem hádegismat finnst mér gott að nota hreint jógúrt með ávöxtunum. Verður aðeins matarmeira.
p.p.s. hvet alla til að eiga frystinn alltaf fullan af frostnum ávöxtum. Maður veit nefnilega aldrei hvenær mann langar í smoothies. Frystirinn minn er ávallt mjög girnilegur;-)

rifsberjakjúklingur

2005-09-05T13:37:00.000Z

Lofaði þessum víst á blogginu:

Nokkrir kjúklingabitar (ekki bringur)
15 g smjör
salt og pipar
1 lítill laukur, skorinn í teninga
100 g. rifsber
2 dl kjúklingasoð
1-2 tsk púðursykur
1/2 dl rjómi (má vera kaffi- eða matreiðslurjómi)
1 tsk maízena

Brúnið kjúklingabitana vel á heitri pönnu í smjörinu. Kryddið með salti og pipar (pipri?) Takið kjúklinginn af pönnunni og steikið laukinn. Setjið kjúklinginn aftur í pönnuna ásamt rifsberjum og soði. Látið malla undir loki í 35-40 mínútur eða þar til kjúklingurinn er fulleldaður. Takið bitana af pönnunni og haldið heitum. Hrærið saman rjóma og maízena og þykkið sósuna með blöndunni (í uppskriftinni er talað um að sía soðið í annan pott og þykkja þannig en mér finnst bara fínt að hafa laukinn og berin áfram í sósunni). Smakkið til með púðursykri, salti og pipar.

Berist fram með hrísgrjónum og góðu salati. Ekki verra að hafa líka gott hvítvín með. Mmmm!

Tamarind marinering

2005-09-04T20:23:00.000Z

3 msk tamarind paste
3/4 dl nýpressaður sítrónusafi (1oghálf)
0.25 dl soja
5 hvítlauksrif
20 g skrallaður engifer
1 stór rauður thai chili EÐA 1 tsk chaianpeppar EÐA 1 tsk piripiri sósa
1 tsk malað kummin
1 tsk malað kóríander
1 msk hrásykur (eða púður eða venjulegur)
Sett í mixara
-------------------

Leggið kjúllan í þetta (dugir á ca. 1 kg af bringum) og sveppi og grillið daginn eftir.
Klikkað gott!

jarðarberjakokkteill

2005-06-13T23:11:00.000Z

fengum hér mohito uppskrift um daginn, hér er uppáhalds sumarkokkteillinn okkar. Heitir Love in the afternoon, óxla væminn titill en kokkteillinn er algjört nammi, gæti reyndar alveg virkað sem flott desert frekar en fordrykkur.

(einfaldur)

30 ml dökkt romm (allt í lagi að nota ljóst, gerum það yfirleitt)
30 ml coconut cream (eða Malibu)
30 ml ferskur appelsínusafi
15 ml rjómi
15 ml sykursíróp (niðursoðið vatn og sykur en við notum stundum hlynsíróp eða bara Tate&Lyle)
5 jarðarber
klaki

Allt þeytt saman, best í blandara. Borið fram í háu glasi.

Sikileyskt lasagna

2005-06-12T23:33:00.000Z

Annað loforð efnt. Þetta er eggaldinlasagna, algerlega kjötlaust, gott fyrir kanínurnar á listanum...

1-2 meðalstór eggaldin
lasagnablöð eftir þörfum
2 dósir niðursoðnir tómatar
1 lítil dós tómatkraftur (puré)
1 laukur, smátt saxaður
fullt af fersku basil (basili? basli?)
salt og pipar eftir smekk
150 g mozzarella (nota nú bara oftast gouda eða brauðost)
smá ólífuolía.

Byrjið á því að meðhöndla eggaldinin. Það sem ég geri er að ég sker þau í sneiðar, legg í fat og salta vel yfir. Læt í ísskáp í klukkutíma eða svo, saltið dregur vökva úr eggaldininu. Síðan skolar maður þau vel og þerrar. Stundum baka ég sneiðarnar í ofni í svona kortér, bara smyr bökunarpappír með olíunni og legg sneiðarnar á. Hiti 200 gráður. (Þetta er svolítið vesen en þetta verður allt annar matur. Ég hef margprófað að nenna þessu ekki og nota eggaldinin beint en verð alltaf fyrir sömu vonbrigðunum) Það þarf ekki að salta réttinn meira, þetta verður alveg passlega salt með því að skola vel og þerra. (hef hins vegar frétt + get ímyndað mér að þetta verði algerlega óætt ef sneiðarnar eru ekki skolaðar...)

Steikið lauk í olíu þar til gullinn, bætið síðan tómatdósunum + kraftinum út á pönnuna og kryddið eftir smekk (ekki salta). Má sjóða aðeins niður.

Raðið síðan saman lögum af sósu, eggaldini, lasagnablöðum og osti. Fallegast að enda á ostinum. Bakist við 200° í 40-50 mínútur. Gott að bera fram með góðu brauði og nýrifnum parmaosti.

rækjur í gráðostasósu

2005-05-30T23:50:00.000Z

ég var víst búin að lofa þessari...

Nú er svolítið misjafnt hvernig fjölskyldan býr til þennan, þeas hvernig gráðosturinn er meðhöndlaður en mér finnst best að gera þetta sirka svona:

1 dós sýrður rjómi (18%)
góður biti af gráðosti (fer eftir þoli)
perur úr dós + smá safi
rækjur
ristað brauð
svartur kavíar

Gráðosturinn bræddur og kældur. Sýrða rjómanum hrært saman við. Perur skornar í litla bita og hrært saman við, ásamt safa. Má ekki verða of þunnt.

Borið fram með rækjum og ristuðu brauði + kavíar til skrauts

Gráðostabragðið verður mjög milt og fínt, sýrði rjóminn dempar það. Ef maður vill öflugri ost má sleppa því að bræða hann, stappa bara saman við. Líka gott.

óhollustan uppmáluð

2005-05-13T18:47:00.000Z

bragðaði þetta fyrst á veitingastað rétt hjá tónlistarháskólanum í Stuttgart.

ferskt ravioli (helst með gorgonsola, eða bara osti, ekkert svona kjötsull eða pestó)

10 til 15 blöð af ferskri salvíu látin krauma litla stund með hvítlauk í ríkulegu magni af smjöri.

hellt yfir ravioliið og saltað með grófu salti og piprað með nýmöluðum svörtum pipar og miklum parmesanosti dreift yfir.

Þetta er viðbjóðslega óhollt, en sjúklega gott og var í kvöldmatinn hjá mér áðan. Núna er ítalska expressóið (eins og það heitir á Kaffitári) tilbúið og dökka belgíska súkkulaðið bíður.

Ef skúringafatan væri ekki í Danmörku hefði verið fengið sér í síló ... svona til að setja punktinn yfir i-ið ....

af barnum

2005-05-08T16:49:00.000Z

Ok ég veit að þetta er frekar mikið "two years ago" en Norðmenn eru frekar mikið tveim árum á eftir og kalúað var búið úr barnum svo ég varð að grípa til minna ráða svo einslítra rommflaskan sem ég var nýbúinn að opna myndi ekki byrja að skemmast:

MOJITO!!!!!!!

Það hefði kannski verið auðveldara að fara í mónópólið og kaupa kalúa heldur en að fara þrjár ferðir út í búð (sódavatn, sykur, læm) ... en úrþvíað ég var búinn að taka ákvörðunina varð að framkvæma hana. Fyrst þessi sem ég gerði, á eftir eitthvað sem á að vera besta mojito í heimi (frá einhverjum bar í Ósló, birt í Dagbladet), en það er einhvað læmdjússull í því svo ég trúi því nú varla að það sé gott, þar að auki er allt í sentilítrum í uppskriftinni en ég kann bara að mæla í desilítrum

mörg myntublöð (ég notaði piparmyntu, en maður á að nota spearmint, það er meira bragð af henni), 1 ms (hvítur) sykur og 1/4 lime í þunnum sneiðum marið saman í glasi lengi svo sykurinn leysist upp og myntan fari öll í kássu
Massi af kurluðum klaka ofaná + 1/2 dl af rommi (hvítt) og fyllt upp með sódavatni

Uppskriftin úr Dagbladet:

handfylli af myntulaufum
2 ts sykur
3 cl læmdjús
4 cl hvítt romm
sódavatn

Mynta, sykur og læmdjús marið/hrært saman í glasinu þangað til það kemur sterk lykt af myntunni, klakakurl og rommi bætt í og hrært og smá sódavatn útí. Svo á maður víst ekkert að vera að skreyta þetta með regnhlíf, en ef maður vill hafa grísaveislustemningu, finnst mér það bara allt í lagi!

enn bætist a kjúklingalistann...

2005-04-03T20:32:00.000Z

við vorum með alveg svakalega góðan kjúklingarétt í kvöld. Fer hér á eftir:

Sinnepssteiktar kjúklingabringur.

600 g kjúklingabringur
olía til steikingar
5 msk hveiti
2 msk sinnepskorn
1 egg, þeytt
1 tsk salt

sósa:
2 dl hrein jógúrt eða léttur sýrður rjómi
1 - 1 1/2 tsk grænt eða gult karrímauk
1/2 tsk cumin
salt og pipar

epli
hrísgrjón

Skerið bringurnar í meðalstóra bita. Steytið sinnepskornin létt í mortéli. Blandið helmingnum af hveitinu saman við sinnepsfræin og saltið. Setjið afganginn af hveitinu á disk. Veltið fyrst kjúklingabitunum upp úr hveiti, þá eggi og síðast sinneps/hveitiblöndunni. Brúnið bitana á heitri pönnu í smástund, setjið í 200° ofn í 10-15 mín (eftir stærð á bitum)

Hrærið öllu saman sem á að fara í sósuna, smakkið til með salti og pipar.

Skerið eplið í báta og steikið á pönnunni (ég notaði smá smjör þar), stráið yfir sinnepsfræjum.

Berist fram með hrísgrjónum.

Gerði þessar - þær voru ÆÐI!

2005-04-03T17:07:00.000Z

Banana nut muffins

* 1 1/2 cup all purpose flour
* 1/2 cup wheat flour
* 2 teaspoons baking powder
* 1 teaspoon ground cinnamon
* 1/2 teaspoon baking soda
* 1/8 teaspoon ground nutmeg
* 2/3 cup coarsely chopped pecans
* 1 large egg
* 3/4 cup packed brown sugar
* 1 1/2 cup mashed bananas
* 6 tablespoons vegetable oil
* 1 teaspoon vanilla

Preheat the oven to 375 degrees. Grease a standard 12 muffin pan or line with paper cups. Whisk together the flour, wheat flour, baking powder, cinnamon, nutmeg, and salt. Stir in the chopped pecans. Whisk together in a separate bowl, the egg, brown sugar, bananas, vegetable oil, and vanilla. Add the flour mixture to the banana mixture and mix with a few light strokes just until the dry ingredients are moistened. Do not overmix; the batter should not be smooth.

Divide the batter among the muffin cups. Bake until a toothpick inserted in 1 or 2 of the muffins comes out clean, about 18 minutes. Let cool for 2 to 3 minnutes before removing from the pan. If not serving hot, let cool on a rack.

Var reyndar með heslihnetur en ekki pekan. Pekan örugglega líka góðar.

Svo bara að draga upp smjörið og ískalda mjólk og njóta..

Baunasalat með halloumi (griskum osti)

2005-03-31T09:01:00.000Z

Fyrir 2-4
2x400 g kjúklingabaunadósir (eða aðrar góðar baunir eins og t.d. soja-, nýrna-, smjörbaunir eða blöndu af þessu)
lögur:
2 msk af ferskum kóríanderblöðum (klipptum) og/eða steinselju.
3 msk ólívuolía
1 msk sítrónusafi
1 hvítlauksrif
tamari (japönsk sojasósa)
sjávarsalt og nýmalaður pipar
---------------
200 g halloumiostur (fæst hér í hvítu plasti)
1 msk ólívuolía
100 g klettakál (ruccola) eða baby spínat
12 kirsuberjatómatar skornir í tvennt
100 g svartar ólívur

Blandið kryddlögin, takið frá ca. 2 msk og hellið rest yfir kjúklingabaunirnar. Gott er að láta baunirnar standa í leginum í einhvurn tíma ef hann er til.
Skerið ostinn í 1/2cm þykkar sneiðar og steikið uppúr ólívuolíunni í 1mín á hvorri hlið (á að brúnast). Búið til fjall af salati á hvern disk, hellið baunum yfir og skreytið með tómötum og ólívum. Skellið heitum ostinum yfir, 3 sneiðar á mann og ringlið restinni af kryddleginum yfir. Gott að hafa nýtt brauð með ;)

kjúklinga- og sítrónugrasssúpa

2005-03-24T23:35:00.000Z

matreiðslumeistari heimilisins hefur verið í ,,hugmyndalegri'' lægð í eldhúsinu undanfarið, sem þýðir að ég hef loks fengið tækifæri til að rifja upp gamla takta bak við eldavélina. þar sem þeir voru næstum gleymdir og meistarinn búinn að gera flesta gömlu réttina mína að sínum hef ég verið að finna upp á nýjum réttum á repertúar fjölskyldunnar. hér er einn sem ég er afskaplega ánægð með. en þetta er enginn skyndibiti (þó hægt að kaupa svona svipað á krúa tæ, minnir mig). uppskriftina fann ég á veraldarvefnum.
3 skinnlausar kjúklingabringur
4 sítrónugrassstilkar, innsti hlutinn
2 vorlaukar, fínt sneiddur
fínt rifinn börkur og safi úr 1 límónu
1 msk fiskisósa (nam pla)
1 tsk muscovado sykur (notaði hrásykur), meira eftir smekk
2-3 rauð eða græn chilli, fræhreinsuð
900 ml kjúklingasoð
5 sm fersk engiferrót
25 g ferskt kóríander
1 lítill laukur eða 2 skallottulaukar, fínt saxaðir
1 tsk fennelfræ
1 hvítlauksrif
1 tsk jarðhnetuolía
400 g kókosmjólk
salt og nýmalaður pipar

1. skerið kjúklinginn í þunnar sneiðar. setjið í "non-metallic" skál. sneiðið einn sítrónugrassstilkinn mjög þunnt og dreifið yfir kjúklinginn ásamt vorlauknum. bætið við límónuhýðinu, fiskisósunni og sykrinum og blandið öllu vel. látið marinerast í 30-60 mín.
2. sneiðið afganginn af sítrónugrasinu og chillíin 2 gróft og setjið út í kjúklingasoðið ásamt helmingnum af engiferinu (í sneiðum) og öllum kóríanderstilkunum (geymið laufin). hitið að suðu og látið svo malla í 30-60 mín. síið.
3. steikið laukinn, fennelfræin, hvítlaukinn og afganginn af engiferinu, fínt söxuðu, í olíunni í stórum potti þar til laukurinn fer að mýkjast. bætið síuðu soðinu við og mallið í 10 mín. bætið þá kókosmjólkinni út í. þegar maukið fer að malla aftur bætið kjúklingnum og öllu sem honum fylgir auk helmingi kóríanderlaufanna. mallið í 6-7 mín þar til kjúklingurinn er fulleldaður.
4. bragðbætið með límónusafa, salti og pipar og meiri sykri (ef vill), dreifið afganginum af kóríanderinu yfir og þriðja chillíinu, fínt söxuðu, ef vill.

etið með ánægju og hrísgrjónum.

Halloumi

2005-03-22T10:01:00.000Z

er grískur ostur sem ég hugsa um á hverjum degi! Stína: værirðu til í að setja grænmetishalloumibaunasalatréttinn hér á vefinn? Plís...

ps. skulda ykkur uppskrift að grískum kjötbollum og mömmuspesi - kemur kannski á þessu ári ;)

ostasalat

2005-03-20T22:21:00.000Z

samkvæmt beiðni Hallveigar. Þetta er samt ekki rétturinn sem ég var að tala um að setja hér inn í gær. Bíður betri tíma.

Ostasalat:

1 camembert
1 piparostur
1 rauð paprika
1 blaðlaukur (aðeins hvíti hlutinn notaður)
1/4 dós ananaskurl
1 lítil dós mæónes
1 dós sýrður rjómi
10-15 rauð vínber

Hrærið saman mæónesi og sýrðum rjóma
Skerið allt hitt í litla bita og blandi? saman við
Gott að láta standa í a.m.k. klukkutíma áður en borið fram.

sukkulaðihnetukakan...

2005-03-19T22:08:00.000Z

var ég nokkurn tímann búin að setja hér inn aðal klassíkerinn á kökuborðum heima hjá mér? (tja, þann sæta amk, kannski kemur heita brauðið síðar)

Þessa fékk ég hjá kórfélaga úti í Danmörku, yfirleitt fljót að klárast. Eitt stykki í ofninum núna, fyrir síðbúið afmælishóf á morgun.

Súkkulaðihnetukaka Dorthe:

150 g. suðusúkkulaði
150 g. heslihnetur
100 g. sykur
3 egg

Egg og sykur þeytt saman uns ljóst og létt. Hnetur og súkkulaði saxað mjög smátt og blandað við eggjahræruna. Bakað í vel smurðu tertuformi við 200° í 25 mínútur. Athugið, kakan á að vera blaut!!! Og já, það er rétt, ekkert hveiti, ekkert smjör... ;-)
Skreytt með þeyttum rjóma og ávöxtum árstíðarinnar. (best vatnsmelóna)

2005-03-10T19:55:00.000Z

Sunnudaginn var bjó ég til lummar handa bónda mínum eins og venja er á þeim ágæta degi.
Varð fyrir miklum innblæstri frá pönnukökum sem ég fékk á veitingarstað í San Francisco seinasta sumar sem olli því að ég setti peakanhnetur, banana og kardimmommu í degið. Í nokkrar þeirra setti ég einnig saxað súkkulaði til hressingar.
Við borðuðum þessar lummur með Scrabble og kaffi einu saman en eflaust er gott að setja smjör, sýróp, ís eða rjóma á þær. Án þess eru þær samt miklu hollari og ekki eins mikið sykurjukk.

Allaveganna hér er grunn lummuuppskrift sem ég fékk úr þeirri ágætu bók: Maturinn hennar mömmu.

400 g hveiti(ég setti um 300 g þar sem ég setti banana og hnetur í staðinn)
2 tsk lyftiduft
1 msk sykur(setti svona um 1-2 msk)
2 egg
1 dl mjólk(átti litla mjólk þannig að ég setti um hálfan dl mjólk og svona 1-2 dl súrmjólk)
50 g smjör (brætt á pönnunni)

Minn viðbætingur:
2 bananar(stappaðir saman með gaffli)
2 dl peakanhnetur(saxaðar)
1 tsk kardimommudropar

Hrærið saman egg og mjólk. Bræðið smjörið. Blandið saman þurrefnum. Hrærið smjörinu í þurrefnin og bætið eggjablöndunni út í. Hrærið með sleif uns degið er slétt og samfellt. Bætið stöppuðu bönunum, peakanhnetunum og kardimommunum út í..
Steikið 3-4 lummur í einu í lítilli feiti á meðalheitri pönnu. Berið fram með sultu og sykri.

Viðbætur úr bókinni: Maturinn hennar mömmu.
Svo ef þið gerið eingöngu grunnuppskriftina. Bæta má 75-100 g af rúsinum út í degið. Einnig er gott að hafa í það kaldan grjónagraut en þarf minna af hveiti. Nota má 200 g graut og 250 g hveiti. (Ég geri þetta einstaka sinnum þegar ég á grjónagrautsafgang í ískápnum).

Allaveganna ég bakaði um eina stóra lummu í hvert sinn þegar ég bakaði bananalummurnar. Lummur er skemmtilegt að baka og svo er alltaf hægt að bæta í degið það sem maður á og langar í hverju sinni. Alveg ansi auðvelt og fínn sunnudagsmorgunmatur þegar maður er bara í rólegheitunum. Hægt að setja ýmis ber í degið, hnetur, múslí og hvað eina.(Bjó einu sinni til múslí lummur og þær voru mjög góðar með osti).

GerdiJohnson talar frá LA

kreist og hrist

2005-03-10T08:26:00.000Z

Nú bætist Gerd John's brátt við brallið og er hér með skorað á hana að deila með okkur uppskriftum að kalífornískum grassöfum og jógúrthristingum með bananabragði.

grasekkja með grasker

2005-03-04T21:37:00.000Z

fyrirsögnin er plat!
ég er ekki grasekkja þótt kallinn sé ekki heima, og ég bauð heldur ekki upp á grasker í kvöldmatinn, reyndar var það kallinn sem sá um að reiða fram eftirfarandi rétt fyrir nokkru. uppskriftin er úr bók sem ber nafnið vegetarian italian cooking. mæli alveg með þessu ...
graskers- og pistasíurísottói:

1,2 lítrar grænmetissoð
"slatti" af saffrani (sem er náttúrlega ekki slatti í venjulegum skilningi)
2 msk ólífuolía
1 laukur, saxaður
2 hvítlauksrif, kramin
450 g rísottó (arborio) hrísgrjón
900 g graskerskjöt, skorið í 2 sm teninga
200 ml þurrt hvítvín
3 msk parmesan-ostur, rifinn
50 g pistasíuhnetur
3 msk ferskt, saxað marjoram eða oregano (og svo eitthvað til skrauts, ef vill)
salt, nutmeg (æ, man ekki hvað það heitir á ísl) og steyttur svartur pipar ... eftir smekk, að sjálfsögðu

1. útbúið soðið (sjóðið og leysið upp tening ef því er að skipta), setjið smá í skál og leysið saffranið upp í því.

2. hitið olíu á stórum potti, svitið lauk og hvítlauk við vægan hita í svona 5 mínútur. bætið hrísgrjónum og graskersbitunum út í þar til grjónin verða glær.

3. skutlið hvítvíninu út á og náið góðri suðu. þegar grjón/grasker hafa drukkið í sig vökvann bætið fjórðungi soðs, auk saffran-soðsins, við. hrærið stöðugt.

4. smábætið soðinu við (ausu og ausu í senn). látið grjónin drekka vökvann í sig fyrir hverja gusu. hrærið stöðugt í. eftir um 20-30 mín. ættu grjónin að vera gullin og krímí og alveg mátulega soðin.

5. skellið ostinum út í, hrærið í, lokið pottinum og látið bíða í 5 mín.

6. og nú bætast hnetur og kryddjurtir út í, salt, nutmeg og pipar eftir smekk.

drekkið með þessu afganginn af hvítvíninu ... jömmíjömm.
ég viðurkenni að þetta er spes, en samt ferlega ljúffengt.

Rauðsprettu- og rækjugratin

2005-02-28T14:59:00.000Z

Nú ætla ég að gerast kræf og brjóta höfundarrétt með því að birta hér uppskrift úr Fiskréttabók Hagkaupa. Hlýtur að fyrirgefast, fyrir plöggið, ég ráðlegg lesendum eindregið að kaupa bókina. Við erum búin að prófa nokkrar uppskriftir, flestar mjög góðar.

Þessa höfum við reyndar ekki prófað, en Hallveig ætlar að hafa þetta í kvöld. Hún verður að láta okkur vita hvernig til tókst.

Hér kemur:

Rauðsprettu- og rækjugratín.

800 g rauðsprettuflök með roði
2-3 msk smjör (stendur reyndar smjörlíki, en hei hver notar svoleiðis?)
salt
300 g rækjur
4 dl bearnaisesósa
100 g rifinn ostur

(Þetta með bearnaisesósuna, það er gefin uppskrift að afskaplega undarlegri útgáfu af svoleiðis, án allra kryddjurtanna sem gera bearnaisesósu að því sem hún er, estragon og kerfli skipt út fyrir steinselju. Ég myndi bara nota hollandaise úr pakka + bæta við saxaðri steinselju, nema það væri þeim mun meiri veisla hjá manni.)

Byrjið á að útbúa sósuna. Steikið rauðsprettuflökin í smjöri á vel heitri pönnu. Látið roðhliðina snúa upp, lækkið hitann og steikið í um 45 sekúndur. Snúið flökunum við, saltið og takið pönnuna af hitanum. Látið flökin jafna sig í um 2 mínútur. Ath, steikingartími fer eftir þykkt flakanna. Færið flökin upp á eldfast fat. Skiptið rækjunum á rauðsprettuflökin, setjið sósuna yfir og stráið svo rifnum osti yfir sósuna. Bakið fiskréttinn undir grilli þar til hann verður fallega gullinbrúnn. Berið fram með soðnum kartöflum og soðnu grænmeti.

Hér kemur síðan sósuuppskriftin ef einhver vill:

250 g smjör
3 eggjarauður
2 msk hvítvínsedik
2 msk vatn
kjötkraftur eftir smekk
1 msk söxuð steinselja

Bræðið smjörið í potti. Þeytið eggjarauður yfir vatnsbaði þar til þær eru orðnar að þykku kremi. Blandið bræddu, volgu smjöri varlega saman við. Hrærið hvítvínsediki og vatni saman við. Kryddið með kjötkrafti eftir smekk og blandið saxaðri steinselju saman við.

hvað er

2005-02-10T14:04:00.000Z

jam ?
okra ?
Jamie oliver er aðeins OF mikið þýddur fyrir minn smekk... Hér stendur broddkúmen í stað cumin. Svo er caraway seeds þýtt sem kúmen! er nett ringluð. Gott og vel að nota íslensku. Lítið gagn samt ef maður skilur ekki neitt..

bollabolla

2005-02-07T12:22:00.000Z

hæ þið sætu öll..

gerði geðveikan jarðarberjarjóma inn í bollurnar í gær, fann hann í nýjasta gestgjafanum sem ég keypti því í því eru fullt af karríuppskriftum.. elska karrí sko (Hildigunnur, þú mátt alveg henda hérna inn indversku rækjunum)

eníhú, hér er rjóminn:

250 ml rjómi
1 msk ljóst síróp (ætla að prófa hlynsíróp næst)
150 gr fersk jarðarber

saxið jarðarberin smátt. Þeytið rjómann þar til hann er er orðinn næstum fullþeyttur, setjið þá sírópið saman við og stífþeytið rjómann. Blandið jarðarberjunum varlega saman við.

ákvað að prófa þetta því ég hafði gleymt að gera venjubundna vanillubúðinginn minn sem þarf að gera daginn áður. En þetta sló hann út full stop! :D

bollurnar eru svo auðvitað vatnsdeigs og með þykku lagi af ekta síríus konsúmi ofan á.. að sjálfsögðu..

rækjur

2005-02-07T12:17:00.001Z

Þættinum hefur borist bréf...

Hér kemur uppáhalds indverski rétturinn okkar, hér á heimilinu. Mmmm!

Indverskur rækjuréttur

500 g rækjur
1/2 dl matarolía
1 1/2 dl kasjúhnetur
1 stór laukur, í sneiðum
2 msk rifin engiferrót
2 msk pressaður hvítleukur
1/2 tsk chiliduft
1/4 tsk túrmerik
1 tsk kumin
2 maukaðir tómatar úr dós
1/4 ds hrein jógúrt
1 msk tómatkraftur
1 dl kókosmjöl
1/2-1 dl kókosmjólk
3 dl basmatigrjón
8 negulnaglar
4 kardimommur
1 kanilstöng
1 tsk salt
1 dl rjómi
saffran (nokkrir þræðir)

þíðið rækjurnar og þerrið. þvoið grjónin og látið liggja í bleyti í 15 mín. Sigtið vatnið frá. Hitið olíu á stórri pönnu. Bætið kasjúhnetunum út í og hrærsteikið þar til þær verða fallega brúnar. Geymið hneturnar á eldhúspappír. Bætið lauk út í sömu olíu og steikið, geymið hjá hnetunum. Bætið engifer, hvítlauk, chili, túrmeriki og kumin út í og steikið smástund. Bætið tómatmauki við og steikið áfram, síðan jógúrti og tómatkrafti, hrærið og steikið þar til olían skilur sig frá. Bætið kókosmjólk, kókosmjöli og salti við og hrærið í þar til blandan fer að þykkna. Setjið rækjurnar saman við, hrærið einu sinni og hellið öllu í eldfast fat.
Hitið ofninn í 180°. Hitið rjómann í örbylgjuofni í örstutta stund, bætið saffrani saman við og geymið. Hitið uþb 2,5 lítra af vatni í potti, bætið við negulnöglum, kanilstöng, kardimommum og salti og látið suðuna koma upp. Bætið hrísgrjónum við og sjóðið í 6-7 mínútur. Sigtið vatnið frá og setjið hrísgrjónin ofan á rækjurnar. Dreifið kasjúhnetunum og lauknum ofan á. Hellið síðan rjómanum yfir. Setjið álpappír yfir og lokið þannig að gufan haldist í mótinu. Bakist í 15-20 mínútur

Berið fram með rætu og nanbrauði

ræta:

1/2 agúrka, gróft rifin og safinn pressaður úr
1 ds hrein jógúrt
1/2 tsk salt
1/4 tsk cumin
1/2 ds sýrður rjómi
1/2 tsk sykur

hræra saman jógúrt, sýrðan rjóma, salt, cumin og sykur. Bæta við agúrkunni. Bera fram kalt

langar

2005-02-05T20:39:00.000Z

annars einhvern í franska fýlurótarsúpu?

bananar, ja...

2005-02-05T20:30:00.000Z

þessi kaka/desert er snilld. Kaupum stundum brúna matarbanana (hmm, eru bananar einhvern tímann ekki matur?) bara fyrir hana:

200 g möndlur
200 g suðusúkkulaði
4 vel þroskaðir bananar
(ef vill, einn fallegur, til skrauts)
100 g smjör
150 g sykur
3 egg, aðskilin

1. Fínsaxið eða malið möndlurnar og súkkulaðið. Skerið bananana fjóra í teninga.

2. Þeytið saman smjör og sykur þar til létt og ljóst

3. Blandið eggjarauðunum, rifnu súkkulaði, möndlum og banönum út í deigið

4. Stífþeytið eggjahvíturnar og blandið þeim varlega saman við deigið

5. Setjið blönduna í eldfast mót og bakið í 225° heitum ofni í 30 mínútur, hafið mótið í miðjum ofninum.

6. Skerið einn banana í sneiðar og skreytið.

Óhemju gott, heitt með ís...

gamlir bananar hjálp!!!

2005-02-04T13:19:00.000Z

Krakkar, einu sinni sem oftar sit uppi með 4 banana sem eru orðnir marðir og brúnir og heldur ólystugir en ég tími ekki að henda þeim. Vitiði um einhverja góða bananabrauðsuppskrift?

Súpa

2005-02-04T09:59:00.000Z

Þessi er víst æðisleg....

Mexíkósk kjúklingasúpa

Uppskriftin er fyrir 4

3 laukar
3 hvítlauksrif
1 rauður chillipipar

Allt saxað smátt, steikt á pönnu og sett í súpupottinn

1 flaska Granini tómatsafi
4-5 dl kjúklingasoð
2 tsk Worchestershiresósa
1 tsk chilikrydd
1 tsk cayenne pipar
2 dósir niðursoðnir tómatar, smátt saxaðir

Allt sett í pottinn og soðið við lágan hita í 45-60 mín

3-4 kjúklingabringur skornar í litla bita og steiktar, settar í pottinn og
soðnar með í 15 mín

Meðlæti: Guakamole 1 krukka, sýrður rjómi 1 dós, Nachos flögur og rifinn
ostur.
Hver og einn setur meðlætið á sinn súpudisk.
Verði ykkur að góðu!

Enn einn kjúllinn...

2005-01-28T17:03:00.000Z

1 stk heill kjúklingur
2-3 gulrætur
1 laukur
ca. 1 dl smjör
ferskt krydd (t.d. basilíka)
hrísgrjón
Mango "tjötney"
salt og pipar

Hita ofninn í 180-200.

Skera grænmeti í bita og setja í eldfast mót.

blanda kryddinu saman við smjörið og setja svo blönduna innundir skinnið á kjúklingnum.
salta kjúklinginn vel að utan og pipra soldið.
setja kjúklinginn oná grænmetið í mótinu.
Inn í ofn í klukkutíma.
Sjóða hrísgrjón.
Borða svo hrísgrjón og kjúlla og grænmeti og hafa Mangó "tjötney" sem sósu. -Snilld.

lífi blásið í baukinn

2005-01-21T15:52:00.000Z

er ekki kominn tími til að endurlífga matgæðingasíðuna? Er með grænmetisæði eftir hátíðirnar.. Súpur eiga einstaklega vel við í janúar finnstykkur ekki? Þessi er alveg hrikalega góð og einföld!

Baunasúpa

3 skarlottulaukar (smátt skornir)
3 hvítlauksrif (pressuð)
1/2 kg frystar baunir
1 lítri grænmetiskraftur (vatn + 2 teningar)
30-50 g parmesan
1 dl rjómi
hafsalt og nýr pipar
--------------
Léttsteikið laukinn (á að verða glær en allsekki brúnn). Setjið útí grænmetiskraftinn ásamt baununum. Sjóðið í 10 mín. Setjið í blandara eða ráðist á súpuna með töfrasprota þ.a. hún fái jafnan grænan lit. Setjið aftur yfir hitann og hellið rjómanum og parmesan ostinum yfir. Smá hafsalt og pipar and dinner is served...